စစ်ကောင်စီ၏ထောက်ပို့လေယာဥ်မှကျဲချခဲ့သည့်ခဲယမ်းအချို့ကို သိမ်းဆည်းရရှိခဲ့ကြောင်း ဒီးမော့ဆိုမြို့နယ် ပြည်သူ့ကာကွယ်ရေးတပ်ဖွဲ့ တာဝန်ရှိသူကPeople’s Spring သတင်းဌာနသို့ပြောသည်။
စစ်ရေးအရပြင်းထန်နေသည့်ကရင်နီ(ကယား)ပြည်နယ်၌ စစ်ကောင်စီကမြေပြင်၊ဝေဟင်မှတဆင့်အင်အားများဆက်တိုက်တိုး၍ ထိုးစစ်ဆင်နေပြီး ခဲယမ်းများကိုလည်းလေကြောင်းမှ ပို့ဆောင်စဥ်ခဲယမ်းအချို့ကို ကရင်နီပူးပေါင်းတပ်က ယခုရက်သတ္တပတ်အတွင်း ရရှိခဲ့ခြင်းဖြစ်သည်။
“ဒီးမော့ဆို အနောက်ခြမ်းမှာလည်းရသလိုအရှေ့ခြမ်းမှာလည်းရတာရှိတယ်။လက်ရှိစစ်ရေးအရအတိအကျမပြောလိုဘူး”ဟု အထက်ပါတာဝန်ရှိသူကရှင်းပြသည်။
ယနေ့ ကရင်နီစစ်ရေးသတင်းရင်းမြစ်များထံမှ ထွက်ပေါ်လာသည့် ရုပ်သံဖိုင်မှတ်တမ်းအရ ကရင်နီပူးပေါင်းတပ်က ဖွင့်ဖောက်စစ်ဆေးကာ ၄၀ မမ ဗုံးသီး အလုံး ၅၀ ပါသည့်သေတ္တာကိုတွေ့ရှိသည်။
Public Service Announcement
လက်ရှိတွင် စစ်ကောင်စီကကရင်နီပြည်နယ်သို့ ရှမ်း ပြည်နယ်အခြေစိုက်တပ်ရင်းများပို့ဆောင်ထားပြီး အထူးသဖြင့် ဖယ်ခုံ၊ဒီးမော့ဆို၊ရွာသစ်၊ဖားဆောင်း မြို့နယ် သို့ တပ်ရင်း ၆ ရင်းခန့် ရောက်ရှိနေပြီ ဟု ကရင်နီစစ်ရေးသတင်းရင်းမြစ်က အသိပေးသည်။
“ဒီးမော့တို အနောက်ခြမ်း နန်းမယ်ခုံ ဘက်မှာ တပ်ရင်း တစ်ရင်းစာပို့နေတယ်။ဖားဆောင်းမှာဆိုတပ်ရင်းနှစ်ရင်းဝင်နေပြီ၊ရွာသစ်ဘက်ကတော့ အထူးစစ်ဆင်ရေး အနေနဲ့ စကစ ဘက်က ဝင်နေတာရှိတယ်။တိုက်ပွဲလည်း နေ့စဥ်နီးပါးဖြစ်နေတယ်”ဟု ၎င်းက ရှင်းပြသည်။
ဇွန်လ ဒုတိယပတ်က မယ်စဲ့မြို့နှင့် မယ်စဲ့မြို့နယ်ကို ကရင်နီပူးပေါင်းတပ်က သိမ်းဆည်းထိန်းချုပ်လိုက်ပြီးနောက်ပိုင်း ကရင်နီဒေသ၌ နေ့စဥ်နီးပါးတိုက်ပွဲများဖြစ်ပွားနေသည်။
ထို့အတူ အာဏာသိမ်းစစ်ကောင်စီတပ်ကို တော်လှန်ရာတွင် အောင်မြင်မှုများစွာရရှိနေသော ကရင်နီဒေသကို စစ်ကောင်စီက လေကြောင်း အပြင် တပ်မ ၅၅ ၊ တပ်မ ၆၆ ၊ တပ်မ ၄၄၊တပ်မ ၉၉ အစရှိသည့် တပ်မ လေးခု အပြင် ရှမ်းပြည်နယ် အခြေစိုက် အမှတ် (၂ ) စစ်ဆင်ရေးကွပ်ကဲမှုဌာနချုပ် (စကခ ၂)၊(စကခ ၁၈) လက် အောက်ခံတပ်ရင်းများပါ အသုံးပြု၍ ထိုးစစ်ဆင်နေခြင်းဖြစ်သည်။သို့သော် ကရင်နီပူးပေါင်းတပ်များ၏ ခုခံတိုက်ခိုက်မှု ၊တန်ပြန်ထိုးစစ်ကြောင့် ကရင်နီတွင် စစ်ကောင်စီတပ်အထိနာနေသည်။
