တောင်ဥက္ကလာပတွင် ယမန်နေ့ညက ပြည်သူခြောက်ဦးဖမ်းဆီးခံရ၊ ဓားစာခံဖမ်းဆီးမှုလည်းရှိ

တောင်ဥက္ကလာပမြို့နယ်တွင် ယမန်နေ့ညက ပြည်သူခြောက်ဦးကို အကြမ်းဖက်စစ်ကောင်စီကဖမ်းဆီးခဲ့ပြီး ည ၉ နာရီခန့်တွင် နှစ်ဦးပြန်လွှတ်ပေးခဲ့ကြောင်း ဒေသခံများက ပြောသည်။

လိုက်လံဖမ်းဆီးမှုများကို တောင်ဥက္ကလာ (၄)ရပ်ကွက် ၊(၅) ရပ်ကွက်နှင့် (၇) ရပ်ကွက်တို့တွင် အကြမ်းဖက်စစ်ကောင်စီမှ ကျူးလွန်ခဲ့ခြင်းဖြစ်သည်ဟု ဒေသသတင်းရင်းမြစ်တစ်ခုဖြစ်သည့် SouthOkkala News က ဖော်ပြသည်။

(၄)ရပ်ကွက်အတွင်းဖမ်းဆီးမှုတွင် သုတ (၇)လမ်းရှိ နေအိမ်တစ်အိမ်သို့ဝင်ရောက်ရှာဖွေစဉ် သားဖြစ်သူအားမတွေ့သောကြောင့် အသက် ၅၅ နှစ်အရွယ် မိခင်ကို ဖမ်းဆီးသွားကြောင်း ဒေသခံတစ်ဦးက ပြောသည်။

အလားတူ (၅) ရပ်ကွက်ရှိ တကောင်း (၉) လမ်းမှ သားအမိနှစ်ဦးအား ဖမ်းဆီးခဲ့သည့်အပြင် သရေခေတ္တရာ (၂၂) လမ်းရှိ အမျိုးသမီးတစ်ဦးနှင့် ၎င်းငှားရမ်းနေထိုင်သည့်နေအိမ်ပွဲစားနှစ်ဦးကိုပါ ဖမ်းဆီးခဲ့သည်။ ထိုဖမ်းဆီးမှုမှ အိမ်ပွဲစားနှစ်ဦးကို ည ၉ နာရီခန့်တွင် ပြန်လွှတ်ပေးခဲ့ကြောင်း သိရသည်။

Public Service Announcement

တောင်ဥက္ကလာ (၇) ရပ်ကွက်ရှိ ရှင်သိဒ္ဓိ (၉) လမ်းနှင့် မင်းရဲကျော်စွာ (၉) လမ်းများသို့ စစ်ကောင်စီတပ်များ ဝင်ရောက်ရှာဖွေဖမ်းဆီးရန် ပြုလုပ်ခဲ့သော်လည်း သက်ဆိုင်သူများမှာ ကြိုတင်တိမ်းရှောင်ခဲ့သောကြောင့် ဖမ်းဆီးခံရခြင်းမရှိခဲ့ဟု ဒေသခံများက ပြောသည်။

တောင်ဥက္ကလာပမြို့နယ် (၁၁)ရပ်ကွက် ရတနာလမ်းရှိ မြသီတာအိမ်ယာဝင်းအတွင်း ယမန်နေ့နေ့လယ်ပိုင်းက ရာအိမ်မှူးတစ်ဦးသေနတ်ဖြင့်ပစ်ခတ်ခံရကာ ပစ်ခတ်သူတဦးဖမ်းဆီးခံခဲ့ရပြီးနောက် ယင်းမြို့နယ်အတွင်း ဖမ်းဆီးမှုများဆက်တိုက်ရှိခဲ့သည်။