⏹ မေး − စစ်ကောင်စီက ထိုးပေးတဲ့ Sinopharm နဲ့ Sinovac ကာကွယ်ဆေးတွေကိုထိုးသင့်ပါသလား။
▶️ ဖြေ − အဲဒါက တရုတ်လုပ်ဆိုတာသိပါတယ်။ ကျွန်တော်တို့က စကစ ကိုလည်းမယုံပါဘူး။ တရုတ်ပြည်ကိုလည်းမယုံကြည်ပါဘူး။ ဒါပေမယ့် WHO က အသိအမှတ်ပြုတဲ့ ကာကွယ်ဆေးဆိုရင်တော့ ထိုးပါခင်ဗျာ။ ကျွန်တော်က ထိုးသင့်ပါတယ်လို့ ဖြေပါမယ်။ စကစ ထိုးတဲ့ဆေးကို ထိုးပါလို့ ပြောလို့ကျွန်တော့်ကို စကစ ဘက်တော်သားလို့ မထင်ပါနဲ့။ ကျွန်တော်အမြဲတမ်းပြောပါတယ်။ စကစ ပေးတဲ့ ဆေးကိုထိုးပါ။ ကျွန်တော်တို့တိုင်းပြည်မှာ အရမ်းကို ကိုဗစ်တွေက ထနေလို့၊ ဒီဟာကို တန့်သွားအောင် ကာကွယ်ဆေးနဲ့ပဲထိန်းရပါလိမ့်မယ်။ မဖြစ်သေးတဲ့သူတွေမဖြစ်အောင်၊ ဖြစ်ပြီးသားသူတွေထပ်မဖြစ်အောင်၊ စကစဆေးကိုထိုးပါ၊ ပြီးရင် စကစ ကိုဆက်လက်ဆန့်ကျင်ကြပါလို့ ကျွန်တော်တိုက်တွန်းချင်ပါတယ်။
⏹ မေး − ကိုဗစ်ဖြစ်ပြီး ရက်လ ဘယ်လောက်အကြာမှာ ကာကွယ်ဆေးထိုးရပါမလဲ။
▶️ ဖြေ − ရောဂါလက္ခဏာစတဲ့ရက်နဲ့ ကာကွယ်ဆေးကိုမတိုင်းပါဘူး။ ရောဂါလက္ခ ဏာတွေပျောက်ကင်းတဲ့နေ့နဲ့ တိုင်းပါတယ်။ ကိုဗစ်ဖြစ်ပြီး ရောဂါလက္ခဏာပျောက်ပြီး ၇ ရက်ကနေ ၁၀ ရက်ကြာပြီဆိုရင် ကာကွယ်ဆေးထိုးလို့ရပါတယ်။ ထိုးတဲ့အချိန်မှာ ကိုဗစ်ရောဂါလက္ခဏာတွေတော့လုံးဝ ရှိမနေရပါဘူး။ ရောဂါလက္ခဏာ ဆိုတာ ဝမ်းသွားတာ ၊နှာစေးတာ ၊ချောင်းဆိုးတာ ၊အဖျားတက်တာ အကုန်ပါပါတယ်။
⏹ မေး − ကာကွယ်ဆေးနဲ့ပတ်သက်ပြီး မြန်မာနိုင်ငံသားတွေ လက်လှမ်းမှီတဲ့ဘယ်ကာကွယ်ဆေးကို ဆရာ အကြံပြု ချင်ပါသလဲ။
▶️ ဖြေ − အခုလောလောဆယ်က တိုင်းပြည်မှာဖြစ်နေတဲ့ ရောဂါကို ဖြတ်ဖို့အတွက် ဘယ်ဆေးပဲအရင်ရရ ထိုးကြပါလို့အကြံပြုချင်ပါတယ်။ လူတိုင်းကအကောင်းဆုံး ဆေးကို ထိုးချင်တာပေါ့။ ၉၅ ရာခိုင်နှုန်းအထက် ကာကွယ်ပေးတဲ့ဆေးကို ထိုးချင်တာပေါ့။ ဒါပေမယ့်လည်း ကိုယ်လက်လှမ်းမီတဲ့ဆေးကို ထိုးပေးကြပါ။ ဟိုဆေးကို ထိုင်စောင့်၊ ဒီဆေးကိုထိုင်စောင့်ရင်းကူးခံရမှာ စိုးတဲ့အတွက် ကျွန်တော်က ပြောတာဖြစ်ပါတယ်။
⏹ မေး − ရာသီတုပ်ကွေးကာကွယ်ဆေးထိုးပြီး ဘယ်လောက်ကြာမှ ကိုဗစ်ကာကွယ်ဆေးထိုးသင့်ပါသလဲ။
▶️ ဖြေ − ရာသီတုပ်ကွေးကာကွယ်ဆေးထိုးပြီးတစ်ပတ်အကြာမှာ ထိုးခွင့်ရှိပါတယ်။တစ်ပတ်အနည်းဆုံးစောင့်ရပါမယ်။
⏹ မေး − Covidshield ကာကွယ်ဆေးကို သား၊ ငါးသယ်သလိုသယ်ပြီး ထိုးပေးတာ တွေက ဆေးရဲ့အာနိသင်မပျက်နိုင်ဘူးလား။
▶️ ဖြေ − ပျက်နိုင်ပါတယ်။ ဒီနေရာမှာ တစ်ခုပြောချင်တာက Cold Chain ပျက်ရင်တော့ အာနိသင်ပျက်နိုင်ပါတယ်။ ဒါပေမယ့်တစ်ခုတော့ရှိတယ် အဲလို Cold Chain ပျက်လို့မထိုးဘူးလား ဆိုတဲ့အခါမှာ Cold Chain ပျက်တဲ့ဆေးကို ထိုးမိလို့ ဥပါဒ်မဖြစ်နိုင်ပါဘူး။ ဆိုးကျိုးမဖြစ်နိုင်ပါဘူး။ အကယ်၍ သူ့မှာ အာနိသင်ကျန်သေးရင် ကောင်းတာလေးရနိုင်ပါတယ်။ ရသလောက်အမြတ်လေးယူတဲ့သဘောပါပဲ။
⏹ မေး − ကိုဗစ်ကာကွယ်ဆေး Sinopharm က ဘေဂျင်းနဲ့ ဝူဟန်နှစ်မျိုးရှိပြီး ဘေဂျင်းကပဲ WHO အသိအမှတ်ပြုတယ်လို့သိရပါတယ်။ မြန်မာပြည်မှာထိုးတာ ဝူဟန်ထုတ်ဖြစ်နေမှာစိုးလို့ပါ။
▶️ ဖြေ − အဲဒါကတော့ ထိုးတဲ့စင်တာမှာမေးပေးပါ။ ဝူဟန်ဆိုရင်တော့ ကိုယ့်ဘက်က စိတ်မသန့်ရင်မထိုးပါနဲ့။ အားလုံးက အသက် ၁၈ နှစ်ကျော်ပြီးသားဖြစ်တဲ့အတွက် ကိုယ်မထိုးချင်ရင် ရိုက်နှက်ပြီးထိုးလို့မရပါဘူး။ ဆရာဝန်တွေအနေနဲ့ ဆေးပညာဘက်က အကြံပြုချင်တာကတော့ ဘယ်သူပဲထိုးပေးပေး ကိုယ့်ကို မကူးအောင်ကာကွယ်တာ ဆိုတော့ထိုးသင့်ပါတယ်လို့ပြောချင်ပါတယ်။ ကိုယ့်ဘက်က စိတ်မချ တာဆိုရင် ကိုယ်မှာမထိုးပိုင်ခွင့်ရှိပါတယ်။
⏹ မေး − ဆာလ်ဖာ၊ ပန်နဆလင်၊ ဘားပလက်စ် တွေနဲ့ မတည့်ပါဘူးဆရာ။ ကာကွယ်ဆေးထိုးသင့်ပါသလား။
▶️ ဖြေ − ကျွန်တော်ပြောချင်တာကတော့ သွားထိုးလို့ရှိရင် ကျွန်တော်ကတော့ ဘာနဲ့မတည့်ပါဘူး။ ကျွန်မကတော့ ဘာနဲ့မတည့်ပါဘူးဆိုတာ သေချာပြောပေးပါ။ ထိုးတဲ့ဆေးပေါ်မှာမူတည်ပြီးတော့ ဆေး ဖော်စပ်ထားတဲ့ အခြေခံမှာ ဘာတွေပါလဲဆိုတာအပေါ်မူတည်တယ်။ အဲဒီတော့ သွားထိုးရင်သေချာပြောပါ။
⏹ မေး − ဆီးချို ၊သွေးတိုး၊အသည်းရောဂါရှိပါတယ်။ ကာကွယ်ဆေးထိုးသင့်ပါသလား။
▶️ ဖြေ −ထိုးသင့်ပါတယ်။ ပိုလို့တောင် ထိုးသင့်ပါတယ်။ ဒါလို့လဲဆိုတော့အန္တရာယ်ရှိတဲ့ အုပ်စုဖြစ်လို့ပါ။
⏹ မေး − ဆီးချိုရောဂါသည် အသက် ၆၀ ကျော် ကာကွယ်ဆေးထိုးသင့်ပါသလား။
▶️ ဖြေ − ကာကွယ်ဆေးထိုးသင့်ပါတယ်။ ဘာကာကွယ်ဆေးဖြစ်ဖြစ် ကမ္ဘာ့ကျန်းမားရေးအဖွဲ့ကြီးက အသိအမှတ်ပြုထားတဲ့ ကာကွယ်ဆေးဆိုရင် ထိုးပါ။
⏹ မေး − ကာကွယ်ဆေးမထိုးခင်ဘာတွေရှောင်ဖို့လိုပါသလဲ။
▶️ ဖြေ − ကာကွယ်ဆေးမထိုးခင်အဓိကတော့ ရောဂါလက္ခဏာတွေပျောက်ကင်းသွားတာ အနည်းဆုံးတစ်ပတ်ရှိရပါမယ်။ ရာသီတုပ်ကွေးကာကွယ်ဆေးထိုးထားရင် ဆေးထိုးပြီး အနည်းဆုံးတစ်ပတ်ကြာရပါမယ်။ အဲနှစ်ခုက အဓိကပါ။
—People’s Spring