စစ်ကိုင်းတိုင်း၊ ရွှေဘိုမြို့နယ်ရှိ စစ်ကောင်စီလက်အောက်ခံ ပျူစောထီးကျေးရွာများဖြစ်သော သီးလုံးရွာနှင့် မြင်းချင်းကျေးရွာတို့၌ မင်္ဂလာဆောင်ပွဲများပြုလုပ်နေစဥ် ဒရုန်းဖြင့် ဗုံးသီးချတိုက်ခိုက်ရာ နှစ်ဦးသေဆုံးပြီး ၂၀ကျော်ဒဏ်ရာရရှိကြောင်း သတင်းရရှိသည်။
ယမန်နေ့ (နိုဝင်ဘာ ၈ရက်) နံနက် ၇နာရီခွဲခန့်က ရွှေဘိုမြို့နယ်၊ သီးလုံးပျူစောထီးကျေးရွာနှင့် မြင်းချင်းပျူစောထီးကျေးရွာတို့အား ဒရုန်းဖြင့် (၆၀)မမ ဗုံးသီး ခြောက်လုံးကြဲချတိုက်ခိုက်ခဲ့ရာ ပျူစောထီး နှစ်ဦးသေဆုံးပြီး ၂၀ကျော် ဒဏ်ရာရရှိကြောင်း ဗိုလ်ကျားရိုင်းပြည်သူ့ကာကွယ်ရေးတပ်ဖွဲ့၏ ပြန်ကြားရေးတာဝန်ခံက ပြောသည်။
“နှစ်စီးကို တစ်စီးစီတစ်ရွာစီခွဲချတာ။ သီးလုံးတို့ မြင်းချင်းတို့ဆိုတာက ပျူတွေကြီး သပ်သပ်နေတဲ့ရွာ။ ပျူမဟုတ်တဲ့ ပြည်သူနဲ့ တော်လှန်ချင်သူတွေက ဘေးထွက်နေကြတာ”ဟု အထက်ပါတာဝန်ခံက ပြောသည်။
ထိခိုက်သေဆုံးသူများကို ရွှေဘိုဆေးရုံသို့ သယ်ဆောင်သွားကြောင်း သိရသည်။
Public Service Announcement
အဆိုပါစစ်ဆင်ရေးကို ဗိုလ်ကျားရိုင်းပြည်သူ့ကာကွယ်ရေးတပ်ဖွဲ့ – Wild Tiger LPDF ၊ Bo Ba Taw – SHWEBO LPDF အဖွဲ့၊ LIGHTNING DRONE FROCE ( We are everywhere) ၊ GOLDEN EAGLE-ZBG၊ ဗိုလ်ဂျပန်ကြီး – ရွှေဘို LPDF၊နဂါးနီ အာဠာဝက – ရွှေဘို LPDF၊တောင်သူကြီးများအဖွဲ့ ပြည်သူ့ကာကွယ်ရေးတပ်ဖွဲ့ တို့ပူးပေါင်းတိုက်ခိုက်ခဲ့ခြင်း ဖြစ်သည်။
အဆိုပါ ပျူစောထီးရွာနှစ်ရွာ၌ မင်္ဂလာဆောင်ပွဲများပြုလုပ်နေစဥ် ဒရုန်းဖြင့်တိုက်ခိုက်ခံရခြင်းဖြစ်ပြီး အမျိုးသားတစ်ဦးသေဆုံးကာ ၂ဝ ကျော် ဒဏ်ရာရရှိထားကြောင်း စစ်ကောင်စီ၏ တယ်လီဂရန်ချန်နယ်များတွင် ဝါဒဖြန့်နေသည်။
