-စနေသားရေးသားသည်။
ကွင်းပြင်ကျယ်ထဲ ထီးထီးကြီး ရှိနေတဲ့ ရထား ဘူတာရုံအိုကလေးဆီ ချဉ်းကပ်မိပြီ ဆိုတာနဲ့ ရထားပေါ်မှာ အခုလိုစကားသံ တွေ ထွက်လာတတ်တာ၊ ရက်သတ္တပတ် တစ်ချို့ကြာနေပါပြီ။
“ဖုန်းတွေသိမ်းထားနော်၊ ဓာတ်ပုံမရိုက်ပါနဲ့၊ ဒီဘူတာကမကြိုက်ပါဘူး” ဆိုတဲ့စကားသံတွေ ပါ။
ရထားတွေပေါ် ကျင်လည် နေကျ ဈေးသည်တွေဆီအဲ့ဒီစကားသံ ကျယ်ကျယ်လောင်လောင် ကြား ရတတ်ပါတယ်။
Public Service Announcement
သူတို့လိုပဲ ရထား အမြဲစီးနေကြတဲ့ ခရီးသည်တွေကလည်း သူတို့အနီးအနား ရှိနေသူတွေကို ခပ်တိုးတိုး အခုလို သတိပေးကြပါ လိမ့် မယ်။
“ဖုန်းကိုသိမ်းထား၊ရထားပေါ်ထိကိုတက်ဆွဲတယ်” ဆိုတဲ့ စကားမျိုးပေါ့။
“ဟိုရက်က အဲကွန်းရထား ပေါ်မှာ ကောင်လေးတစ်ယောက်က အဲ့ဒီ ဘူတာကဖြတ်တော့ ဖုန်း ကိုင်ပြီးဂိမ်း ဆော့နေတာ၊အဲ့ဒါတွေ့ပြီးဘူတာကစစ်သားကရထားပေါ်အထိ တက်လိုက်လာပြီး ဖုန်းကိုစစ်တာ” လို့ မျက်မြင်ကြုံခဲ့ရတဲ့အမျိုးသားတစ်ဦးက ပြောပါတယ်။
“ခေါ်သွားတော့မှာလို့ပဲတွေးပြီး ရင်တွေတုန်နေတာ၊ ဖုန်းစစ်ကြည့်တော့ ဘာမှမတွေ့လို့ ထင်ပါတယ်၊ စစ်သားကနောက်ဘူတာကျမှပြန်ဆင်းသွားတယ်” လို့သူကဆက်ပြောပါတယ်။
နောက်ထပ်ကိုယ်တွေ့ကြုံခဲ့ရသူတစ်ယောက် ပြောပြတာကတော့ “ကောင်မလေးက ဖုန်းနဲ့ ရှုခင်းလေးတွေ ရိုက်နေတာပါ၊အဲ့ဒီအချိန်ရထားကဘူတာကပြန်ထွက်နေပြီ၊ရထားပါရပ်ခိုင်းပြီးခေါ်သွားတာပဲ” တဲ့။
ဒီဖြစ်စဉ်တွေအတိုင်း လူငယ်တစ်ချို့ ဖမ်းဆီး ခံရတယ်ဆိုတဲ့ သတင်းတွေလည်း ထွက်ခဲ့ပေမယ့်သူတို့ဘယ်လိုဆက်ဖြစ်သွားကြတယ်ဆိုတာတော့မသိရတော့ပါဘူး။အာဏာသိမ်းစစ်တပ်က သေနတ်ခါးကြားထိုး ဇွတ်အုပ်ချုပ်နေတဲ့အချိန်မှာ တရားဥပဒေစိုးမိုးရေးကမရှိသလို ၊ပြည်သူ့အခွင့်အရေးဆိုတာကလည်းမရှိတော့ ဖမ်းဆီးခံရသူတွေရဲ့နောက်ဆက်တွဲအခြေအနေတွေက သိရဖို့ခက်လှပါတယ်။
အခုစာရေးနေသူကိုယ်တိုင်ကြုံရတဲ့ဖြစ်စဉ်တစ်ခုမှာတော့ အထက်ကဖြစ်စဉ်တွေအတိုင်း ရှုခင်းဓာတ်ပုံရိုက်တဲ့မိန်းကလေးတစ်ယောက်ကို အာဏာသိမ်းစစ်တပ်ရဲ့ တပ်ကြပ်ကြီး အဆင့်ရှိတဲ့ စစ်သားက ဖုန်းယူစစ်ပြီး “ရှုခင်းမရိုက်နဲ့ ရှုခင်းလှ ဖို့မလိုဘူး၊လူလှဖို့ပဲလိုတယ်” ဆိုပြီးပြောခဲ့တာပါ။
မျက်မြင်တွေ့ခဲ့ရတဲ့ဖြစ်စဉ်မှာတော့ ဖုန်းကိုပြန်ပေးလိုက်သလို လူကိုလည်း ဖမ်းဆီးသွားတာမျိုးတော့မရှိပါဘူး။ အစောပိုင်းတုန်းက ရထားဆိုက်လာရင် မတ်တပ်ရပ် တိတ်တဆိတ်စောင့်ကြည့်ရုံပဲ နေတတ်ကြတဲ့ စစ်သားတွေဟာ အခုတော့ ပေါ်ပေါ်တင်တင် အော်ဟစ် အမိန့်ပေးတာမျိုးတွေ လုပ်နေကြပါပြီ။
“ဖုန်းတွေ မထုတ်နဲ့၊ဓာတ်ပုံမရိုက်နဲ့နော်” လို့ ဆိုတတ်ကြပါတယ်။ တရားဝင် စာချိတ်ပြီး သတိပေးထားတာမျိုး တော့မရှိပါဘူး။အဲ့ဒီတားမြစ်ချက်ဟာ စစ်အုပ်စုရဲ့ တရားဝင်အုပ်ချုပ်ရေးအမိန့်လား၊ဘူတာမှာလုံခြုံရေးချထားတဲ့ စစ်သား တွေပါးစပ်ထဲက အမိန့်လားဆိုတာလည်း မရှင်းလင်းပါဘူး။
သေချာတာကတော့ကိုယ်စီးလာတဲ့ရထား အဲ့ဒီဘူတာမှာဆိုက်ပြီဆိုရင် ရထားပေါ်ပါသူတွေအနေနဲ့ ဓာတ်ပုံ ရိုက်ရိုက်မရိုက်ရိုက်၊ လက်ထဲ ကဖုန်းကို အသာဖွက်လိုက်ရတာပါပဲ။
ဒီလိုဖြစ်စဉ်တွေရှိနေတဲ့နေရာဟာစစ်မက် ပဋိပက္ခတွေပြင်းထန်နေတဲ့ဒေသလည်းမဟုတ်၊ အဲ့ဒီလိုဒေသ မျိုး တွေနဲ့ နီးကပ်ထိစပ်မှုရှိတဲ့ ဒေသမျိုးမှာလည်းမဟုတ်ပါဘူး။
ပုံမှန်အားဖြင့် တိတ်ဆိတ်ခြောက်ကပ်ပြီး အထီးကျန်နေတတ်တဲ့ ရန်ကုန်မြို့က မြို့ပတ်ရထားဘူတာရုံလေးတစ်ခု မျှသာပါ။
“ဝေဘာဂီ” ဆိုတဲ့ ဆိုင်းဘုတ်ရယ်၊ ပြီးတော့ ဘူတာလျှောက်လမ်းပေါ်ကနေ ရထားပြတင်း ပေါက်တွေဆီကျီးကန်းတောင်းမှောက် အကြည့်နဲ့စစ်ဆေး နေကြတဲ့ လက်နက်ကိုင် စစ်သားနှစ်ယောက်သုံး ယောက်၊သူတို့နဲ့ အတူတွဲပြီး လုံခြုံရေးယူဆိုပြီး တာဝန်ပေးထားတယ်လို့ယူဆရတဲ့ ရထား၀န်ထမ်း တစ်ချို့ ရယ်ရှိနေကြတဲ့ သာမာန်မြို့ပတ် ဘူတာ လေးတစ်ခုပါပဲ။
အဲ့ဒီဘူတာရုံရဲ့နောက်ဖက် မလှမ်းမကမ်းက မို့မို့မောက်မောက်ကုန်းမြင့်မြင့်ကတော့ ရန်ကုန်လေဆိပ်ရဲ့အစိတ်အပိုင်း၊လေယာဉ်တွေမောင်းနှင်ဖြတ်သန်းကြတဲ့လမ်းကြောင်းတစ်ခုပါ။
များသောအားဖြင့် ခရီးစဉ်စဖို့ ပြေးလမ်း ပေါ်ကနေ အားယူပျံသန်းမယ့်လေယာဉ်တွေ အရှိန်စယူရမယ့် နေရာအထိ တစ်လိမ့်ချင်း လှိမ့်ရင်းမောင်းနှင်သွားကြတဲ့ လမ်းကြောင်း ဖြစ်ပါတယ်။
ဒီလမ်းကြောင်းရဲ့အနောက်ဘက်ခပ်လှမ်း လှမ်းမှာမှ လေယာဉ်တွေ စတင်အရှိန်ယူ ပျံသန်းကြရာ၊ ဆင်းသက်ကြရာတကယ့် လမ်းကြောင်းရှိနေတာပါ။အရပ်ဘက်ခရီးသည်တင်လေယာဉ်တွေအပြင် စစ်ဘက် လေယာဉ်တွေလည်း အဆင်း၊အတက်လုပ် ကြတာမို့ အခါအခွင့်သင့်ရင်စစ်လေယာဉ်တွေ အတက်အဆင်း လုပ်ကြတာကိုလည်း တွေ့ရ တတ်ပါတယ်။
တစ်ကယ်တော့ ဒီဘူတာမှာချေမိုးနေတဲ့ မျက်နှာပေး ခပ်ကြမ်းကြမ်း၊ ဆွဲလားရမ်းလား လုပ်ဖို့၀န်မလေးတဲ့ ဟန်အပြည့်နဲ့အဲ့ဒီလက်နက်ကိုင်စစ်သားတွေကိုတွေ့ရတာမကြာလှသေးပါဘူး။
မှတ်မှတ်ရရ ဆိုရင် လေယာဉ်ပြေးလမ်းပေါ်မှာ အတက်အဆင်းလုပ်နေတဲ့ လေယာဉ်တွေကို မကြာမကြာတွေ့နိုင်သလို မနီးမဝေး ဘေးကပ်ရက်မှာကားလမ်းကျဉ်းလေးတစ်ခုနဲ့ ရထား လမ်းတွေရှိနေတဲ့ ဝေဘာဂီ ဘူတာမှာ ရှုခင်းလှတယ်ဆိုပြီးလူမှုကွန်ရက်မှာ လူပြောများခဲ့ပြီးနောက်ပိုင်းမှအခုလိုတွေဖြစ်လာတာပါ။
“အုတ်ဖိုဘူတာ တကယ်လှတယ်” ဆိုတဲ့ AI သီချင်းထဲကအတိုင်း အုတ်ဖိုဘူတာ တကယ်လှ ၊မလှ မသိပေမယ့် ဝေဘာဂီဘူတာရဲ့ ရာသီဥတု သာယာချိန် မြင်ကွင်းကတော့ တကယ်ကို မျက်စိပသာဒ ဖြစ်စရာပါ။
ပြီးတော့ကလေးရှိသူတွေအဖို့ မြို့ပတ်ရထားလိုက်စီးရင်း ဝေဘာဂီဘူတာ ရောက်တဲ့အခါ လေယာဉ်တွေ ကိုလည်း တော်တော်လေးနီးနီးကပ်ကပ် ကြည့်ရှုလေ့လာခွင့်ပေးနိုင်တာဆိုတော့ တစ်ချက်ခုတ်နှစ်ချက်ပြတ်အနေနဲ့ ဝေဘာဂီဘူတာကို အလည်အပတ်သွားကြသူတွေနဲ့ တော်တော်လေးလေး စည်စည်ကားကား ရှိလိုက်ပါ သေးတယ်။
အဲ့ဒီနောက်ပိုင်းကစပြီး အခုလိုတင်းကျပ်မှုတွေပေါ်ပေါက်လာရတာပါ။အရင်က လက်မှတ်ရောင်းတဲ့ ဘူတာ ရုံရယ်၊ခရီးသည်တွေ ထိုင်နားဖို့ နေရာရယ်၊လူသွားစင်္ကြန် ပလက်ဖောင်းရယ်ပဲရှိခဲ့ရာက အခုတော့ လုံခြုံရေး ကင်းမျှော်စင် အသစ်တစ်ခုဆောက်နေတာလည်းတွေ့ရပါတယ်။
စိတ်အပန်းဖြေစရာ၊သွားလာလည်ပတ်စရာရယ်လို့ များများစားစား မရှိတော့တဲ့ ရန်ကုန်မြို့က အခြေခံ လူတန်းစားတွေအဖို့ ကုန်ကျစရိတ်နည်းနည်းနဲ့ လည်ပတ်စရာနေရာလေးတစ်ခုတိုးလာပြီလို့ ထင်ခဲ့ရပေမယ့် အခုတော့ အဲ့ဒီနေရာဟာ အထိတ်တလန့်အကြောက်တရားတွေ ဖုံးလွှမ်းနေတဲ့ နေရာတစ်ခုပဲ ဖြစ်သွားရပါတယ်။
ရထားစီးရင်း မျက်စိရှေ့ပေါ်လာတဲ့ ရှုခင်းလေးတွေကြည့်ရင်း အလုပ်သွားအလုပ်ပြန်၊အကြောင်းမျိုးစုံနဲ့ ရထား ပေါ် ရောက်လာကြတဲ့ရထားစီးခရီးသည်တွေအဖို့ရန်ကုန်မှာ လေဆိပ်နဲ့ အနီးဆုံး တစ်ခုတည်းသော ဘူတာဟာ မျက်စိပသာဒဖြစ်စရာ မဟုတ်တော့ပါဘူး။
ရည်ရွယ်ချက်ရှိရှိ အကြောက်တရားပေးနေတဲ့ နေရာတစ်ခုပါ။လူထုဆီရောက်လာတဲ့ ဒီအကြောက်တရားဟာ လူတစ်စုရဲ့ အကြောက်တရားကနေ ဗိုင်းရပ်စ်တစ်ခုလို ကူးစက်ပျံ့နှံ့လာရတာမျိုးလည်းဖြစ်နိုင်ပါတယ်။
လက်နက်ကိုင်ထားတဲ့လူအုပ်စုတစ်ခုကလက်နက်မဲ့ လူထုကို တရားသည်ဖြစ်စေ၊မတရားသည်ဖြစ်စေ အတင်းအကျပ်အမိန့်ပေးပြီ၊ တားမြစ်ကန့်သတ်မှုတွေလုပ်လာတာဟာ အဲ့ဒီလက်နက်ကိုင်လူအုပ်စုကို ခြောက် လှန့်နေတဲ့ အကြောက်တရားတစ်ခုခု ရှိနေလို့သာ ဖြစ်လိမ့်မယ်မဟုတ်ပါလား။ ။
