အာဖဂန် ကျောင်းတစ်ကျောင်းနား ဗုံးကွဲမှုကြောင့် သေဆုံးသူ ၆၀ ကျော်ထိရှိလာ

မေလ ၉ ရက်က ကဘူးလ်မြို့တော်မှာရှိတဲ့ အလယ်တန်းကျောင်း တစ်ခုရဲ့ အပြင်ဖက်မှာ ဗုံးတွေ ဆက်တိုက် ပေါက်ကွဲခဲ့တာပါ။ သေဆုံးသူတွေထဲမှာ ကျောင်းဆင်းလာတဲ့ ကျောင်းသူ မိန်းကလေး တော်တော်များများ ပါဝင်ကြောင်း ဒေသခံ မီဒီယာတွေက ဖော်ပြပါတယ်။

ဒက်ရှ်အီဘာချီ ရပ်ကွက်က ဗုံးကွဲမှုတွေနဲ့ ပတ်သက်လို့ ဘယ်အဖွဲ့အစည်းကမှ တာဝန်ခံ ကြေညာထားတာမျိုး မရှိသေးပါဘူး။ ဗုံးပေါက်ကွဲမှုကြောင့် အနီးတဝိုက်မှာ နေထိုင်တဲ့ ဆွန်နီ မွတ်ဆလင်တွေပါ သေဆုံးခဲ့ကြပါတယ်။ အာဖဂန် အစိုးရက ဒီလုပ်ရပ်ကို တာလီဘန် စစ်သွေးကြွတွေ ကျူးလွန်ခဲ့တယ်လို့ ဝေဖန် စွပ်စွဲခဲ့ပေမယ့် တာလီဘန်တွေက ငြင်းဆိုထားပါတယ်။

အာဖဂန်ကနေ အမေရိကန်တပ်တွေ ပြန်လည် ရုပ်သိမ်းဖို့ စီစဉ်နေတဲ့ အချိန်မှာပဲ တစ်ဖက်မှာလည်း အာဖဂန် အစိုးရနဲ့ တာလီဘန်တွေကြား တိုက်ပွဲတွေ အရှိန်မြင့်လာနေပါတယ်။ လူနေ ရပ်ကွက်တွေကို ပစ်မှတ်ထားတဲ့ အကြမ်းဖက်မှုတွေလည်း ပိုမို ထူထပ်လာတာ တွေ့ရပါတယ်။

ကျောင်းနားမှာ ဖြစ်ပွားတဲ့ ဗုံးပေါက်ကွဲမှုတွေကြောင့် သေဆုံးခဲ့တဲ့ ကလေးတွေကို စုဝေးပြီး မြေချ သင်္ဂြိုဟ်တဲ့ အစီအစဉ်တွေ စတင်နေပြီ ဖြစ်ပါတယ်။ အမေရိကန် အစိုးရက အာဖဂန်မှာ စာသင်ကျောင်းကို ပစ်မှတ်ထားခဲ့တဲ့ တိုက်ခိုက်မှုဟာ စက်ဆုပ် ရွံရှာစရာ ကျူးလွန်မှုမျိုးလို့ ထုတ်ပြန် ရှုတ်ချခဲ့ပါတယ်။ အမေရိကန် သမ္မတ ဂျိုးဘိုင်ဒန်ဟာ စက်တင်ဘာ ၁၁ ရက် မတိုင်ခင် အာဖဂန် အခြေစိုက် အမေရိကန် စစ်တပ်အားလုံး ပြန်လည် ရုပ်သိမ်းဖို့ ရက်သတ်မှတ် ကြေညာထားပြီး ဖြစ်ပါတယ်။

Public Service Announcement