'/%3E%3C/svg%3E){kind=small}
စစ်ရေးတင်းမာနေဆဲဖြစ်သောကြောင့် ရဲဘော်များအပြင်းအထန်လေ့ကျင့်နေကြောင်း မိုးဗြဲပြည်သူ့ကာကွယ်ရေးတပ်(MBPDF)က ယနေ့(အောက်တိုဘာ ၂၆ရက်) အသိပေး ထုတ်ပြန်သည်။
“ရှေတန်းကင်းမှာ အလှည့်ကျစနစ်နဲ့တာဝန်ယူပြီး နောက်တန်းကိုပြန်လာတဲ့ ရဲဘော်တွေဟာအေးဆေးအနားမယူနိုင်သေးဘဲ လေ့ကျင့်နေတယ်ဆိုတာ အသိပေးတာပါ”ဟု MBPDF တာဝန်ရှိသူက လူထုနွေဦးသို့ ရှင်းပြသည်။
မိုးဗြဲမြို့တွင် တပ်စွဲနေရာယူထားသော အကြမ်းဖက်စစ်ကောင်စီတပ်ကို အမြစ်ပြတ်ခြေမှုန်းနိုင်ရန်နှင့်ပြည်သူလူထုကိုကာကွယ်ရေးအဆင်သင့်ဖြစ်နေရန် ကြိုးစားနေသည်ဟု ဆိုသည်။
လက်ရှိမိုးဗြဲမြို့တွင် ထိတွေ့တိုက်ပွဲများ ငြိမ်သက်နေသော်လည်း အကြမ်းဖက်စစ်ကောင်စီတပ်က နေ့စဥ် လက်နက်ကြီးများဖြင့် ရမ်းသမ်းပစ်ခတ်မှုများရှိပြီး ပြည်သူအချို့ထိခိုက်ဒဏ်ရာရရှိထားသည်။
Public Service Announcement
ကရင်နီ(ကယား)ပြည်နယ်၏ စစ်ရေးအရအရေးပါသည့် မိုးဗြဲမြို့ကို ထိန်းချုပ်ရန် စက်တင်ဘာလဆန်းပိုင်းကစ၍ အကြမ်းဖက်စစ်ကောင်စီက အင်အား ၃၀၀ခန့်အပါအဝင် သံချပ်ကာယာဥ်နှင့်တင့်ကားခြောက်စီး အသုံးပြု၍ ထိုးစစ်ဆင်ခဲ့သည်။
တိုက်ပွဲများ၌ အကြမ်းဖက်စစ်ကောင်စီတပ်မှ ၈၀ ဦးထက်မနည်းသေဆုံးကာ ၎င်းတို့ထံမှ လက်နက်ခဲယမ်း အချို့သိမ်းဆည်းရရှိခဲ့သည်။
အလားတူ ကရင်နီပူးပေါင်းတပ်မှ ရဲဘော် ၁၂ဦးကျဆုံးခဲ့ရပြီး စစ်ဘေးရှောင်ပြည်သူ ခြောက်ဦးမှာလည်း စစ်ကောင်စီ၏ လက်နက်ကြီးထိမှန်၍ ဆုံးပါးခဲ့သည်။
