ကိုးကန့်လက်နက်ကိုင်အဖွဲ့(MNDAA)နှင့် အာဏာသိမ်းစစ်ကောင်စီတပ်တို့ ဩဂုတ် ၂၆ရက်က တိုက်ပွဲဖြစ်ပွားခဲ့ရာ စစ်ကောင်စီတပ်မှ အနည်းဆုံး ၄ဦးသေဆုံးခဲ့ကြောင်း ကိုးကန့်အဖွဲ့၏ The Kokang ဖေ့စ်ဘွတ်ခ်စာမျက်နှာမှ ထုတ်ပြန်သည်။
တိုက်ပွဲဖြစ်ပွားရာနေရာကို လူတောင်ရွာအနီးဟု ဖော်ပြထားသော်လည်း မြို့နယ်ကိုမူ ဖော်ပြမထားပေ။ သို့ရာတွင် ကိုးကန့်တပ်နှင့် စစ်ကောင်စီတို့သည် မူဆယ်မြို့နယ် မုံးကိုးဒေသ၌ တိုက်ပွဲဖြစ်ပွားနေသည်မှာ ၂လခန့်ရှိပြီဖြစ်သည်။
တိုက်ပွဲဖြစ်ပွားရခြင်းအကြောင်းအရင်းမှာ ကိုးကန့်အဖွဲ့၏ ကိုဗစ်ရောဂါ ကြိုတင်ကာကွယ်နှိမ်နင်းရေးအဖွဲ့က လူတောင်ရွာသို့ သွားရောက်၍ လူထုအား ပညာပေး မှုနှင့် ကိုးကန့်အဖွဲ့၏ မူဝါဒများ နားလည်စေရန် သွားရောက်ရှင်းလင်း ပြောကြားစဥ် စစ်ကောင်စီတပ်၏ တပ်မ(၉၉) တပ်ဖွဲ့ဝင်များက ရွာအနီး ရောက်ရှိလာ၍ ၃နာရီကြာ တိုက်ပွဲဖြစ်ခဲ့သည်ဟု ထုတ်ပြန်ခဲ့သည်။
ဩဂုတ် ၂၈ရက်ကလည်း မုံးကိုးဒေသ၌ ကချင်လက်နက်ကိုင်အဖွဲ့(KIA)နှင့် ကိုးကန့်အဖွဲ့တို့ပေါင်းပြီး စစ်ကောင်စီတပ်ကို ခုခံတိုက်ခိုက်ရာ စစ်ကောင်စီတပ်မှ သေဆုံးထိခိုက်မှုများကြောင်း သတင်းဖော်ပြမှုများ ရှိသော်လည်း KIAနှင့် ကိုးကန့်အဖွဲ့တို့က အတည်ပြုထုတ်ပြန်ခြင်းမရှိသေးပေ။
Public Service Announcement
