ကန့်ဘလူမြို့နယ်၊ ပဇီကြီးရွာဘက်သို့ သပိတ်ကျင်းမြို့နယ်ဘက်မှ တက်လာသည် အင်အား ၃၀၀ ခန့်ပါ စစ်ကောင်စီစစ်ကြောင်းနှစ်ကြောင်းခွဲတက်လာ၍ကျေးရွာ (၇ )ရွာမှ စစ်ဘေးရှောင်အရပ်သားများထပ်မံထွက်ပြေးနေရကြောင်း ဒေသခံများကပြောသည်။
၁၂ ဘီးကားနှစ်စီး၊ ကားအသေးနှစ်စီးဖြင့် သပိတ်ကျင်းမြို့နယ်ဘက်မှ ယမန်နေ့ညနေက လာသောစစ်ကောင်စီတပ်စစ်ကြောင်းသည် ယနေ့(ဧပြီ ၁၉ရက်)နံနက် ၁၀နာရီခန့်တွင် ပဇီကြီးရွာနှင့် နှစ်မိုင်ခန့်အကွာသို့ ရောက်ရှိလာသည်ဟု ဒေသခံတစ်ဦးကပြောသည်။
“သပိတ်ကျင်းဘက်ကနေလာတာ။လက်နက်ကြီးတွေလည်းပါတယ်။ ည၁၁ နာရီလောက်မှာ တွေ့တဲ့ မော်တော်တွေ ချောဆွဲပြီး မလည်ရွာကို ရောက်တယ်။ မလည်ပြည့်သူ့ဆေးရုံထဲမှာ ညကတပ်စွဲတယ်။ ဒီနေ့မနက် ၆ နာရီကစပြီး မလည်ရွာရဲ့ အနောက်ကနေတစ်ကြောင်း၊တောင်ဘက်ကနေ တစ်ကြောင်း ပဇီကြီးရွာကို ဝိုက်တက်နေတယ်။ အခုရွာနားကို ရောက်နေပြီ”ဟု ဒေသခံတဦးကပြောသည်။
စစ်ကိုင်းတိုင်း၊ ကန့်ဘလူမြို့နယ် မလည်ရွာနှင့် မန္တလေးတိုင်း သပိတ်ကျင်းမြို့နယ် စပယ်နဂိုရွာသည် ဧရာဝတီမြစ်ခြားလျှက် ဟိုဘက်ဒီဘက် တည်ရှိနေသော ရွာဖြစ်သည်။
Public Service Announcement
စစ်ကောင်စီတပ်သည် စပယ်နဂိုကျေးရွာ ဘောလုံးကွင်းအတွင်း လက်နက်ကြီးများတပ်ဆင်ထားပြီး မြေပြင်တိုက်ပွဲဖြစ်ပါက လက်နက်ကြီးအသုံးပြုလာနိုင်သည်ဟု စပယ်နဂိုဒေသခံတစ်ဦးလည်းပြောသည်။
” ပဇီကြီးရွာက မလည်ရွာနဲ့ ၄မိုင်ပဲ ဝေးတယ်။ စပယ်နဂိုကနေ လက်နက်ကြီးနဲ့ ပစ်ရင် အေးဆေးရောက်တယ်။ အဲ့ဒီလိုဆိုတော့ ပဇီကြီး တိုက်ခိုက်မှုနောက်ပိုင်း ပြေးနေကြရတဲ့ ရွာ ခုနှစ်ရွာလောက်ကညကရော ဒီမနက်ပါ ထပ်ပြေးနေရတယ်”ဟုရွာသာယာဒေသခံတစ်ဦးက People’s Spring သို့ ပြောသည်။
စစ်ကောင်စီစစ်ကြောင်းထိုးလာ၍ ပဇီကြီး၊ မဲဇတော်၊ ရွာသာယာ၊ထန်းတော၊ ချောင်းသာ၊ ချောင်းမကြီးစသည့် ကျေးရွာ ဒေသခံများ ဘေးလွတ်ရာသို့ထွက်ပြေးနေရကြောင်းသတင်းရရှိသည်။
စစ်တပ်က ဧပြီ ၁၁ ရက်တွင် YAK-130 ဖြင့် ပေါင် ၅၀၀ ဗုံး ၂ လုံးကျဲချပြီး MI-35 ရဟတ်ယာဥ်များဖြင့်ပစ်ခတ်တိုက်ခိုက်၍ ပြည်သူ ၁၆၈ ဦး သေဆုံးပြီး ဒဏ်ရာရသူ ၇၀ ဦးခန့်ရှိခဲ့သည်။
