စစ်အာဏာရှင် ပြုတ်ကျရေးနှင့် စစ်အာဏာရှင် သက်ဆိုးမရှည်ရေး ဆောင်ရွက်ချက်ကို မကြာခင် ကာလတွင် အမြန်ဆုံးဆောင်ရွက်သွားမည်ဖြစ်၍ ပြည်သူများ နိုးကြားသတိရှိကြရန် အမျိုးသား ညီညွတ်ရေးအစိုးရ ပြည်ထောင်စုဝန်ကြီး ဒေါက်တာဝင်းမြတ်အေးက ပြောကြားသည်။
ယနေ့ ပြုလုပ်သည့် NUG ၏ ဒုတိယ အကြိမ်မြောက် သတင်းစာရှင်းလင်းပွဲ၌ သတင်းထောက်တစ်ဦးက မသန်စွမ်းသူများအကူအညီပေးရေး အစီအမံများနှင့်ပတ်သက်ပြီး မေးမြန်းသည့်အပေါ် ဝန်ကြီးက အထက်ပါအချက်ကို ထည့်သွင်းပြောကြားခဲ့သည်။
မသန်စွမ်းသူများ အပါအဝင် ပြည်သူများအားလုံးနေ့စဉ်နှင့်အမျှ ဒုက္ခခံစားနေရခြင်း ကို ကိုင်တွယ်ဖြေရှင်း ရာတွင် အရေးကြီးသည့်အချက်မှာ စစ်အာဏာရှင်အမြန်ပြုတ်ကျရေး ကို ဦးစားပေး ဆောင်ရွက်ရမည်ဟု ဒေါက်တာဝင်းမြတ်အေးက ပြောသည်။
“ပြည်သူတစ်ရပ်လုံးကို ပြောချင်တာက ကျွန်တော်တို့ အခု NUG အစိုးရသည် စစ်အာဏာရှင် ပြုတ်ကျ ရေးနဲ့ စစ်အာဏာရှင် သက်ဆိုးမရှည်ရေးကို ဦးတည်ပြီးတော့ ဆောင်ရွက်နေပါတယ်” ဟု ၎င်း ကဆို သည်။
Public Service Announcement
ထိုသို့ ရည်မှန်းချက်ထား၍ ဆောင်ရွက်ရာတွင် အချိန်ကာလ ကန့်သတ်ချက်ဖြင့် လုပ်ဆောင်နေပြီး ပြည်သူများက နိုးကြားသတိဖြင့် ပူးပေါင်းဆောင်ရွက်ရန်လိုကြောင်း ဒေါက်တာဝင်းမြတ်အေးက ပြောသည်။
“ပြည်သူများကလည်း အဆင့်သင့်ရှိနေတယ်ဆိုတာ ကျွန်တော်တို့ သိပါတယ်။ ကျွန်တော်တို့ကလည်း ပြည်သူနဲ့ တစ်သားတည်းပါပဲ။ အဲဒါကြောင့်မို့လို့ အဆင့်သင့်ရှိနေတဲ့ ပြည်သူများနဲ့ တစ်သားတည်းရှိနေတဲ့ ပြည်သူ့အစိုးရ NUGဟာ မကြာခင်မှာ ဒီကိစ္စတွေကို အမြန်ဆုံးအကောင် အထည်ဖော်ပြီးတော့ စစ်အာဏာရှင် အမြစ်ပြတ်ရေးနဲ့ စစ်အာဏာရှင် သက်ဆိုးမရှည်ရေးအတွက် ဆောင်ရွက်သွားကြပါမယ်။ အားလုံးက နိုးကြားသတိနဲ့ရှိကြပါလို့ တိုက်တွန်းလိုပါတယ်” ဟု ဒေါက်တာဝင်းမြတ်အေးက ပြောသည်။
NUG ပြည်ထဲရေးဝန်ကြီး ဦးလွင်ကိုလတ်ကလည်း မြေပြင်၌ရှိနေသည့် ပြည်သူ့ကာကွယ်ရေးတပ်ဖွဲ့ဝင်များနှင့် ချိတ်ဆက်ဆောင်ရွက်နေကြောင်း ပြောသည်။
“ ကျွန်တော်တို့ ပြည်သူ့ကာကွယ်ရေးတပ်မတော်ဟာဆိုလို့ရှိရင်လည်း အချိန်တစ်ခုကို ရောက်လာပြီ ဆိုတဲ့အခါကျလို့ရှိရင် ဒီ ပြည်သူ့တော်လှန်ရေးကြီးကို ဦးဆောင်ပြီးတော့ ပန်းတိုင်ရောက်တဲ့အထိ ဆောင်ရွက်နိုင်ဖို့အတွက် အခြေအနေကောင်းတွေ အများကြီးရနေပြီ။ ကျွန်တော်တို့မှာ များစွာတိုးတက်တဲ့ ပြင်ဆင်မှုတွေ၊များစွာတိုးတက်တဲ့ ထောက်ပံ့မှုတွေ ရရှိနေတယ်ဆိုတာလောက်ကို ဒီမှာ ပြောချင်ပါတယ်။” ဟု ဦးလွင်ကိုလက်က ပြောသည်။
ထောက်ပံ့မှုရရှိခြင်းနှင့် မည်ကဲ့သို့ ပြင်ဆင်ထားသည် ဆိုသည့် အသေးစိတ် အခြေအနေများကိုမူ ဝန်ကြီးက ပြောဆိုခြင်းမရှိပေ။
ကချင်လက်နက်ကိုင်အဖွဲ့(KIA) အပါအဝင် တိုင်းရင်းသားလက်နက်ကိုင်အဖွဲ့တာဝန်ရှိသူအချို့ကလည်း နေရာအနှံ့၌ အချိန်မရွေး တိုက်ပွဲများ ဖြစ်ပွားလာနိုင်၍ ပြည်သူများအနေဖြင့် စစ်ရေးသတင်းများကို နားစွန့်ထားရန် ပြောကြားထားသည်။
