ပေါက်တောင်ပိုင်း ဒီးဒုတ်ကွင်းရွာရှိ စစ်အုပ်စုအား လက်နက်ကြီးဖြင့် ၂နာရီကြာပစ်ခတ်တိုက်ခိုက်

မကွေးတိုင်း ပေါက်မြို့နယ်တောင်ပိုင်း ဒီးဒုတ်ကွင်းကျေးရွာ၌ တပ်စွဲထားသော စစ်ကောင်စီတပ်နှင့် ပျူစောထီးအဖွဲ့ကို မဟာမိတ်လေးဖွဲ့ပူးပေါင်းပြီး လက်နက်ကြီးများဖြင့် ၂နာရီကြာပစ်ခတ်တိုက်ခိုက်ခဲ့ကြောင်း မကွေးခရိုင် PDFတပ်ရင်း (၂)က ပြောသည်။

အဆိုပါတိုက်ခိုက်မှုကို မတ်လ ၁၅ ရက် ညနေ ၄နာရီတွင် မကွေးခရိုင် အမှတ် (၂)တပ်ရင်း၊ တပ်ခွဲ (၂)တောင်တွင်းကြီးတပ်ခွဲ၊ ပေါက်တပ်ရင်း (၄)၊ King Fighter Special Guerrilla Force၊ ပေါက် Zone-5 တို့ ပူးပေါင်းတိုက်ခိုက်ခဲ့ခြင်း ဖြစ်သည်။

“ထိခိုက်သေဆုံးမှုစာရင်းကို အတိအကျမသိရှိရသေးပါဘူး။ စုံစမ်းဆဲပါ။ ကျွန်တော်တို့ဘက်က အဖွဲ့လေးဖွဲ့ပေါင်းပြီး (၆၀) မမတွေ ရော့ကတ် တွေနဲ့ သွားပစ်ခဲ့တာ”ဟု မကွေးခရိုင် PDF တပ်ရင်း (၂)မှ ဗိုလ်စံသျှားက People’s Spring သို့ ပြောသည်။

ဒီးဒုတ်ကွင်းကျေးရွာရှိ ပျူစောထီးများသည် စစ်ကောင်စီတပ်အား ရပ်ရွာအတွင်း တပ်စွဲထားစေသည့်အပြင် အနီးဝန်းကျင်ကျေးရွာများသို့ စစ်ကြောင်းထိုးရာတွင် စစ်တပ်နှင့်အတူလိုက်ပါပြီး အပြစ်မဲ့ပြည်သူများအား သတ်ဖြတ်ရာတွင် ပါဝင်နေခြင်းကြောင့် ယခုကဲ့သို့ ပစ်မှတ်ထားတိုက်ခိုက်ခဲ့ခြင်းဖြစ်ကြောင်း မကွေးခရိုင် တပ်ရင်း (၂)က အသိပေးသည်။

Public Service Announcement

စစ်ကောင်စီတပ်နှင့် ပျူစောထီး အင်အား ၆၀ခန့်ရှိသော ဒီးဒုတ်ကွင်းရွာ တိုက်ခိုက်မှုတွင် အသုံးပြုခဲ့သော ရော့ကတ်များမှာ မကွေးခရိုင် တပ်ရင်း (၂)၊ တပ်ခွဲ (၂) တောင်တွင်းကြီးတပ်ခွဲမှထုတ်လုပ်သော လက်နက်များအား အသုံးပြုခဲ့ခြင်းဖြစ်ကြောင်း သိရသည်။

အလားတူ မတ်လ ၁၅ ရက်က ပေါက်မြို့နယ် သနပ်ပင်ဇင်းကျေးရွာဘက်တွင် အင်အား (၁၀၀ခန့်ဖြင့် စစ်ကြောင်းထိုးနေသော စစ်ကောင်စီတပ်ကို အနောက်ပိုင်းတိုင်း PDFတပ်ရင်း (၇၀၃) နှင့် မဟာမိတ်များပူးပေါင်းတိုက်ခိုက်မှုကြောင့် တပ်ဆုတ်သွားခဲ့ရသည်။