တော်လှန်ရေးလုပ်ငန်းစဉ်များကို အမြင်ကျယ်ကျယ်ဖြင့် ချဲ့ထွင်ရန် ယမန်နေ့က ပြုလုပ်သည့် အမျိုးသားညီညွတ်ရေးအစိုးရအဖွဲ့ အစည်းအဝေးတွင် အစိုးရအဖွဲ့ဝင်များကို ယာယီသမ္မတဒူဝါလရှီးလက မှာကြားခဲ့သည်။
စစ်ကောင်စီက ကျပ်နှစ်သောင်းတန် ရိုက်နှိပ်ဖြန့်ချိမည့် အကျိုးဆက်ကြောင့် တိုင်းပြည်အတွင်း ငွေကြေးဖောင်းပွ မှုဒဏ်ကို ပြည်သူလူထုက အလူးအလဲ ခံနေရခြင်းနှင့်ပတ်သက်ပြီး ယာယီသမ္မတက ပြောကြားရာ၌ ပြည်သူလူထုကို ကာကွယ်နိုင်ရေး ဆောင်ရွက်ရန် ယခုကဲ့သို့ မှာကြားခဲ့ခြင်းဖြစ်သည်။
“လူထုဟာ ငွေကြေးဖောင်းပွမှုဒဏ်အကြားမှာ ထိုက်တန်တဲ့ ခံစားခွင့်တွေ ဆုတ်ယုတ်ပျက်စီးလာတာကို တွေ့ရပါတယ်။ စစ်ကောင်စီဟာ နိုင်ငံခြားငွေ ဖြည့်တင်းရေးကိစ္စကိုလည်း ရတတ်သမျှ နည်းလမ်းနဲ့ ကြံဆနေတာကို တွေ့ရတယ်။ ဒါဟာလည်း တိုင်းပြည် တိုးတက်ဖို့ ရည်ရွယ်ချက်နဲ့ လုပ်နေတာ မဟုတ်ပါဘူး။ စစ်လက်နက်အင်အားကို ဖြည့်ပြီး ပြည်သူကို ဖိနှိပ်ဖို့အတွက်ပဲ ဆိုတာ ထင်ရှားပါတယ်။ မြန်မာစစ်တပ်ဟာ စစ်ရေးအသုံးစရိတ် လိုအပ် ချက် အလွန်အမင်း ကြီးမားလာတာကိုလည်း တွေ့ရပါတယ်။ ဒီလိုအပ်ချက်ကို ဖြည့်ဖို့အတွက် ပြည်သူ ဆီက သွယ်ဝိုက်သောနည်းနဲ့ ဂုတ်သွေးစုတ် အမြတ်ထုတ်တာကို နည်းအမျိုးမျိုးနဲ့ လုပ်နေပါတယ်။ အဲသည့်ထဲမှာ ဆေးမြှီးတိုနည်းဖြစ်တဲ့ ငွေကြေးရိုက်နှိပ်တဲ့နည်းကလည်း တစ်ခုအပါအဝင် ဖြစ်ပါတယ်”ဟု ၎င်းက ပြောသည်။
အမျိုးသားညီညွတ်ရေးအစိုးရ၏ အဓိကလုပ်ငန်းတာဝန်သည် ပြည်သူ့၏အသက်အိုးအိမ် စည်းစိမ်ကို ကာကွယ်စောင့်ရှောက်ပေးရန်ဖြစ်သည်ဟုဆိုသည်။
Public Service Announcement
“အခုအခြေအနေတွေကို ကြည့်လိုက်ရင် ပြည်သူရဲ့ အိုးအိမ်စည်းစိမ်ကို ဖျက်လိုဖျက်စီး လုပ်နေတာဟာ စစ်ကောင်စီပဲ ဖြစ်တယ်။ ဒီတော့ စစ်ကောင်စီကို အမြစ်ပြတ် ချေမှုန်းနိုင်ရေးဟာ ပြည်သူလူထုရဲ့ အသက်အိုးအိမ်စည်းစိမ်ကို ကာကွယ်စောင့်ရှောက်တာနဲ့ တိုက်ရိုက်သက်ဆိုင်နေပါတယ်။ ” ဟု ယာယီသမ္မတက ပြောသည်။
အတိတ်သမိုင်းကို ကြည့်ပါက စစ်အစိုးရအဆက်ဆက်ဟာ “ကြုံသလို ကြည့်-ကြပ်-လုပ် ပေါ်လစီ” မျိုးဖြင့် လူထုအရေးကို လက်လွှတ်စပယ် လုပ်ခဲ့ခြင်းများကို အကြိမ်ကြိမ် တွေ့ခဲ့ရသည်ဟုဆိုသည်။
“အခုလည်းဘေးထွက် ဆိုးကျိုးကို နားမလည်ဘဲ၊ ကျပ်ငွေ (၂) သောင်းတန် ငွေကြေးရိုက်နှိပ်တာမျိုးကို လုပ်နေတာ တွေ့ရပါတယ်။ လူထုဟာ နေ့စဉ် စားဝတ်နေရေး စရိတ်စက ကြီးမားတဲ့ ဝန်ကို ထမ်းနေရပါတယ်။ ဒါ့ကြောင့် ကျွန်တော်တို့ အမျိုးသားညီညွတ်ရေးအစိုးရ အဖွဲ့ဝင်တွေအနေနဲ့ ပိုပြီး အမြင်ကျယ်ကျယ်နဲ့ တော်လှန်ရေးလုပ်ငန်းစဉ်တွေကို ချဲ့ထွင်ဖို့ လိုပါတယ်။ အခုဆိုရင် ကျွန်တော်တို့ အစိုးရအနေနဲ့ “နွေဦးဖွံ့ဖြိုးရေးဘဏ်” ကို တရားဝင် ဖွင့်လှစ်ပြီးပါပြီ။ ဆက်လက် လုပ်ဆောင်ရမယ့် ကိစ္စတွေကိုလည်း ဝိုင်းဝန်းလုပ်ဆောင်ကြရပါလိမ့်မယ်” ဟု ယာယီသမ္မတက ပြောကြားသည်။
နွေဦးဖွံ့ဖြိုးရေးဘဏ်၏ ဖြစ်တည်မှုသည် မြန်မာကျပ်ငွေ၏ မခိုင်မာမှုကို အစားထိုးပေးနိုင်မယ့် လူထု မျှော်လင့်ချက်ဖြစ်သင့်ကြောင်း ယာယီသမ္မတက ပြောသည်။
“တကယ်တော့ လူထုဟာ ကျပ်ငွေအပေါ်မှာ မှီခိုအားထား နေရပါတယ်။ ဒါ့ကြောင့် လူထုလုပ်အားတွေကို ကျပ်ငွေ မတည်ငြိမ်မှုက ဖျက်စီးလိုက်သလိုမျိုး မဖြစ်အောင် ကျွန်တော်တို့ ဘက်က ခေတ်မှီဘဏ္ဍာရေးမဟာဗျူဟာတွေနဲ့ အကာအကွယ်ပြုပေးဖို့ လိုပါတယ်။ အဲသည့်လို အကာအကွယ် ပြုနိုင်ဖို့အတွက် ယခုလက်ရှိ နွေဦးဖွံ့ဖြိုးရေးဘဏ်က တည်ဆောက်နေတဲ့ ဘဏ္ဍာရေးစနစ်အပေါ်ကို လူထု ယုံကြည်မှု ပိုရလာဖို့ လိုအပ်ပါတယ်။ ဒီလို လုပ်နိုင်ဖို့အတွက် နိုင်ငံရေးအရလည်း ကျွန်တော်တို့က စည်းရုံး လှုံ့ဆော်ဖို့ လိုသလို၊ လက်တွေ့ အကျိုးခံစားခွင့်ကို သိသိသာသာ ပြနိုင်အောင်လည်း ကြိုးစားရပါလိမ့်မယ်” ဟု ယာယီသမ္မတက ပြောသည်။
ပြည်သူများ၏ အကျိုးစီးပွားကို ကာကွယ်စောင့်ရှောက်ပေးသူကိုသာ ပြည်သူက ယုံကြည်စွာ အပ်နှံလေ့ရှိကြောင်း ၎င်း ကဆိုသည်။
“ဒါ့ကြောင့် လူထုရဲ့လုပ်အားတန်ဖိုးတွေကို လေထဲမှာ အလိုအလျောက် ဆုံးရှုံးတာမျိုး မဖြစ်စေဖို့၊ ကျပ်ငွေ အပေါ် အမှီသဟဲ မပြုတဲ့ ဘဏ္ဍာရေးစနစ်မျိုးကို ကျွန်တော်တို့ အနေနဲ့ စနစ်တကျ တည်ဆောက်ပေးရပါလိမ့်မယ်။ ဒါမှသာလျှင် စစ်ကောင်စီရဲ့ လက်အောက်ကလွတ်တဲ့ ဘဏ္ဍာရေးရပ်ဝန်းကို ပြည်သူတွေက ခံစားခွင့်ရမှာ ဖြစ်ပါတယ်။” လို့ ယာယီသမ္မတ ဒူဝါလရှီးလက ပြောသည်။
ပြည်ထောင်စုဝန်ကြီးချုပ် မန်းဝင်းခိုင်သန်းကလည်း စစ်ကောင်စီအနေဖြင့် ပိုက်ဆံရိုက်ထုတ်ပြီး တိုင်းပြည်၏ ငွေကြေးတန်ဖိုးကို အောက်ဆုံးအထိ ဆွဲချရန် ပြင်ဆင်နေကြောင်း ပြောသည်။
“အတ္တကြီးလွန်းသူတွေ အုပ်ချုပ်ဖို့ ကြိုးစားနေတဲ့ တိုင်းပြည်တွေမှာ ပြည်သူတွေ ဟာ ဘက်ပေါင်းစုံက အထိနာနေကြဦးမှာပဲ ဖြစ်ပါတယ်။ အခုဆိုရင် စစ်ကောင်စီဟာ သူတို့ဇာတ် သူတို့မနိုင်တော့ဘဲ အချင်းချင်း ဖမ်းဆီးတာတွေ ပြုလုပ်လိုက်၊ လူအပြောင်းအလဲတွေ လုပ်လိုက်နဲ့ မကောင်းမှု ပြုထားသူတွေဟာ ကိုယ့်အရိပ်တောင် ကိုယ်ပြန်ကြောက်ပြီး ဘယ်သူမှ မယုံနိုင်အောင် ဖြစ်နေတဲ့အခြေအနေကို ရောက်နေရပြီ ဖြစ်ပါတယ်”ဟုလည်း ပြည်ထောင်စုဝန်ကြီးချုပ်က ပြောကြားသည်။
