စစ်ကိုင်းတိုင်း ဗန်းမောက်မြို့နယ်တွင် စစ်ကောင်စီတပ်က ယနေ့ လေကြောင်းမှ ဗုံးကြဲတိုက်ခိုက်ခဲ့၍ အဘွားအိုတစ်ဦးသေဆုံးပြီး ဒေသခံပြည်သူငါးဦး ဒဏ်ရာရခဲ့သည်ဟု Banmauk Revolutionက အသိပေးထုတ်ပြန်သည်။
ယနေ့ (ဧပြီ ၁၂ရက်) နံနက် ၁၁နာရီခန့်တွင် ဗန်းမောက်မြို့နယ် ပင်ဟင်းခါးကျေးရွာနှင့် သာယာကုန်းရွာကြား စစ်ကြောင်းထိုးလာသော အကြမ်းဖက်စစ်ကောင်စီတပ်များအား မိုင်းဆွဲတိုက်ခိုက်ခဲ့ရာ ၁၀ဦးခန့် သေဆုံးခဲ့သည်ဟု ဆိုသည်။
အထိနာသွားသော စစ်ကောင်စီတပ်က တိုက်လေယာဉ်ဖြင့် တုံ့ပြန်တိုက်ခိုက်ခဲ့ရာ ဗုံးရှစ်လုံး ကြဲချခဲ့ကြောင်း၊ သာယာကုန်းဘုန်းကြီးကျောင်း၊ ဇရပ်နှင့် ရွာရှိနေအိမ် လေးလုံးထိခိုက်ပျက်စီးပြီး အိမ်အတွင်းရှိ ဒေသခံပြည်သူ လေးဦးထိခိုက်ဒဏ်ရာရရှိကြောင်း ဖော်ပြသည်။ ဒဏ်ရာရသူ လေးဦးအနက် တစ်ဦးမှာ ကလေးငယ် ဖြစ်သည်ဟု ဆိုသည်။
ထို့အပြင် နေ့လည်ပိုင်းတွင်လည်း တိုက်ခိုက်ရေး ရဟတ်ယာဉ်ဖြင့် ထပ်မံလာရောက်တိုက်ခိုက်ခဲ့ရာ အသက်(၇၀)ကျော် အမျိုးသမီး တစ်ဦးသေဆုံးပြီး ပြည်သူတစ်ဦး ဒဏ်ရာရခဲ့သည်ဟု ဖော်ပြသည်။
Public Service Announcement
“တပ်ဖွဲ့ချင်းမယှဉ်နိုင်သော အကြမ်းဖက်စစ်ကောင်စီတပ်များသည် မနိုင်နိုင်ရာမဲပြီး ရွာမီးရှို့ခြင်း၊ လက်နက်မဲ့ပြည်သူများအား ဖမ်းဆီးသတ်ဖြတ်ခြင်း၊ လေကြောင်းတိုက်ခိုက်မှုများ ပြုလုပ်ခြင်းတို့ကို တိုးမြှင့်လုပ်ဆောင်နိုင်ပါသဖြင့် အထူးဂရုပြုနေထိုင်ကြပါရန် ပန်ကြားအပ်ပါသည်”ဟု Banmauk Revolutionက ဖော်ပြသည်။
အကြမ်းဖက်စစ်ကောင်စီနှင့် ရှမ်းနီ SNA ပူးပေါင်းတပ်သည် ဧပြီ ၁၂ရက်တွင် နောင်ယော နှင့် ကူးဆိပ် စျေးတန်းအား မီးရှို့ဖျက်ဆီးခဲ့ကြောင်း၊ ယခင်နေ့များ၌လည်း မတ္တရာမှော်၊ ရွှေတော်-မင်းကုန်းကျေးရွာများကို စစ်ကောင်စီက မီးရှို့ဖျက်ဆီးခဲ့ကြောင်း အသိပေးသည်။
