“သေချာတာကတော့ “သားသတ်သမားနဲ့လက်ဆွဲနှုတ်ဆက်ရင်ကိုယ့်လက်ပါသွေးစွန်းမယ်”ဆိုတာပါပဲ”

▪︎ဦးမင်းကိုနိုင်ရဲ့ ဘန်ကီမွန်းရဲ့ခရီးစဥ်အ​ပေါ် သုံးသပ်ချက်

ကုလသမဂ္ဂအထွေထွေအတွင်းရေးမှူးချုပ်ဟောင်း လည်းဖြစ် ၊The Elders(ကမ္ဘာ့ခေါင်းဆောင်​ဟောင်းများနဲ့ဖွဲ့ထားတဲ့အဖွဲ့)ရဲ့ ဒုတိယဥက္ကဋ္ဌလည်းဖြစ်တဲ့မစ္စတာ ဘန်ကီမွန်းဟာ အာဏာသိမ်းစစ်​ကောင်စီရဲ့ဖိတ်ကြားချက်နဲ့ ဧပြီ ၂၃၊ ၂၄ ရက်မှာမြန်မာနိုင်ငံကိုလာခဲ့ပါတယ်။ ၂၀၂၁ ခုနှစ်ကတည်းကလာဖို့ ကြိုးစားခဲ့​ပေမယ့် ငြင်းပယ်ခံရပြီး အခုမှစစ်​ကောင်စီက ပြန်ဖိတ်ခဲ့လို့လာတာဖြစ်ပါတယ်။ ၂ ရက်တာ ဘန်ကီမွန်းခရီးစဥ်ဟာ အာဏာသိမ်း​ခေါင်း​ဆောင်အပါအဝင် စစ်အုပ်စုက ပုဂ္ဂိုလ်အချို့နဲ့သာ​တွေ့ဆုံခဲ့ရပြီး အောင်မြင်မှုလည်းမရခဲ့ပါဘူး။ နိုင်ငံတစ်ဝန်း​နေ့စဥ်ပြည်သူ​တွေကိုအကြမ်းသတ်ဖြတ်၊ ဗုံးကျဲမီးရှို့​ဖျက်ဆီးနေတဲ့စစ်​ကောင်စီရဲ့အာဏာသိမ်း​ခေါင်း​ဆောင်နဲ့လက်ဆွဲနှုတ်ဆက်၊ အဆက်အဆံလုပ်ခဲ့တဲ့ ဘန်ကီးမွန်းကို ပြည်တွင်းမှာ​ရော နိုင်ငံတကာက ပြင်းပြင်းထန်ထန်​ဝေဖန်​နေကြပါတယ်။ ဘန်ကီမွန်းရဲ့ ခရီးစဥ်နဲ့ ပတ်သပ်ပြီး ၈၈ မျိုးဆက်​ခေါင်း​ဆောင် ဦးမင်းကိုနိုင်ရဲ့သ​ဘောထားအမြင်​တွေကို People’s Spring ကဆက်သွယ်​မေးမြန်းထားပါတယ် ။

မေး။ဘန်ကီမွန်းလာသွားတယ်ဆိုတော့ဘယ်လိုနားလည်ရမလဲ ။

​ဖြေ။ဖက်ဆစ်တပ်ဟာသူတို့နိုင်မယ်လို့ယုံရင်ဒီအကွက်ရွှေ့ပါမလား ဒါပဲဖြေကြည့်။၂၀၂၁ကထဲ တောင်းဆိုတာ အခုမှထ သဘောတူတာလေ။ခုဘယ်အခြေနေဆိုက်နေပြီလဲ ဆက်တွေးကြည့်ပေါ့။

Public Service Announcement

မေး။အလားအလာကကောဘာဖြစ်နယ်ထင်ပါလဲ။

​ဖြေ ။ နိုင်ငံတကာတော့မသိဘူးဗျ ပြည်သူကတော့ ဒင်းတို့မျက်နှာပေး မြင်တာနဲ့မပြောခင်ကထဲက ဘာအချိုးချိုးမှာသိပြီးသား ၊ကိုယ့်လုပ်လက်စအလုပ် အားစိုက်လုပ်ရုံပဲ ဘာအမျှော်စိုက်ဝါဒမှမရှိဘူး။အာရုံလွှဲမခံနဲ့ အချိန်ဆွဲမခံနဲ့ စိတ်ဝမ်းအကွဲမခံနဲ့ဆိုတာအမြဲပြောနေတာ။တစ်ခုပဲရှိတယ် NUG ကိုနာမည်တပ်အသိအမှတ်ပြုတရားဝင်ပြောလာရတာ မြင်တတ်ရင် ကိုယ့်တော်လှန်ရေးရေချိန်ကိုယ်တွက်ဆလို့ရတာပေါ့။

မေး။ စစ်​ကောင်စီကိုဒီလိုဆက်ဆံတဲ့နည်းလမ်းနဲ့ကြိုးပမ်းကြည့်မယ်ဆိုတဲ့သ​ဘောထားမျိုးအပေါ်ဘာပြောနိုင်မလဲ။

​ဖြေ။ဖက်ဆစ်ဝါဒီကိုလူရာသွင်းရင်အကြမ်းဖက်မှုတွေစွန့်လွှတ်ပြီး တရားစီရင်မှုကိုရင်ဆိုင်မယ်လို့များတွေးနေကြသလား မေးပေးစမ်းပါဗျာ။သေချာတာကတော့ “သားသတ်သမားနဲ့လက်ဆွဲနှုတ်ဆက်ရင်ကိုယ့်လက်ပါသွေးစွန်းမယ်”ဆိုတာပါပဲ။

အခုလို​ဖြေ​ပေးတာ​ကျေးဇူးတင်ပါတယ် ။ ။