သင်္ကန်းညီနောင်မှ မြဝတီမြို့သို့ပြန်လာသော စစ်ကောင်စီတပ်ဖွဲ့ဝင်များပါရှိသော ယာဉ်အား ကော်ဘရာမှ ကြားဖြတ်တိုက်ခိုက်ခဲ့ကြောင်း ယင်းစစ်ကြောင်းက ထုတ်ပြန်သည်။
မတ်လ ၂၅ရက်ကတည်းက ကော်ဘရာစစ်ကြောင်း နှင့် ပူးပေါင်းတပ်များက သင်္ဃန်းညီနောင် ရဲစခန်းနှင့် မြ၀တီကုန်သွယ်ရေးဇုန်အပါအဝင် ဒေသတွင်းရှိ စစ်ကောင်စီတပ်ဖွဲ့များကို တိုက်ခိုက်လျက်ရှိရာ ယနေ့အထိ ဆက်တိုက်စစ်ရေးပြင်းထန် နေခြင်းဖြစ်သည်။
ယနေ့ (ဧပြီ ၃ရက်)တွင် သင်္ကန်းညီနောင်မှ မြဝတီမြို့သို့ ပြန်လာသော စကစအင်အား (၄၀)ခန့်ပါဝင်သော ဖောကားတစ်စီးအား ပစ်ခတ်တိုက်ခိုက်ခဲ့ရာ အပြန်အလှန်တိုက်ခိုက်မှု နာရီဝက်ခန့်ဖြစ်ပွားခဲ့ကြောင်း၊ ရန်သူဘက်မှ ထိခိုက်သေဆုံးမှုများပြားခဲ့ကြောင်း ကော်ဘရာစစ်ကြောင်းက ထုတ်ပြန်သည်။
ယင်းတိုက်ပွဲ၌ ကော်ဘရာစစ်ကြောင်းဘက်က ထိခိုက်မှုမရှိဟု အသိပေးသည်။
Public Service Announcement
အဆိုပါ ပစ်ခတ်မှုကြောင့် အနီးအနားရှိ သင်္ကန်းညီနောင်ရဲစခန်းနှင့်ပါ အပြန်အလှန်ပစ်ခတ်မှုရှိခဲ့ကြောင်းလည်း အသိပေးသည်။
ကော်ဘရာစစ်ကြောင်းနှင့် ပူးပေါင်းတပ်ဖွဲ့သည် မတ်လ ၂၅ ရက်တွင် မြ၀တီကုန်သွယ်ရေးဇုန်နှင့် သင်္ဃန်းညီနောင်ရှိစစ်ကောင်စီတပ်များအား တိုက်ခိုက်ခဲ့ရာ ထိုနေ့၌ပင် စစ်ကောင်စီဘက်က ၁၁ဦးသေဆုံးကာ ရဲမှူးအပါအဝင် ၈ဦးကို အရှင်ဖမ်းမိပြီး လက်နက် ၁၆လက်ရရှိခဲ့ကြောင်း အသိပေးထားသည်။
နောက်ပိုင်းရက်များ၌လည်း တိုက်ပွဲများဆက်လက်ဖြစ်ပွားခဲ့ရာ စစ်ကောင်စီတပ်နှင့် BGF တပ်မှ သေဆုံးထိခိုက်မှုများ ရှိခဲ့ကြောင်း ကော်ဘရာ စစ်ကြောင်းက အသိပေးထားသည်။
