စစ်ကောင်စီတပ်သားတစ်ဦး ခဲယမ်းနှင့် ကျည် များယူလာပြီး အလင်းဝင်လာကြောင်း ချင်းအမျိုးသားကာကွယ်ရေးတပ်(CNDF) ပြောရေးဆိုခွင့်ရှိသူ ဆလိုင်းကျုံးငိုင်းက ပြောသည်။
စစ်ကိုင်း – ချင်းအစပ် ကလေး- ဖလမ်း လမ်းပိုင်းရှိ စစ်ကောင်စီ၏ ထင်းရှုးတပ်စခန်းမှ တပ်သား တစ်ဦးသည် စက်တင်ဘာ ၂၈ရက်တွင် အလင်းဝင်လာခြင်းဖြစ်သည်ဟု ဆိုသည်။
“ကြာဿပတေးနေ့က ထင်းရှုးစခန်းကနေပြီးတော့ ပြေးလာတာဗျ။ လက်နက်တော့ မပါဘူး။ ဗုံး နှစ်လုံးရယ်၊(၄၀)မမ ကျည် နှစ်တောင့်ရယ်။နောက်ပြီးတော့ ကျည် ၃၄၅တောင့်ပါတယ်”ဟု ဆလိုင်းကျုံးငိုင်းက ပြောသည်။
ထို့အပြင် စစ်တပ်အာဏာသိမ်းပြီးနောက် လက်နက်နှင့်အတူ ခိုလှုံလာသည့် တပ်သား ၈ဦးခန့်ရှိပြီဖြစ်ကြောင်းလည်း ၎င်းက ဆိုသည်။
Public Service Announcement
“သတင်းစကားပါးချင်တာက ရှေ့ဆက်ပြီးတော့ မင်းအောင်လှိုင် စစ်အစိုးရဟာ အာဏာရှင်စနစ်ဟာ ပြုတ်ကျတော့မှာဖြစ်တဲ့အတွက် စစ်ကောင်စီတပ်သားတွေ အနေနဲ့ ပြည်သူလူထုဘက် အမြန်ဆုံး ပါဝင်ပြီး အလင်းဝင်ကြပါလို့ ဖိတ်ခေါ်ချင်ပါတယ်” ဟု ဆလိုင်းကျုံးငိုင်းက ပြောသည်။
CNDF သည် ချင်းပြည်နယ် ဖလမ်းမြို့နယ်အတွင်း အခြေစိုက်ပြီး ဖလမ်းမြို့နယ်နှင့် ဆက်စပ်ဒေသများ၌ စစ်ကောင်စီတပ်ကို တိုက်ခိုက်လျက်ရှိသည်။
