ကံထူးမနယ်မြေရဲစခန်းမှ ရဲတပ်သားတစ်ဦး လက်နက်နှင့်အတူ အလင်းဝင်လာ

စစ်ကိုင်းတိုင်း၊ တန့်ဆည်မြို့နယ်ရှိ ကံထူးမနယ်မြေရဲစခန်းမှ ရဲတပ်သားတစ်ဦး လက်နက်ခဲယမ်းများနှင့်အတူ အလင်းဝင်လာကြောင်း ရွှေဘိုခရိုင်တပ်ရင်း(၁၄)၊ ပြည်သူ့ကာကွယ်ရေးတပ်ဖွဲ့၏ တာဝန်ရှိသူက ပြောသည်။

နိုဝင်ဘာ ၉ ရက်က စစ်ကိုင်းတိုင်း အမှတ်(၁၆) လုံခြုံရေးရဲတပ်ဖွဲ့၊ တန့်ဆည်မြို့နယ်၊ ကံထူးမနယ်မြေရဲစခန်းမှ ရဲတပ်သားဝေဖြိုးကျော်သည် G4 သေနတ်တစ်လက်၊ ကျည်အတောင့် ၂၀၀ နှင့် အလင်းဝင်ရောက်လာခဲ့ပြီး ၎င်းအား ဆုချီးမြှင့်ရန်အစီအစဥ်ရှိကြောင်း ရွှေဘိုခရိုင်တပ်ရင်း (၁၄)၏ တာဝန်ရှိသူက ပြောသည်။

“သူ CDM ဝင်ချင်တာတော့ကြာပြီပေါ့။ လိုက်ချိတ်နေတာ ကျွန်တော်တို့တပ်ရင်းနဲ့ ချိတ်မိတော့ ကျွန်တော်တို့ သွားထုတ်လာတာပါ စခန်းကနေ။လက်နက်နဲ့တကွ အလင်းဝင်လာတဲ့အတွက် ထိုက်တန်တဲ့နှူန်းထားနဲ့ ဆုချီးမြှင့်ဖို့ရှိပါတယ်။”ဟု အထက်ပါတာဝန်ရှိသူက ပြောသည်။

အလင်းဝင်လာသည့် ရဲတပ်သားက PDFရဲဘော်များနှင့်အတူ ချက်ပြုတ်ခြင်း၊ ထမင်းစားခြင်း၊ စာဖတ်ခြင်း၊ ဂစ်တာတီးခြင်းများ ပြုလုပ်နေသည့်ရုပ်သံမှတ်တမ်းကိုလည်း ရွှေဘိုခရိုင်တပ်ရင်း (၁၄)က ထုတ်ပြန်ထားသည်။

Public Service Announcement

ရုပ်သံ၌ အလင်းဝင်လာသူ ရဲတပ်သားက”အမှားနဲ့အမှန်က ဒီအချိန်မှာ သိသိသာသာကြီးကို ပေါ်နေပါပြီ။ ဝင်လာမယ်ဆိုနောက်မကျသေးဘူး။”ဟု ဖြေကြားထားသည်။

အလင်းဝင်ရောက်လိုသူများအနေဖြင့် ဆက်သွယ်နိုင်ပြီး ဝင်ရောက်လာသော စစ်ကောင်စီတပ်သား၊ ရဲများကို ကူညီစောင့်ရှောက်ပေးသွားမည်ဖြစ်ကြောင်း ရွှေဘိုခရိုင်တပ်ရင်း(၁၄)က အသိပေးထားသည်။