▪︎မိုင်းထိစစ်အုပ်စုက ပြည်သူနှစ်ဦး သတ်ဖြတ်သွားဟုဆို
မန္တလေးတိုင်း၊ မြင်းခြံမြို့နယ်၊ တောင်ပုံကျေးရွာအနီးတွင် စစ်ကောင်စီတပ်၏ ယာဥ်နှစ်စီးကို သုံးကြိမ်မိုင်းဆွဲတိုက်ခိုက်ရာ စစ်သားများထိခိုက်သေဆုံးနိုင်ပြီး ၎င်းတို့က ပြည်သူနှစ်ဦးကို သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့(ဇူလိုင် ၁၆ရက်) နံနက် ၈နာရီခန့်က မြင်းခြံမြို့နယ်၊ မီးပေါက်ရွာမှ တောင်ပုံကျေးရွာသို့ ထွက်လာသည့် အင်အား ၂၀ကျော်ပါ စစ်ကောင်စီတပ်စစ်ကြောင်းနှင့် ထိတွေ့တိုက်ပွဲ နှစ်ကြိမ်ဖြစ်ပွားခဲ့ကြောင်း Mgn 35 ပြောက်ကျားတပ်ဖွဲ့က ပြောသည်။
“ကျွန်တော်တို့ကင်းထုတ်ထားတဲ့ ရဲဘော်တွေနဲ့တွေ့ပြီး ပစ်ခက်တိုက်ပြီး သူတို့က စစ်ကြောင်း နှစ်ကြောင်းခွဲထိုးလာတာနဲ့ ကင်းစောင့်ရဲဘော်တွေ နောက်ပြန်ဆုတ်ပေးပြီး ကျွန်တော်တို့ တပ်ဆုတ်လိုက်တယ်။ တောင်ပုံရွာထဲဝင်ပြီးနောက် သူတို့က ကင်းထွက်လာတယ် ငါးကောင်က။ ထွက်လာတဲ့ ငါးကောင်ကို (၄၀)မမ နှစ်လုံးပစ်ပြီး လက်နက်ငယ်နဲ့ပါပစ်ခတ်ပြီး တိုက်ပွဲငယ်ဖြစ်တယ်။”ဟု Mgn 35 ပြောက်ကျားတပ်ဖွဲ့ခေါင်းဆောင် ဗိုလ်နွေမိုက်က ပြောသည်။
ထို့နောက် နံနက် ၉ နာရီကျော်တွင် မြင်းခြံမြို့မှ အင်အားထပ်ဖြည့်ရန်လာသည့် ယာဥ်နှစ်စီးကို မိုင်း ၁၂လုံးဖြင့် သုံးကြိမ်မိုင်းဆွဲတိုက်ခိုက်ခဲ့ရာ စစ်သားအများအပြား သေဆုံးနိုင်ကြောင်း Mgn 35 ပြောက်ကျားတပ်ဖွဲ့က ဆိုသည်။
Public Service Announcement
“မြင်းခြံဘက်က Canter တစ်စီးနဲ့ မီးခိုးရောင်မှန်လုံတစ်စီး တပ်ကူလာချိန် ကျွန်တော်တို့ကြိုတင်ပြင်ဆင်ထားတဲ့ ထိန်ပန်းရွာနဲ့ ရွာသစ်ရွာကြားမှာရှိတဲ့ မိုင်း၁၅လုံးပွိုင့်ထဲဝင်လို့ မိုင်း၁၂ လုံးခွဲ တိုက်ခိုက်ခဲ့တာ Canter ကားပေါ်ပါ ၂၁ကောင်မှာ ၁၇ကောင်သေပြီး လေးကောင်ပဲကျန်တယ်”ဟု ဗိုလ်နွေမိုက်က ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုများအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
အဆိုပါ စစ်ကောင်စီတပ်သည် အထိနာ၍ မိုင်းထိရာ အနီးဝန်းကျင်ရှိ ကွမ်းခြံလုပ်နေသော ပြည်သူ နှစ်ဦးကို ပစ်သတ်သွားခဲ့ကြောင်း ဒေသခံများက ပြောသည်။
မိုင်းဆွဲတိုက်ခိုက်မှုကြောင့် ကားများပါပျက်စီးမှုရှိပြီး ထိခိုက်သေဆုံးသူများအား တောင်ပုံကျေးရွာတွင်းသို့ သယ်ဆောင်သွားကြောင်း ဒေသခံများက ပြောသည်။
ဇူလိုင်၈ရက်ကလည်း နွားထိုးကြီးမြို့နယ် ပဲကြီးခင်းကျေးရွာအနီးတွင် မြင်းခြံမြို့နယ်မှ စစ်ကောင်စီတပ်နှင့် ဒေသတွင်းတော်လှန်ရေးအင်အားစုများ တိုက်ပွဲဖြစ်ပွားခဲ့ပြီး စစ်အုပ်စုထိခိုက်မှုရှိခဲ့သည်။
