“သတိထားဖို့ လိုပါတယ်။အင်အားပြင်းနဲ့ ၁၉၂၇က လှုပ်ဖူးတော့ သူ့ကိုရော ငလျင်စက်ဝန်းထဲ ထည့်တွက်ရင် နှစ်၉၀ ကျော်လာပြီဆိုတော့ သတိထားရပါမယ်”

-ဘူမိ​​ဗေဒပညာရှင်NUG ဝန်ကြီးဦးစိုးသူရထွန်းနဲ့​မေးမြန်းခန်း

ဧရာဝတီတိုင်း၊ ဖျာပုံမြို့အနီးပင်လယ်ပြင်အတွင်းဇွန်လတတိယနှင့် စတုတ္ထပါတ်တွင်အင်းအား ရစ်ခ်ျတာစကေး ၄ ပတ်ဝန်းကျင်အဆင့် ငလျင်များ မကြာခဏ လှုပ်နေသည်။ ဇွန်လ ၁၉ရက်မှ ဇွန်လ ၂၂ရက်အတွင်း ရစ်ခ်ျတာစကေး ၄ဒဿမ ၄ မှရစ်ခ်ျတာစကေး ၄ဒဿမ ၉အဆင့်ကြား ငလျင် လေးကြိမ်လှုပ်ခဲ့ကြောင်း အမေရိကန် ဘူမိလေ့လာရေးဌာန USGS ကထုတ်ပြန်ထားသည်။ ဖျာပုံမြို့အနီး ပင်လယ်ပြင်အတွင်းလှုပ်သော ငလျင်များသည် ဒေးဒရဲ ပြတ်ရွေ့လှုပ်ရှားခြင်းဖြစ်ပြီး သတိပြုရန် လိုအပ်သော ပြတ်ရွေ့လည်းဖြစ်ကြောင်း ဘူမိဗေဒပညာရှင်တစ်ဦးဖြစ်သလိုအမျိုးသားညွတ်ရေးအစိုးရ၊ လျှပ်စစ်နှင့်စွမ်းအင်ဝန်ကြီးဌာန၏ ပြည်ထောင်စုဝန်ကြီး ဦးစိုးသူရထွန်းကရှင်းပြသည်။ ဒေးဒရဲပြတ်ရွေ့နှင့် ပတ်သပ်ပြီ သတိထားရမည်များကိုဦးစိုးသူရထွန်းကို People’s Spring ကဆက်သွယ်မေးမြန်းထားသည်ကို​ဖော်ပြလိုက်ပါသည်။

မေး -ဒီရက်ပိုင်း ဖျာပုံနားပင်လယ်ထဲမှာ ငလျင် ခဏခဏ လှုပ်နေတယ်။ ဘာကြောင့်လို့များသုံးသပ်နိုင်မလဲ။

‌ဖြေ – ဒေးဒရဲ၊ဖျာပုံ၊ကျိုက်လတ်အပါအဝင် အနီးပတ်ဝန်းကျင်ဒေသတွေက ငလျင်ဇုံ တစ်ခုပဲလေ။ အတန်အသင့်ကြီးတဲ့ တစ်ကြိမ်လှုပ်လိုက်ရင် သူ့ကို ပြန်ထိန်းညှိတဲ့ ငလျင်ငယ်တွေ ဆက်တိုက်လှုပ်တတ်တယ်။ မြေပျော့ တဲ့နေရာဆိုတော့ ပိုဆိုးတာပေါ့။

မေး – ဟုတ်ကဲ့။ ဒါဆို ဧရာဝတီတိုင်းထဲက မအူပင်မြို့မှာ ဇွန်လဆန်းက လှုပ်တဲ့ ငလျင်ရဲ့ နောက်ဆက်တွဲတွေများလားဆရာ။

Public Service Announcement

‌ဖြေ- ဟုတ်ပါတယ်။

(ပြီးခဲ့သည့် ဇွန်လ ၇ရက်က မအူပင်မြို့တွင် အင်အားရစ်ချ်တာစကေး ၄ဒဿမ၈အဆင့် လှုပ်ခတ်ခဲ့ပြီး မြို့ပေါ်မှ အဆောက်အဦအချို့ ပြိုကျပျက်စီးခဲ့သည်။ မအူပင်မြို့၊မိုးကုတ်ဝိပဿနာကျောင်းတိုက်မှ အဆောက်အဦတစ်ခုပြိုကျရာသီလရှင်တစ်ပါးနှင့်အမျိုးသမီးတစ်ဦးသေဆုံးခဲ့သည်)

မေး – ဒေးဒရဲ၊ ဖျာပုံ၊ ကျိုက်လတ်ငလျင်ဇုန်အမည်ရှိလား သိပါရစေဆရာ။ နောက်ပြီး သူက ယေဘူယျအားဖြင့် ပြင်းအားဘယ်လောက် လှုပ်လေ့ရှိလဲခမျ။

ဖြေ – ဒေးဒရဲပြတ်ရွေ့လို့ပဲ အမည်ပေးထားတယ်။ အကြာကြီးနေမှ တစ်ခါ လှုပ်ပြီး မြေပျော့မှာမို့ ပြတ်ရွေ့ မထင်ရှားဘူး။ ၁၉၂၇ တုန်းက ရန်ကုန် အထိကို ထိခိုက်ခဲ့တဲ့ ပမာဏ ၇ ငလျင် လှုပ်ဖူးတယ်။

မေး – ဒီပြတ်ရွေ့ကလည်း စစ်ကိုင်းပြတ်ရွေ့လိုပဲမြေအနက် ၁၀ကီလိုမီတာပတ်ချာလည်မှာဗဟိုပြုတာနော်။

ဖြေ – Strike Slip (ဘေးတိုက်ရွေ့တဲ့ ပြတ်ရွေ့)တွေကမြေအနက် ကီလိုမီတာ ၁၀-၁၅ ပတ်ဝန်းကျင်မှာ လှုပ်တာပါပဲ။

မေး – ဟုတ်ကဲ့။ တဆက်တည်းမှာ ဘေးတိုက်နဲ့ ဒေါင်လိုက်ငလျင်တွေက ဘာကွာခြားလဲ။

ဖြေ – ငလျင်တွေရဲ့ အဖျက်စွမ်းအားက ပြင်းအား ပမာဏ နဲ့ အနက်ပေါ်ပဲ မူတည်ပါတယ်။

မေး -ဒါဆိုဒေးဒရဲပြတ်ရွေ့ကလည်းရန်ကုန်ရောပတ်ဝန်းကျင်မြို့တွေအတွက်ပါ သက်ရောက်မှုရှိစေတဲ့ပြတ်ရွေ့လို့ ပြောလို့ရလား။

‌ဖြေ – ဟုတ်ပါတယ်။ သတိထားဖို့ လိုပါတယ်။အင်အားပြင်းနဲ့ ၁၉၂၇က လှုပ်ဖူးတော့ သူ့ကိုရော ငလျင်စက်ဝန်းထဲ ထည့်တွက်ရင် နှစ်၉၀ ကျော်လာပြီဆိုတော့ သတိထားရပါမယ်။

မေး -​မြေငလျင်နဲ့ ပတ်သက်လို့ ပြည်သူ​တွေကို ဘာများ သတိပေးချင်လဲဆရာ။

ဖြေ – ပြောနေကျစကားပဲပေါ့။ မြန်မာနိုင်ငံဟာငလျင်ရပ်ဝန်းပေါ် မှာရှိပြီး လှုပ်ရှားဆဲ သက်ရှင်ပြတ်ရွေ့တွေ နိုင်ငံအနှံ့ရှိနေတာမို့ အဆောက်အအုံတွေကို ငလျင်ဒဏ်ခံနိုင်အောင်ဆောက်ကြဖို့၊ မိသားစု တိုင်း အရေးကြုံရင် ဘယ်လိုလုပ်ရမယ် ဆိုတာ လေ့လာတိုင်ပင်ထားကြဖို့ ပါပဲ။ငလျင်က လူကို သတ်တာမဟုတ်ဘူး။ လူတွေဆောက်ထားတဲ့ အဆောက်အအုံတွေကပဲ လူကို သတ်တယ်လို့ ဆိုရိုးစကားရှိပါတယ်။ ။​ကျေးဇူးတင်ပါတယ်။