ကချင်ပြည်နယ် မိုးမောက်မြို့နယ် အောင်ဂျာ စစ်ကောင်စီတပ်စခန်းအား တိုက်ခိုက်သိမ်းပိုက်ပြီးနောက် ရှေ့တန်းစစ်မြေပြင်ရှိ ကချင်လွတ်လပ်ရေးတပ်မတော်(KIA) စစ်သည်များအား သွားရောက်အားပေးခဲကြောင်း ကချင်လွတ်လပ်ရေးအဖွဲ့(KIO) ခေါင်းဆောင်တစ်ဦးဖြစ်သည့် ဒုတိယ ဗိုလ်ချုပ်ကြီးဂွန်မော်က ယမန်နေ့ညတွင် အသိပေးခဲ့ပြီးနောက် ရှေ့တန်းစစ်မြေပြင်ရောက် ဗိုလ်ချုပ်ဂွန်မော်၏ ဓာတ်ပုံအချို့ လူမှုကွန်ယက်၌ ပျံ့နှံ့လာသည်။
အောက်တိုဘာ ၂၀ရက်တွင် အောင်ဂျာဒေသ စစ်ကောင်စီစခန်းကို KIAနှင့် မဟာမိတ်အဖွဲ့များက တိုက်ခိုက်သိမ်းပိုက်ပြီးနောက် KIO၏ အုပ်ချုပ်ရေးဆိုင်ရာ ကချင်လွတ်လပ်ရေးကောင်စီ(KIC) ဒုဥက္ကဋ္ဌ ဗိုလ်ချုပ်ဂွန်မော်က အောက်တိုဘာ ၂၃ရက်တွင် အောင်ဂျာဒေသ စစ်မြေပြင်ကို သွားရောက်ခဲ့ခြင်းဖြစ်သည်။
အောင်ဂျာဒေသစစ်မြေပြင်ရဲဘော်များကို သွားရောက်အားပေးခဲ့ကြောင်း ဗိုလ်ချုပ်ဂွန်မော် အသိပေးရာ၌ ရှေ့တန်းရောက်၎င်း၏ ဓာတ်ပုံကို အဝေးမှ နောက်ကြောဘက်မှ ရိုက်ကူးထားသည့် ပုံကိုသာ ဖော်ပြခဲ့ရာ ယနေ့ညနေပိုင်း၌ ကချင်အမည်ဖြင့် Facebook သုံးစွဲသူတစ်ဦးက ဗိုလ်ချုပ်ဂွန်မော်အား ကတုတ်ကျဉ်းများအနီး လက်ညိုးညွှန်နေသည့် အနီးကပ်ပုံကို ဖော်ပြလာခြင်းဖြစ်သည်။
ယခု နှစ်ဇူလိုင်လတွင် စစ်ကောင်စီတပ်က ထိုးစစ်ဆင်လာပြီးနောက် သုံးလကျော်ကြာ တိုက်ပွဲများ ပြင်းထန်ခဲ့သည့် အောင်ဂျာဒေသတွင် အောက်တိုဘာ ၂၀ရက် စခန်းသိမ်းတိုက်ပွဲပြီးနောက် စစ်ကောင်စီတပ်သားများ လုံး၀မရှိတော့ကြောင်း ကချင်စစ်ရေးသတင်းရင်းမြစ်က ပြောသည်။
Public Service Announcement
တိုက်ပွဲပြင်းထန်နေသည့် အချိန်၌ပင် အဆိုပါဒေသကို KIAနှင့် မဟာမိတ်များက စိုးမိုးထိန်းချုပ်ထား၍ စစ်ကောင်စီအနေဖြင့် မြေပြင်မှ ရိက္ခာ ခဲယမ်းဖြည့်တင်းနိုင်ခြင်းမရှိဘဲ လေကြောင်းမှ လေထီးဖြင့် ရိက္ခာ ခဲယမ်းများ ချပေးခဲ့ရသည့် အခြေအနေဖြစ်သည်။
စခန်းအသိမ်းမခံရရေး လေကြောင်း၊ လက်နက်ကြီး ပစ်ကူများ အကြိမ်ကြိမ် ပေးခဲ့ရသည့်တိုင် စစ်ကောင်စီအနေဖြင့်အရေးပါသော အထိုင်စခန်းကို လက်လွှတ်ဆုံးရှုံးခဲ့ရခြင်းဖြစ်သည်။
