စစ်ကိုင်းတိုင်း၊ ရွှေဘို – ကျောက်မြောင်းလမ်းပိုင်းတွင် စစ်ကောင်စီတပ်က ကင်းပုန်းများချပြီး ပစ်ခတ်နေ၍ ပြည်သူများသတိပြုသွားလာကြရန် ရွှေဘိုမြို့နယ်သတင်းအမှန်ပြန်ကြားရေးက သတိပေးသည်။
ယနေ့ (နိုဝင်ဘာ ၂၀ ရက်) နံနက် ၇နာရီ ၁၅ မိနစ်ခန့်မှစတင်ကာ ရွှေဘို-ကျောက်မြောင်း လမ်းပေါ်၌ ရွှေဘိုမြို့နှင့် ကျောက်မြောင်းမြို့နယ်မှ ထွက်လာသော စစ်ကောင်စီတပ်သားများသည်။
လမ်းတစ်လျှောက်တွင် ကင်းပုန်းများချ၍ လက်နက်ကြီး၊ငယ်များဖြင့် ရမ်းသမ်းပစ်ခတ်နေကြောင်း ရွှေဘိုမြို့နယ်သတင်းအမှန်ပြန်ကြားရေးက ထုတ်ပြန်သည်။
ထို့ကြောင့် ပြည်သူများအနေဖြင့် ရွှေဘို-ကျောက်မြောင်းလမ်းပိုင်းအား အရေးမကြီးပါက အသုံးမပြုရန် ရွှေဘိုမြို့နယ်သတင်းအမှန်ပြန်ကြားရေးအဖွဲ့က မေတ္တာရပ်ခံသည်။
Public Service Announcement
“ကားနဲ့ မြို့အထွက်တွေ ချသွားတာပါ။ဘယ်နေရာတွေပစ်တယ်ဆိုတာမျိုး တိတိကျကျတော့မရှိဘူး။ သူတို့မသင်္ကာတဲ့နေရာတွေကို ပစ်ခတ် တဲ့ပုံစံမျိုးပါ။”ဟု အထက်ပါအဖွဲ့ဝင်တစ်ဦးက ပြောသည်။
ရွှေဘို-ကျောက်မြောင်းလမ်းပိုင်းတွင် စစ်ကောင်စီတပ်သားများသည် ပြည်သူကားများအား ချောဆွဲခြင်း၊ လမ်းသွားလမ်းလာ ပြည်သူများအား မတရားသဖြင့် ဖမ်းဆီးရိုက်နှက်သတ်ဖြတ်ခြင်း၊ စစ်ကြောင်းရှေ့မှထား၍ မိုင်းကွင်းတိုးခိုင်းခြင်းနှင့် အကြောင်းမဲ့ သတ်ဖြတ်ခဲ့သော ပြည်သူရုပ်အလောင်းများကို ဓာတ်ပုံရိုက်၍ PDF ဟု စွပ်စွဲခြင်းများ ပြုလုပ်လေ့ရှိကြောင်း ရွှေဘိုမြို့နယ်သတင်းအမှန်ပြန်ကြားရေးက ထုတ်ပြန်ထားသည်။
