အာဏာသိမ်းစစ်ကောင်စီတပ် မပြုတ်မချင်း တော်လှန်ရေးကို စွန့်ခွာမည်မဟုတ်ကြောင်း မင်းတပ်မြို့နယ် ချင်းကာကွယ်ရေးတပ်(CDF) စစ်ဦးစီးချုပ်ထန်ချွန်းဖေက ကတိပြုပြောကြား သည်။
ယမန်နေ့ (ဧပြီ ၂၄ရက်) ကျရောက်သည့် မင်းတပ် CDF တော်လှန်ရေး (၂)နှစ်ပြည့် အထိမ်းအမှတ်အဖြစ် စစ်ဦးစီးချုပ်က မိန့်ခွန်းပြောကြားခဲ့ရာ မင်းတပ် CDFက ယနေ့ ရုပ်သံမှတ်တမ်းကို ဖော်ပြခဲ့သည်။
“တကယ်တော့ လက်နက်ကိုင်ပြီး ခုခံတော်လှန်တယ်ဆိုတာ တော်တော်ခက်ခဲကြမ်းတမ်းတဲ့ခရီးပဲဖြစ်ပါတယ်။ ခေတ်အဆက်ဆက် အာဏာသိမ်းမှုအောက်မှာ အဆင်းရဲဆုံး ပြည်နယ်အဖြစ် ရှိနေခဲ့တဲ့ကျနော်တို့ ချင်းပြည်လိုဒေသမျိုးမှာ ပိုပြီးတော့ခက်ခဲကြမ်းတမ်းခဲ့ပါတယ်။ ဒါပေမဲ့ ရဲဘော်တွေရဲ့ လုံး၀အရှုံးမပေးတဲ့ ပြတ်ပြတ်သားသား အမြစ်ဖြတ်တော်လှန်မယ်ဆိုတဲ့ ပြင်းထန်တဲ့ တော်လှန်ရေးစိတ်ဓာတ်နဲ့ ပြည်တွင်း၊ပြည်ပရှိ မိဘညီအကိုမောင်နှမတွေရဲ့ ပံ့ပိုးဝိုင်းရံ ရပ်တည်ပေးမှုကြောင့် နှစ်နှစ်တာကာလကို အကောင်းဆုံးကျော်ဖြတ်နိုင်ခဲ့ပါတယ်” ဟု မင်းတပ် CDF စစ်ဦးစီးချုပ်က ပြောသည်။
နှစ်နှစ်တာအတွင်း ရဲဘော် ၅၅ဦး ကျဆုံးကာ ထိခိုက်ဒဏ်ရာရသူများလည်းရှိခဲ့ကြောင်း၊ ထို့အ ပြင် အကြမ်းဖက်စစ်တပ်၏ ဖမ်းဆီးသတ်ဖြတ်ခြင်းကြောင့် ပြည်သူများစွာ၏ အသက်အိုးအိမ်စည်းစိမ် ဆုံးရှုံးခဲ့ရပြီး ဒေသခံပြည်သူ ၁၀၀ နီးပါးဖမ်းဆီးခံခဲ့ရကြောင်း ၎င်းက ဆိုသည်။
Public Service Announcement
“ဒါပေမဲ့ အကြမ်းဖက် စစ်တပ်မပြုတ်မချင်းဘယ်တော့မှ တော်လှန်ရေးကို စွန့်ခွာမှာ မဟုတ်ပါဘူး” ဟု စစ်ဦးစီးချုပ် ထန်ချွန်းဖေက ပြောသည်။
မင်းတပ် CDF အနေဖြင့်ချမှတ်ထားသည့် မူဝါဒလမ်းစဉ်များနှင့်အညီ (၁)အာဏာရှင်စနစ် အမြစ်ပြတ် ပျက်သုဉ်းရေး၊ (၂)ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး၊(၃) ချင်းတစ်မျိုးသားလုံး၏ မွေးရာပါ ရပိုင်ခွင့် အခွင့်အရေးများအပြည့်အ၀ရရှိရေး၊(၄) ချင်းတမျိုးသားလုံး၏ ကိုယ်ပိုင်အုပ်ချုပ်ခွင့် ကိုယ်ပိုင်ပြဌာန်းခွင့်နှင့် ကိုယ်ပိုင်တရားစီရင်ခွင့်အပြည့်အ၀ ရရှိရေး ၊(၅) အမျိုးသားတန်းတူညီမျှမှု တည်ဆောက်ရေးနှင့် (၆) ချင်းတမျိုးသားလုံးစည်းလုံးညီညွတ်ရေး စသည့် အန္တိမ ပန်းတိုင်ရောက်ရှိသည်အထိ မဆုတ်မနစ်ကြိုးစားရမည်ဖြစ်သည်ဟု ဆိုသည်။
“ဒီပန်းတိုင် ရောက်ရှိဖို့အတွက်ဆိုရင် ကျစ်လစ်ခိုင်မာ အင်အားရှိပြီး စစ်သည်တော်ကျင့်ဝတ်တွေကို လေးစားလိုက်နာတဲ့တပ်ဖွဲ့တစ်ခုဖြစ်လာဖို့လိုအပ်ပါတယ်။ ဒီလိုတပ်ဖွဲ့ ဖြစ်လာဖို့ ပြည်သူလူထု အားလုံးကလည်း မခိုမကပ်ဘဲ ဝိုင်းဝန်းကူညီ ပံ့ပိုးပေးဖို့လိုအပ်ပါတယ်။ ဒါမှ သာ တပ်ဖွဲ့ရဲ့ ပင်မတာဝန်ဖြစ်တဲ့ ပြည်သူလူထုရဲ့ အကျိုးစီးပွားကို အမှန်တကယ် ကာကွယ်နိုင်တဲ့ တပ်ဖွဲ့ဖြစ်လာပြီး တာဝန်ကိုကျေပွန်စွာ ထမ်းဆောင်နိုင်မှာ ဖြစ်ပါတယ်”ဟု မင်းတပ် CDF စစ်ဦးစီးချုပ်က ပြောသည်။
မင်းတပ် CDFအနေဖြင့် မဟာမိတ်ကဏ္ဍနှင့်ပတ်သက်ပြီး ပြည်သူလူထုများ စိုးရိမ်ပူပန်မှုများ မရှိကြရန်လည်း အသိပေးခဲ့သည်။
“ဒီမဟာမိတ် ကဏ္ဍအတွက်လည်း ပြည်သူလူထုအနေဖြင့် စိုးရိမ်မှုမရှိဘဲ ယုံကြည် စွာ ရပ်တည်ပေးကြဖို့ တိုက်တွန်းလိုပါတယ်။ ကျနော်တို့သည် စစ်ရေးနိုင်ငံရေးအရ ဆက်စပ်နေတဲ့ ဒေသတော်လှန်ရေးအင်အားစုတွေနဲ့လည်း လက်တွဲအလုပ်လုပ်ရမှာလည်းဖြစ်ပါတယ်။ ထို့အတူ ချင်းတမျိုးသားလုံးစည်းလုံးညီညွတ်ရေးအတွက်လည်း တက်ကြွစွာ ပူးပေါင်းဆောင်ရွက်ရမှာ ဖြစ်ပြီး ချင်းကာကွယ်ရေးတပ်ဖွဲ့ -မင်းတပ် ရဲ့ ရပ်တည်ချက်အတိုင်း မည်သည့်အဖွဲ့အစည်း ပုဂ္ဂိုလ်၏ လွှမ်းမိုးမှုမျိုးကို မဆို ရှောင်ရှားကာ အပြန်အလှန် လေးစားမှုနှင့်တူ လက်တွဲလုပ်ဆောင်ရမှာ ဖြစ်ပါတယ်”ဟု စစ်ဦးစီးချုပ်က ပြောသည်။
မင်းတပ် CDF၏ တော်လှန်ရေး (၂)နှစ်ပြည့်သို့ အမျိုးသားညီညွတ်ရေးအစိုးရ(NUG) အပါအဝင် တော်လှန်ရေးအဖွဲ့များစွာက ဂုဏ်ပြုသဝဏ်လွှာပေးပို့ခဲ့ရာ ရက္ခိုင့်တပ်တော်(AA) အာလဖာ(၃) စစ်ဒေသကလည်း သဝဏ်လွှာပေးပို့ခဲ့သည်။ AA အာလဖာ(၃)စစ်ဒေသ၏ သဝဏ်လွှာတွင် အိမ်နီးနားချင်းကောင်း မိတ်ဖက်အဖွဲ့အစည်းအဖြစ် အပြန်အလှန် နားလည်မှု၊ယုံကြည်မှု၊ ဖေးမကူညီမှုများနှင့်အတူ အကောင်းဆုံး ရပ်တည်ပေးမည်ဟု ဖော်ပြခဲ့သည်။
