ကသာမြို့နယ်တွင်ရပ်ကွက်၊ကျေးရွာ အုပ်ချုပ်ရေးမှူးအဖြစ်မှ နှုတ်ထွက်သူ ၂၇ ဦးရှိပြီး ၎င်းတို့အနက် လေးဦးမှာ ဟန်ပြ သက်သက်အဖြစ်နှုတ်ထွက်ထားကာ စစ်ကောင်စီဒလန်အဖြစ် ဆက်လက်လုပ်ကိုင်နေကြောင်း ပြည်သူ့ကာကွယ်ရေးတပ်ဖွဲ့ -ကသာက ယနေ့ ထုတ်ပြန်သည်။
“သတင်းပေးဒလန်လုပ်နေတဲ့အုပ်ကြီးလေးယောက်ရှိနေပါ သေးတယ်။ သူတို့ကတော့ မြို့ပေါ်ရပ်ကွက် ၅၊၇၊ ၉ နဲ့အောက်ဝဲကြီး ကျေးရွာအုပ်ကြီးတို့ဖြစ်ကြောင်းသတင်းရရှိထားပါတယ်။ သူတို့ရဲ့ အသက်ကိုတော့ အာမမခံတော့ဘူး”ဟု ပြည်သူ့ကာကွယ်ရေးတပ်ဖွဲ့ – ကသာက ဆိုသည်။
အောက်တိုဘာ ၁၀ ရက်မတိုင်ခင်အထိ ကသာ မြို့ရှိ အုပ်ချုပ်ရေးမှူးများနှုတ်ထွက်ရန် နှင့် မြို့ပေါ်ရပ်ကွက် အုပ်ချုပ်ရေးမှူးများအနက် အဆိုးဆုံးဒလန်လုပ်ခဲ့သည့် (၃၊ ၄၊ ၅၊ ၆၊ ၉၊ ၁၀၊ ၁၁) အုပ်ချုပ်ရေးမှူးများ ကသာမြို့ပေါ်မှ အပြီးတိုင်ထွက်ခွာသွားရန် ပြည်သူ့ကာကွယ်ရေးတပ်ဖွဲ့က သတိပေးထားသည်။ကသာမြို့နယ်တွင် မြို့ပေါ်ရပ်ကွက် ၁၁ ခု နှင့် ကျေးရွာအုပ်စု ၃၂ ခုရှိသည်။
အကြမ်းဖက်စစ်ကောင်စီ၏ အာဏာသိမ်းချိန်မှစ၍ ကသာမြို့နယ် အတွင်း မတရားဖမ်းဆီးခံရသူ ၅၃ ဦး၊သတ်ဖြတ်ခံရသူ ကိုးဦးရှိသည်။
Public Service Announcement
အလားတူမီးရှို့ ဖျက်ဆီးခံရမှုကြောင့် နေအိမ် အလုံး၃၀ ၊ကျေးရွာများရှိ စားနပ်ရိက္ခာများလုယက်ခံရမှု အကြိမ် နှစ်ဆယ်ထက်မနည်းရှိပြီး စစ်ဘေးဒုက္ခသည် ၂၀၀၀၀ ကျော်ရှိသည်ဟု ပြည်သူ့ကာကွယ်ရေးတပ်ဖွဲ့ -ကသာ ကထုတ်ပြန်သည်။
လက်ရှိတွင် ပြည်သူ့ကာကွယ်ရေးတပ်ဖွဲ့ -ကသာ မှာ တိုင်းရင်းသားလက်နက်ကိုင်အဖွဲ့ KIA နှင့် ပူးပေါင်း၍ အကြမ်းဖက်စစ်ကောင်စီကို ခုခံတော်လှန်တိုက်ခိုက်နေသည်။
