စစ်ကိုင်းတိုင်း၊ စစ်ကိုင်းမြို့နယ်တွင် ရွာသစ်ကြီးနယ်မြေစခန်းမှူးနှင့် စစ်ကောင်စီတပ်ဖွဲ့ဝင်များလိုက်ပါလာသော မတ်တူးယာဥ်အား ဝိုင်းဝန်းပစ်ခတ်တိုက်ခိုက်ရာ နှစ်ဦးထက်မနည်းသေဆုံးကြောင်း အာဏာရှင်စနစ်တိုက်ဖျက်ရေးပြည်သူ့တပ်ဖွဲ့(PAFD)၏ သတင်းနှင့် ပြန်ကြားရေးတာဝန်ခံက ပြောသည်။
ယနေ့(ဖေဖော်ဝါရီ၁၁ရက်) နံနက်၈နာရီခန့်က ရွာသစ်ကြီးစခန်းမှူးနှင့် စစ်သားနှင့်ရဲ လေးဦး လိုက်ပါလာသော ယာဥ်အား ရွာသစ်ကြီးစံပြကျေးရွာနှင့် နက်ခရိုင်ကြားတွင် တော်လှန်ရေးရဲဘော်များက လက်နက်ငယ်များဖြင့်ပစ်ခတ်တိုက်ခိုက်ခဲ့ကြောင်း PAFD၏ သတင်းနှင့် ပြန်ကြားရေးတာဝန်ခံက ပြောသည်။
ထိုသို့တိုက်ခိုက်မှုကြောင့် ယာဥ်ပေါ်ပါ ရဲများ ဒဏ်ရာရသေဆုံးမှုရှိကြောင်း၊ တော်လှန်ရေးရဲဘော်များ၏လက်နက် ချို့ယွင်းသွားသောကြောင့် ကားမောင်းသမားက စခန်းသို့ပြန်လှည့်မောင်းသွားခဲ့၍ လက်နက်များမသိမ်းနိုင်ခဲ့ကြောင်း အထက်ပါ တာဝန်ခံက ပြောသည်။
“သူတို့က ကံတလူတိုးဂိတ်ဘက်ကို ဘာကိစ္စရယ်မသိဘူး။ဝေစုသွားသွားခွဲတယ်ကြားတာပဲ။ ကားကို ထိုးရပ်သွားတယ်။ ထိုးရပ်သွားတဲ့အချိန် ပွဲသိမ်းခါနီးမှာ အော်တိုနှစ်လတ်လုံးက ဂျန့်ဖြစ်သွားတာနဲ့ သူတို့က နောက်ပြန်ဆုတ်ပြီး ထွက်ပြေးသွားတာ။ တကယ်တမ်းအချိန်ရတယ်။ ဟိုလိုဆိုရင် ပစ္စည်းတွေပါရတယ်။နှစ်ယောက်ကတော့ သေချာတယ်။ ကားသမားတစ်ယောက်ပဲ ကျန်နိုင်တယ်။”ဟု PAFD၏ သတင်းနှင့် ပြန်ကြားရေးတာဝန်ခံက ပြောသည်။
Public Service Announcement
တိုက်ခိုက်ပြီးနောက် ရွာသစ်ကြီးဘက်မှ စစ်ကောင်စီကားနှစ်စီးရောက်လာပြီး ပိုက်စိပ်တိုက်ရှာဖွေမှုများ ပြုလုပ်ခဲ့ကြောင်း ၎င်းက ပြောသည်။
အဆိုပါ စစ်ဆင်ရေးကို People’s Army to Fight Dictatorship (PAFD)နှင့် PAFDတပ်ခွဲDK PDF-MMUတို့ ပူးပေါင်းလုပ်ဆောင်ခဲ့ကြောင်း အသိပေးထားသည်။
ပြီးခဲ့သည့် ရက်ပိုင်းအတွင်းကလည်း စစ်ကိုင်းမြို့နယ်အတွင်းရှိ ညောင်ပင်ဝန်းရဲစခန်းကို ဒေသတွင်းတော်လှန်ရေးအင်အားစုများက သွားရောက် တိုက်ခိုက်ခဲ့သေးသည်။
