မိုးဗြဲမြို့ကို စစ်ကောင်စီတပ် လက်နက်ကြီး ပစ်ခတ်၍ အရပ်သားတစ်ဦးသေဆုံးပြီး နှစ်ဦးဒဏ်ရာရ

ရှမ်း – ကယား(ကရင်နီ)ဒေသအစပ် မိုးဗြဲမြို့ကို စစ်ကောင်စီတပ်က လက်နက်ကြီးဖြင့်ပစ်ခတ်၍ အရပ်သားတစ်ဦး သေဆုံးပြီး နှစ်ဦးဒဏ်ရာရရှိကြောင်း မိုးဗြဲ PDFက ထုတ်ပြန်သည်။

ယနေ့(ဇွန် ၃ ရက်) နံနက် ၆နာရီခန့်တွင် မိုးဗြဲမြို့အခြေစိုက် ခမရ(၄၂၂)တပ်က မိုးဗြဲမြို့ပေါ်သို့ တာဝေးပစ်လက်နက်ကြီးများဖြင့် ငါးကြိမ်ထက်မနည်း ပစ်ခတ်ခဲ့ခြင်းဟု ဆိုသည်။

စစ်ကောင်စီတပ်မှ ပစ်ခတ်သည့် လက်နက်ကြီး ကြောင့် ပွဲကုန်း(၂)ရပ်ကွက်နေထိုင်သည့် အသက် (၂၂)နှစ်အရွယ် အမျိုးသားတစ်ဦးမှာ နေအိမ်ရှေ့ တံမျက်စည်းလှည်းနေစဥ် ကျည်စထိမှန်ကာ သေဆုံးခဲ့သည်။

“ဘာတိုက်ပွဲမှ မရှိဘူး။အရပ်သားတွေ နေထိုင်တဲ့ မြို့တွင်းကို အကြောင်းမဲ့ပစ်တာ။အဲဒီလို လက်နက်ကြီးတွေနဲ့ပစ်တာ မနေ့ကကတည်းက။ဒီနေ့ တော့ သေဆုံးဒဏ်ရာရတာတွေ ရှိလာတာ”ဟု မိုးဗြဲမြို့ခံတစ်ဦးက လူထုနွေဦးသို့ ပြောသည်။

Public Service Announcement

မိုးဗြဲမြို့ လမ်းမကြီးဘေးတွင် စက်သုံးဆီရောင်းနေသော ဆီဆိုင်တစ်ဆိုင်မှာလည်း စစ်ကောင်စီ ၏ လက်နက်ကြီး​ကျရောက်ပေါက်ကွဲကာ မီးလောင်သွားခဲ့သည်။

ဆိုင်ကယ်ဆီလာထည့်နေသောပြည်သူ နှစ်ဦးမှာလည်း ထိခိုက်ဒဏ်ရာရရှိခဲ့ကာ ဆိုင်ကယ်(၂)စီး မီးလောင်သွားခဲ့ရသည်။

မိုးဗြဲတွင် စစ်ရေးအခြေအနေတင်းမာမှုများကြောင့် မိုးဗြဲကိုဖြတ်သန်းသွားလာသော ပြည်သူများ နှင့် စစ်ဘေးရှောင်ပြည်သူများအနေဖြင့် မိမိ၏လုံခြုံရေးကို အထူးဂရုပြုကြရန် မိုးဗြဲ PDFက တိုက်တွန်းသည်။