မိထက်/People’s Spring
ရခိုင်ပြည်နယ်နှင့် ဧရာဝတီတိုင်းနယ်စပ်နေရာအနီး တိုက်ပွဲဖြစ်ပွားနေစဉ် အာရက္ခတပ်တော်(AA)တပ်ဖွဲ့ဝင်များ ဧရာဝတီတိုင်းအတွင်းဝင်ရောက်လာနိုင်သည်ဆိုဟုကာ စစ်ကောင်စီက ဒေသခံများအား ဖမ်းဆီးစစ်ဆေးမှုများပြုလုပ်နေသည်။
AAနှင့် စစ်ကောင်စီသည် ရခိုင်ပြည်နယ် ဂွမြို့အနီး၌ တိုက်ပွဲများဖြစ်ပွားနေပြီး ယင်းအခြေအနေပေါ် စစ်ကောင်စီက စိုးရိမ်ထိတ်လန့်နေသည်ဟု ဧရာဝတီတိုင်းမှ တော်လှန်ရေးအင်အားစုအချို့က ပြောသည်။
” ဧရာဝတီတိုင်းက စစ်တပ်တွေနဲ့ ဌာနဆိုင်ရာတွေက AAကို တော်တော်လေးကြောက်တာ။ AAရဲ့ လက်စလက်နကို သူတို့သိတယ်။ အခုလည်း ဧရာဝတီထဲကို AAတွေ ဝင်လာတော့မယ်ဆိုပြီး သူတို့အချင်းချင်းကြားတောင် ကြောက်လန့်နေကြတယ်”ဟု ပုသိမ်မြို့ခံတစ်ဦးကပြောသည်။
Public Service Announcement
ဂွမြို့နယ်သည် ဧရာဝတီတိုင်း၊ငါးသိုင်းချောင်းမြို့နှင့် ထိစပ်နေသည်။ သံတွဲ၊ကျိန္တလီ၊ဂွမြို့နယ် တို့သည် တစ်ဆက်တည်းရှိနေပြီး အဆိုပါနေရာများ၌ စစ်ရေးတင်းမာနေသည်။
အဆိုပါမြိုများမှဒေသခံအများပြားမှာလည်း ဧရာဝတီတိုင်းသို့ လာရောက်ပြီး စစ်ဘေးရှောင်နေကြရသည်။ စစ်ဘေးရှောင်နေသူများအနက် ရခိုင်တိုင်းရင်းသားများကို ပစ်မှတ်ထား၍ စစ်ကောင်စီက ဖမ်းဆီးစစ်ဆေးမှုများပြုလုပ်နေသည်။
ငါးသိုင်းချောင်းမြို့အနီး ကျုံပျော်မြို့နယ်တွင် လာရောက်စစ်ဘေးတိမ်းရှောင်နေသည့် ရခိုင်တိုင်းရင်းသားများအနက် ၃၆ဦးကို ယခုရက်ပိုင်းအတွင်း စစ်ကောင်စီက ဖမ်းဆီးစစ်ဆေးနေကြောင်း မြို့ခံများက ပြောသည်။
” ဧည့်စာရင်းစစ်ရင်းနဲ့ဖမ်းသွားတာ။ ရခိုင်ဆိုတာနဲ့ AA လို့ဆိုပြီး ဖမ်းတာ။ ဧရာဝတီတိုင်းကစစ်ကောင်စီတပ်ဖွဲ့ဝင်တွေမှာ AAကြောက် ရောဂါ ရှိကြတယ်”ဟု ကျုံပျော်မြို့ခံတစ်ဦးကပြောသည်။
ထို့အပြင် ဧရာဝတီတိုင်းအတွင်းသို့ စစ်ရေးကျယ်ပျံ့လာမည်ကို စစ်ကောင်စီက စိုးရိမ်နေပြီး ရခိုင်ပြည်နယ်နှင့် ထိစပ်နေသော နယ်စပ်နေရာများကိုလည်း လုံခြုံရေးတင်းကြပ်ထားသည်။
ဧရာဝတီတိုင်းမှ ပြည်သူ့ကာကွယ်ရေးတပ်ဖွဲ့အချို့သည် AAထံတွင် စစ်သင်တန်းတက်ပြီး AAနှင့်တွဲ၍ တိုက်ပွဲဝင်နေကြောင်း တော်လှန်ရေးအင်အားစုများက ပြောသည်။
ဧရာဝတီတိုင်း၊ဟင်္သာတခရိုင်၊ မြန်အောင်မြို့နယ်၊ ကြံခင်းမြို့နယ်များသည် ရခိုင်ရိုးမနှင့် ထိစပ်နေပြီး ပြီးခဲ့သည့် ၂၀၂၄ ဇန်နဝါရီက တိုက်ပွဲများဖြစ်ပွားခဲ့ဖူးသည်။
