ကျေးရွာအပေါ် ဒရုန်းဖြင့် ဗုံးချတိုက်ခိုက်၍ ပြည်သူနှစ်ဦးလည်း ဒဏ်ရာရ
ကျေးရွာအပေါ် ဒရုန်းဖြင့် ဗုံးချတိုက်ခိုက်၍ ပြည်သူနှစ်ဦးလည်း ဒဏ်ရာရစစ်ကိုင်းတိုင်း၊ ရွှေဘိုမြို့နယ်တွင် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ကျေးရွာများအား လက်နက်ကြီး၊လက်နက်ငယ်များ၊ ဒရုန်းများဖြင့် ပစ်ခတ်တိုက်ခိုက်ခဲ့၍ သံဃာတော်တစ်ပါး ပျံလွန်တော်မူကာ ဒေသခံပြည်သူနှစ်ဦးလည်း ဒဏ်ရာရရှိကြောင်း ဒေသခံများက ပြောသည်။
ဧပြီ ၁၉ ရက် ညနေ ၆နာရီခန့်က ရွှေဘိုမြို့မှ ထွက်ခွာလာသော စစ်ကောင်စီတပ်သည် ရွှေဘို – ဆိပ်ခွန်လမ်းမပေါ်တွင် လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်ခဲ့သည်။
ထိုသို့ပစ်ခတ်မှုကြောင့် ကင်းဗျားကျေးရွာရှိ ဒက္ခိဏာရာမကျောင်းတိုက်မှ သက်တော်(၆၄)နှစ်ရှိ ဆရာတော်ဦးကောသလ္လအား ထိမှန်ခဲ့ပြီး ပျံလွန်တော်မူခဲ့ကြောင်း ဒေသခံများက ပြောသည်။
စစ်ကောင်စီတပ်သည် ယနေ့အထိ အဆိုပါလမ်းပိုင်းရှိ ချီပါတံတားပေါ်တွင် ဘန်ကာများဆောက်လုပ်ကာ စစ်ဆေးမှုများပြုလုပ်နေ၍ ပြည်သူများအနေဖြင့် ရွှေဘို – ဆိပ်ခွန်လမ်းပိုင်းအား အသုံးမပြုကြရန် ဒေသကာကွယ်ရေးအဖွဲ့များက သတိပေးသည်။
Public Service Announcement
“မန္တလေးပြန်ဖို့ကို ကားနဲ့ထွက်တာ လမ်းကနေလှည့်ပြန်လာရတာ နှစ်ခါရှိပြီ။ ဘယ်လိုမှသွားမရသေးဘူး။”ဟု ရွှေဘိုနယ်အနောက်ခြမ်းတွင် နေထိုင်သူအမျိုးသားတစ်ဦးက ပြောသည်။
အလားတူ ယနေ့ (ဧပြီလ ၂၂ ရက်) နံနက်ပိုင်းကလည်း ရွှေဘိုနယ်အရှေ့ခြမ်း၊ မန်ကျည်းသုံးပင်ကျေးရွာကို စစ်ကောင်စီတပ်က မီးရှို့ဖျက်ဆီးပြီး ပုလဲသွယ်ကျေးရွာကို ဒရုန်းဖြင့်ဗုံးသီးချတိုက်ခိုက်ခဲ့ရာ ဒေသခံနှစ်ဦး ဒဏ်ရာရရှိခဲ့ကြောင်း ဒေသတွင်း ကင်းထောက်ရဲဘော်များက ပြောသည်။
(ရွှေဘိုမြို့ရှိ အထက်တန်းကျောင်းရှေ့တွင် လုံခြုံရေးယူနေသည့် စစ်ကောင်စီတပ်သားများအား တွေ့ရစဥ်။ ဓာတ်ပုံ – Cj)
