ဇေအောင်/People’s Spring
ပြီးခဲ့သည့် သြဂုတ်လအတွင်း ဒုဗိုလ်မှူးကြီး သုံးဦးအပါအဝင် စစ်ကောင်စီတပ်ဖွဲ့ဝင် ၄၁ဦး အလင်းဝင်လာကြောင်း အမျိုးသားညီညွတ်ရေးအစိုးရ(NUG)၏ ကာကွယ်ရေးဝန်ကြီးဌာနက အသိပေး ထုတ်ပြန်သည်။
ဒုဗိုလ်မှူးကြီး သုံးဦး၊ ဗိုလ်မှူး နှစ်ဦး၊ ဗိုလ်ကြီး နှစ်ဦး၊ ဗိုလ် သုံးဦးနှင့် တပ်သားနှင့်ရဲ အပါအဝင် ၄၁ ဦးသည် ပြည်သူ့ရင်ခွင်အကောင်အထည်ဖော်ဆောင်မှု ဗဟိုကော်မတီနှင့် ကာကွယ်ရေးဝန်ကြီးဌာန ကွပ်ကဲမှုအောက်ရှိ PDF တပ်ရင်းများ၊ ပကဖများထံ ဆက်သွယ်ကာ ပြည်သူ့ရင်ခွင် ခိုလှုံခဲ့ကြောင်း ကာကွယ်ရေးဝန်ကြီးဌာနက အသိပေးသည်။
အဆိုပါ ၄၁ ဦးအနက် လက်နက်နှင့်တကွ ပြည်သူ့ရင်ခွင် ခိုလှုံလာသူများလည်းရှိပြီး လက်နက်မျိုးစုံ ၁၉ လက်နှင့် ခဲယမ်း မီးကျောက်များ ရရှိခဲ့ကြောင်း၊ လက်နက်ယူဆောင်လာသူများကို သတ်မှတ်ထားသည့် လက်နက်တန်ဖိုးအလိုက် ဂုဏ်ပြုချီးမြှင့်ငွေများ ပေးအပ်ခဲ့ကြောင်း ကာကွယ်ရေးဝန်ကြီးဌာနက ထပ်မံ အသိပေးသည်။
Public Service Announcement
အာဏာသိမ်း စစ်တပ်၏ စစ်မှုထမ်းအမိန့်ကြေညာချက်ကြောင့် အတင်းအဓမ္မ လူသစ်စုဆောင်းခံရသူများ အပါအဝင် ပြည်သူ့ဘက်ရပ်တည်လိုသည့် တပ်သားနှင့်ရဲများ အနေဖြင့် ပြည်သူ့ရင်ခွင် တယ်လီဂရမ် @MyanmarPeople (သို့) နီးစပ်ရာ PDF၊ ပကဖများနှင့် မဟာမိတ် တိုင်းရင်းသား တော်လှန်ရေးအဖွဲ့အစည်းများကို ဆက်သွယ် ချိတ်ဆက်ကာ ပြည်သူ့ရင်ခွင်ခိုလှုံကြရန် NUG၏ ကာကွယ်ရေးဝန်ကြီးဌာနက တိုက်တွန်းထားသည်။
” ဖရဲသီးအဖြစ် တာဝန်ထမ်းဆောင်ပါမယ်လို့အဆိုပြုလာတဲ့ တပ်မတော်သားတွေ၊ ရဲတွေလည်းတော်တော်များများရှိပါတယ်။ သူတို့ကိုတော့ မူရင်းနေရာတွေမှာပဲ ဆက်လက်တာဝန်ထမ်းဆောင်ပြီးတော့ပဲ ဖရဲသီးအဖြစ် သတင်းပေးပို့ဖို့ ညွှန်ကြားထားတားတာ ရှိပါတယ်။”ဟု NUG ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူ ဦးမောင်မောင်ဆွေက ပြောသည်။
ဦးမောင်မောင်ဆွေက ဆက်လက်ပြီး “မြန်မာနိုင်ငံအလယ်ပိုင်းကနေ ဝင်ရောက်လာတာတော်တော်များပါတယ်။ နောက်လည်းပြည်သူ့ရင်ခွင်ကို ဝင်ရောက်ဖို့ချိတ်ဆက်နေကြတဲ့အရာရှိကြီးတွေ၊ အရာရှိတွေလည်း အမြောက်အများရှိပါတယ်။ သူတို့ကိုလည်း စနစ်တကျ စိစစ်ပြီးတော့ ပြည်သူ့ရင်ခွင်ကိုခေါ်ဆောင်နိုင်ဖို့ အကြမ်းဖက်စစ်တပ်ကို စွန့်ပြီးတော်လှန်ရေးမှာ ပူးပေါင်းပါဝင်ဖို့ ဆက်လက်လုပ်ဆောင်နေပါတယ်။”ဟု ပြောသည်။
ထို့အပြင် ကျန် စစ်ကောင်စီတပ်ဖွဲ့ဝင်များအနေဖြင့် စစ်ကောင်စီအောက်ဆက်နေပါက သေရုံမှလွဲ၍ အခြားမရှိသောကြောင့် ပြည်သူ့ရင်ခွင်ခိုလှုံကာ အမြန်ဆုံးပူးပေါင်းရန်လည်း တိုက်တွန်းထားသည်။
