ပခုက္ကူမြို့တွင် စစ်ကောင်စီယာဥ်တန်းကို တော်လှန်ရေးအဖွဲ့သုံးဖွဲ့ပူးပေါင်း၍ မိုင်းခွဲတိုက်ခိုက်

မကွေးတိုင်း ပခုက္ကူမြို့တွင် ယမန်နေ့ညနေက အကြမ်း ဖက်စစ်ကောင်စီ၏ ရာထူးကြီးပိုင်းပါဝင်သောခရီးစဥ်ယာဥ်တန်းဟုယူဆရသော စစ်ကောင်စီယာဥ်တန်းအား နယ်ခံ PDFများပူးပေါင်းကာ မိုင်းခွဲတိုက်ခိုက်ခဲ့ကြသည်။

အောက်တိုဘာ ၇ ရက် ညနေ ၅နာရီခွဲခန့်က ပခုက္ကူမြို့ရှောင်လမ်းသို့ ဝင်ရောက်လာသော လူကြီးခရီးစဥ်ဟု ယူဆရသည့် စစ်ကောင်စီတပ် ယာဥ်၈စီးပါယဥ်တန်းအား ဒေသခံ PPDF ၏အကူအညီဖြင့် B.G.F-Myingyan နှင့် Seven PDF တို့က မိုင်းခွဲတိုက်ခိုက်ခဲ့ကြောင်း အဆိုပါအဖွဲ့များက သတင်းထုတ်ပြန်သည်။

ဗုံးပေါက်ကွဲမှုဖြစ်ပွားကြောင်းသိရပြီး ထိခိုက်မှုအခြေ အနေ မသိရသေးကြောင်း ပခုက္ကူဒေသခံတစ်ဦးက ပြောသည်။

အထက်ပါ အဖွဲ့ သုံးဖွဲ့ ပူးပေါင်းကာ ပခုက္ကူ၊ မြင်းခြံ နယ်တစ်ဝိုက်ရှိ အာဏာလု စစ်ကောင်စီ နှင့် လက်ဝေခံအဖွဲ့ အစည်း၊ လူပုဂ္ဂိုလ်များအား ဆက်လက်၍လည်း ရှင်းလင်းတိုက်ခိုက်သွားမည် ဖြစ်ကြောင်း အဆိုပါအဖွဲ့များက သတိပေး ကြေညာသည်။

Public Service Announcement

စက်တင်ဘာ ၂၈ ရက် ညနေကလည်း ပခုက္ကူမြို့ အမှတ် ၁၀ ရပ်ကွက် ၊ ဗိုလ်ချုပ်လမ်းနှင့် အာဇာနည်လမ်းဆုံအနီးတွင် ကင်းလှည့်နေသည့် ရဲကားတစ်စီးကို ဆိုင်ကယ်တစ်စီးက လက်ပစ်ဗုံးနှင့်လှမ်းပစ်ခဲ့၍ ကားပေါ်ရှိ ရဲအချို့ ထိခိုက်ဒဏ်ရာရရှိခဲ့သည်။