Scorpio/People’s Spring
မန္တလေးမြို့မှာ ရောက်ရှိနေပြီး အိမ်ငှားနေကြတဲ့ စစ်ရှောင်မိသားစုတွေလကုန်ရက်တွေမှာမကြာခဏ စိတ်ညစ်ရတဲ့ကိစ္စတစ်ခုရှိပါတယ်။အဲဒါတော့ ငှားဖို့ အိမ်ရှာရတဲ့ကိစ္စပါ။
စစ်တပ်အာဏာသိမ်းမှု ၅ နှစ်ပြည့်ကာနီးအချိန် ရန်ကုန်၊ မန္တလေးအပါအဝင် မြို့ကြီးတွေမှာ စစ်ကိုင်း၊ မကွေးနဲ့ ရှမ်းမြောက်က စစ်ရှောင်တွေ ပိုပိုများလာခဲ့ပါတယ်။ အဲဒီစစ်ရှောင်ပြည်သူတွေဟာ မကြာမကြာ တက်နေတဲ့ အိမ်ငှားခတွေကြောင့် စိတ်ညစ်နေရတယ်လို့ မန္တလေးရောက် စစ်ရှောင်တွေက ပြောပါတယ်။
“အိမ်ငှားကခြောက် လတစ်ကြိမ်စျေးတက်တယ်”လို့ မန္တလေးရောက်နေတဲ့ ရှမ်းမြောက်က စစ်ရှောင်ပြည်သူတစ်ဦးက ပြောပါတယ်။
Public Service Announcement
တရိပ်ရိပ်စျေးတက်နေတဲ့မန္တလေးကအိမ်ငှားစျေးကွက်မှာ အိမ်ရှင်နဲ့ ပွဲစားတချို့ဟာ အိမ်ငှားခတွေ ရုတ်တရက်ထပ်တက်လိုက်တာမျိုး၊ လချုပ်ကိုမှ သက်တမ်းပိုချုပ်ခိုင်းတာတွေမျိုးတွေ ကြုံနေရတယ်လို့ စစ်ရှောင်တွေက ပြောပါတယ်။
“အခုကျမနေတဲ့အိမ်က သုံးလချုပ်ကို နှစ်သိန်း။ စစ်ရှောင်တွေဆင်းလာမှန်းသိလို့သုံးသိန်းနဲ့ ၆ လချုပ်ပြောင်းသွားတယ်။”လို့မန္တလေးမြို့မှာနေထိုင်နေတဲ့စစ်ရှောင်အမျိုးသမီးတစ်ဦးကပြောပါတယ်။
၆ လချုပ်ပြည့်သွားရင်လည်းနောက်ထပ်တခါထပ်ချုပ်ရင်စျေးတစ်မျိုးပြောင်းသွားတယ်လို့စစ်ရှောင်တွေက ဆိုပါတယ်။
နောက်ထပ် စစ်ရှောင်မိသားစုဝင်တွေ ထပ်ရောက်လာတာမျိုးဆိုရင်လည်း စျေးကိုထပ်တိုးတောင်းတာတွေကြုံရတယ်လို့ သိရပါတယ်။ အဲဒီလို လူဦးရေကို ကန့်သတ်ထားတာတွေကြောင့်လည်း စစ်ရှောင်တွေ မောရပြန်ပါတယ်။
“အစက၂ယောက်ထဲနေတာ။ ကလေးမွေးလို့ အိမ်ကလူ၂ယောက်လာနေတာ ကို လူများလာလို့ နှစ်သိန်းသုံးသောင်းကနေသုံးသိန်းခွဲအထိတက်တယ်။ မဖြစ်သာလို့သာနေနေရတာ။”လို့မန္တလေးမြို့ပေါ်မှာ တိုက်ခန်းငှားနေတဲ့စစ်ရှောင်အမျိုးသမီးတဦးက ပြောပါတယ်။
ဒါပေမဲ့အိမ်လခကိုတိုးမတောင်းတဲ့၊နားလည်ပေးတဲ့အိမ်ရှင်တွေလည်းအများအပြားရှိနေပါတယ်လို့ မန္တလေးရောက်စစ်ရှောင်ပြည်သူတွေကဆိုပါတယ်။
နောက်တစ်ခုက မန္တလေးရဲ့ သွားလာရေးစနစ်ပါ။ မန္တလေးမှာ ဘက်စ်ကားစနစ် မရှိတော့တာကြောင့် မီနီအိုးဝေလို့ခေါ်တဲ့ သုံးဘီးယာဥ်နဲ့သာ သွားလာရပါတယ်။ သုံးဘီးယာဥ်ဟာလည်း ဟိုနားဒီနား ငါးထောင်အထက်သာမို့ ဆိုင်ကယ်နဲ့ကားပါမလာရင် အိုးဝေခနဲ့မခံနိုင်ဘူးလို့ စစ်ရှောင်တွေက ပြောပါတယ်။
“မန္တလေးက အိမ်ငှားခနဲ့ အိုးဝေခနဲ့ လုံးဝအဆင်မပြေပါဘူး”လို့ဗန်းမော်ကနေလာတဲ့စစ်ရှောင်အမျိုးသမီးတဦးက ပြောပါတယ်။
ဒါကြောင့် စစ်ရှောင်တွေအနေနဲ့ မန္တလေးမြို့ထဲနေမယ့်အစား မန္တလေးတဝိုက်က ပုသိမ်ကြီး၊ အမရပူရ၊ မြစ်ငယ်၊ ကျောက်ဆည် စတဲ့နယ်တွေမှာ နေကြဖို့ကိုလည်း မန္တလေးမြို့ခံတွေက အကြံပြုပါတယ်။
နောက်တစ်ခုက အိမ်ငှားနေမယ့်အစား ဘုန်းကြီးကျောင်းတွေနဲ့ ရွာတွေဘက်မှာ ရှောင်ကြဖို့ ရောက်နှင့်ပြီးသား စစ်ရှောင်တွေက အကြံပြုကြပါတယ်။
ဒါပေမဲ့ ပြည်ကြီးတံခွန်မြို့နယ်ကိုတော့ အတက်နိုင်ဆုံး ရှောင်ကြဖို့ မန္တလေးမြို့ခံတွေကအကြံပြုပါတယ်။ “စစ်ရှောင်တွေဆို စစ်မှုထမ်းထည့်၊ ပေါ်တာဆွဲတယ်။နယ်ခံတွေတောင်မနေရဲလို့ပြောင်းပြေးနေကြတာ”လို့ပြည်ကြီးတံခွန်မြို့နယ်ဃ ရပ်ကွက်က ဒေသခံတစ်ဦးက ပြောပါတယ်။
မြန်မာနိုင်ငံမှာ လူဦးရေ ၃ ဒသမ ၆ သိန်းခန့်မှာ နေရပ်စွန့်ခွာ နေထိုင်နေရပြီး ဆက်လက်ဖြစ်ပွားနေတဲ့ ပဋိပက္ခတွေကြောင့် အိုးအိမ်စွန့်ခွာ ထွက်ပြေးရမှု ပိုများလာတယ်လို့ United Nations OCHA Myanmar က ပြီးခဲ့တဲ့ စက်တင်ဘာလက ထုတ်ပြန်ခဲ့ပါတယ်။မန္တလေးမြို့တင်မကဘဲရန်ကုန်အပါအဝင် အခြားဒေသအသီးသီးမှာ ရောက်နေကြရတဲ့ စစ်ရှောင်ပြည်သူတွေလည်း အိမ်ငှားရှာရတဲ့အခက်အခဲကို ရင်ဆိုင်နေရတယ်လို့ သိရပါတယ်။
“ကိုယ်မြို့ကိုယ့်ရွာလည်း ပြန်လို့မရတော့ အဆင်မပြေလည်း ပြေအောင်ကြိုးစားနေရတယ်။”လို့ ကောလင်းစစ်ရှောင် အမျိုးသမီးတစ်ဦးက ပြောလိုက်ပါတယ်။
