'/%3E%3C/svg%3E){kind=small}
သားကြီး/People’s Spring
ရှမ်းပြည်နယ်မြောက်ပိုင်း၊ မူဆယ်မြို့၌ ယနေ့ (စက်တင်ဘာ ၂၃ရက်) ည ၁၁နာရီခန့်တွင် စစ်ကောင်စီတပ်နှင့် ပြည်သူ့စစ်တပ်ဖွဲ့များတိုက်ပွဲထပ်မံဖြစ်ပွားနေပြီး သေနတ်သံများဆူညံနေကြောင်း ဒေသခံအချို့က ပြောသည်။
မူဆယ်မြို့ (၄၅)ကုန်းဘက်တွင် တိုက်ပွဲဖြစ်နေခြင်းဟု မြို့ခံတစ်ဦးက ပြောသည်။
Public Service Announcement
” အတွဲလိုက်တွေ ပစ်တာ။ ဆူညံနေတာပဲ။မနက်က တိုက်ပွဲအဆက်က အခု ၄၅ ကုန်းမှာ ဆက်ချနေတာ”ဟု မြို့ခံတစ်ဦးက ပြောသည်။
ယနေ့ နံနက်က မူဆယ်မြို့ မင်္ဂလာမူဆယ်အိမ်ယာရှိ ကျားဖြန့်ရုံတစ်ရုံတွင် စစ်ကောင်စီနှင့် မန့်ဘိမ်း ပြည်သူ့စစ်တပ်ဖွဲ့များ တိုက်ပွဲဖြစ်ပွားခဲ့သည်။
နေ့လည်ပိုင်းအထိ တိုက်ပွဲဖြစ်ခဲ့ပြီး စစ်ကောင်စီတပ် ထိခိုက်ဒဏ်ရာရသူအချို့ရှိပြီး ပြည်သူ့စစ်တပ်ဖွဲ့ဝင်အချို့သေဆုံးကြောင်း သိရသည်။
ကျားဖြန့်ရုံအတွင်းမှ အလုပ်သမားများကိုလည်း စစ်ကောင်စီက ဖမ်းဆီးသွားကြောင်း သတင်းရရှိသည်။
ယနေ့ညတိုက်ပွဲသည် နံနက်ပိုင်းတိုက်ပွဲအတွင်း ထွက်ပြေးသွားသည့် မန့်ဘိမ်းပြည်သူ့စစ်တပ်ဖွဲ့ဝင်များကို လိုက်လံရှာဖွေဖမ်းဆီးရာမှ ဖြစ်ပွားခြင်းဟု ဒေသခံအချို့က ပြောသည်။
မူဆယ်မြို့တွင် စစ်ကောင်စီလက်အောက်ခံပြည်သူ့စစ်အဖွဲ့ပေါင်း ၆ဖွဲ့ထက်မနည်းရှိပြီး ကျားဖြန့်လုပ်ငန်းလုပ်နေသည့် ပြည်သူ့စစ်တပ်များကို တရုတ်ဘက်က ဖမ်းဆီးခိုင်းရာမှ တိုက်ပွဲဖြစ်ပွားခြင်းဖြစ်သည်။။
မူဆယ်မြို့သည် ၁၀၂၇ စစ်ဆင်းရေးပထမပိုင်း၌ ညီနောင်သုံးဖွဲ့က တိုက်ခိုက်ရန် ပြင်နေစဉ် တရုတ်က ကြားဝင်ညှိနှိုင်းပေးခဲ့သည့် ဟိုင်ဂင်အပစ်ရပ်စာချုပ်ကြောင့် မတိုက်ခိုက်ဘဲ ကျန်နေသည့် မြို့ဖြစ်သည်။ တရုတ်နိုင်ငံနှင့် နယ်စပ်ကုန်သွယ်ရေးမြို့ဖြစ်ပြီး မူဆယ် ၁၀၅မိုင် ကုန်သွယ်ရေးဇုန်ကို တော်လှန်ရေးအင်အားစုများက ထိန်းချုပ်ထားသည်။
စစ်ကောင်စီသည် မြို့ပေါ်၌သာတပ်စွဲထားနိုင်ပြီး အုပ်ချုပ်ရေးယန္တရားလည်း ကောင်းမွန်စွာမလည်ပတ်တော့ကြောင်း ဒေသခံများကပြောသည်။
