'/%3E%3C/svg%3E){kind=small}
မိထက်/ People’s Spring
လုံခြုံရေးကြောင့်ပိတ်ထားခဲ့သည့် မြိတ်-တနင်္သာရီ-ဘုတ်ပြင်းလမ်းပိုင်းကို ပြန်လည်သွားလာခွင့်ပြုလိုက်ပြီဟု တနင်္သာရီမြို့နယ် ပြည်သူ့ကာကွယ်ရေးအဖွဲ့မှ သတင်းထုတ်ပြန်သည်။
လမ်းပိုင်းတစ်လျှောက်တိုက်ပွဲများဖြစ်ပွားနေ၍ မြိတ်-တနင်္သာရီ-ဘုတ်ပြင်း ပြည်ထောင်စုလမ်းမကြီးအသုံးပြုမှုကို ဧပြီလ ပထမလပတ်မှစ၍ ပြည်သူ့ကာကွယ်ရေးတပ်ဖွဲ့များက သွားလာခွင့်ကန့်သတ်ခဲ့ခြင်းဖြစ်သည်။
Public Service Announcement
ယနေ့(ဩဂုတ်လ ၁၅ရက်) မှစတင်၍ ခရီးသွားပြည်သူများ ပြန်လည်သွားလာခွင့်ရပြီဟု တနင်္သာရီမြို့နယ် ပြည်သူ့ကာကွယ်ရေးအဖွဲ့ကပြောသည်။
“ခရီးသည်များ၊ ကုန်ကားများ သွားလာရန် ပြန်လည်ခွင့်ပြုလိုက်ပါပြီ။ခရီးသည်များအနေဖြင့် တော်လှန်ရေးအဖွဲ့များ၏ လုံခြုံရေးအရ စစ်ဆေးမှုကို ပူးပေါင်းဆောင်ရွက်ပေးကြရန် နှင့် ကုန်ကားများအနေဖြင့် မိုးကာပိုင်းများ အလုံပိတ် ကာရံထားခြင်းများ (လုံးဝ) မပြုလုပ်ကြရန် တားမြစ်ထားပါတယ်။ယင်းလမ်းပေါ် သွားလာသည့်ကားများအားလုံးသည် တံခါးမှန်များ ချထားပြီးမှသာ မောင်းနှင်ကြရန်ဖြစ်ပြီး စစ်ရေးလိုအပ်ချက်အရ သွားလာခြင်းကို ခေတ္တတားဆီးရန် လိုအပ်လာပါက အတိအကျပူးပေါင်းဆောင်ရွက်ပေးကြပါရန် အသိပေးအပ်ပါတယ်”ဟု တနင်္သာရီမြို့နယ် ပြည်သူ့ကာကွယ်ရေးအဖွဲ့ တာဝန်ရှိသူတဦးကပြောသည်။
တနင်္သာရီတိုင်းတွင် မြို့နယ်အချို့၌တွင် ဩဂုတ်လ ပထမလပတ်က တိုက်ပွဲပြင်းထန်ခဲ့ပြီးပုလောမြို့နယ်၊ မီးလောင်ချောင်းကျေးရွာရှိ စစ်ကောင်စီနှင့်ပျူစောထီး ပူးပေါင်းစခန်းကိုပြည်သူ့ကာကွယ်ရေးတပ်မတော်(ပုလော)၊ မြိတ်ခရိုင်အမှတ်(၁)တပ်ရင်း၊ ကရင်အမျိုးသားကာကွယ်ရေးတပ်(KNDO)တပ်ရင်း(၇)၊ ပုလောမြို့နယ်ပြည်သူ့ကာကွယ်ရေးတပ်ဖွဲ့(ပ.က.ဖ)နှင့် တော်လှန်ရေးမဟာမိတ်တပ်ဖွဲ့များက တိုက်ခိုက်သိမ်းယူခဲ့သည်။
