NLD ထိပ်ပိုင်းခေါင်းဆောင် ဦးဉာဏ်ဝင်း အင်းစိန်ထောင်မှာ ကိုဗစ်ကူးစက်ခံရလို့ ပြင်ပဆေးရုံမှာ ကုသပေးနေ

အင်းစိန်ထောင်မှာ ဖမ်းဆီးထိန်းသိမ်းခံထားရတဲ့ အမျိုးသားဒီမိုကရေစီအဖွဲ့ချုပ် ရဲ့ အတွင်းရေးမှူးအဖွဲ့ဝင် ဦးဉာဏ်ဝင်းဟာ ကိုဗစ်ကူးစက်ခံထားရလို့ ပြင်ပဆေးရုံကို ပို့ဆောင်ကာ အရေးပေါ်ကုသပေးနေရတယ်လို့ မြန်မာနောင်းမ်သတင်းဌာနက ဖော်ပြထားပါတယ်။

ကိုယ်လက်ကိုက်ခဲတဲ့အတွက် ဆရာဝန်နဲ့ကုသရင်း စစ်ဆေးရာမှာတော့ ကိုဗစ်ကူးစက်ခံထားရတာကို သိရတာလို့ အကျဉ်းဦးစီးဌာန ပြောရေးဆိုခွင့် ရှိသူ ဒုတိယညွှန်ကြားရေးမှူး ဦးဆန်းအေးကျော်က ဖြေကြာထားတာပါ။

ဦးဉာဏ်ဝင်းဟာ အာဏာသိမ်းတဲ့ ဖေဖော်ဝါရီလ ၁ ရက်မနက်အစောပိုင်းကတင် ဖမ်းဆီးထိန်းသိမ်းခြင်းခံခဲံရတာပါ။အဲဒီနောက်အင်းစိန်ထောင် ပို့လိုက်တာလည်းဖြစ်ပါတယ်။အသက် ၇၈ နှစ်အရွယ်ရှိပြီဖြစ်တဲ့ ဦးဉာဏ်ဝင်းဟာ လက်ရှိမှာတော့ ကျန်းမာရေးအခြေအနေ တည်ငြိမ်နေတယ်လို့ မြန်မာနောင်းမ်ရဲ့ဖော်ပြချက်အရသိရပါတယ်။

အင်းစိန်ထောင်မှာ ထိန်းသိမ်းခံထားရတဲ့ ရန်ကုန်ဆေးရုံကြီး ၊အရေးပေါ်ဌာနရဲ့ တာဝန်ခံ ဒေါက်တာမော်မော်ဦးဟာလည်း ကိုဗစ်ကူးစက်ခံရလို့ ပြင်ပဆေးရုံကိုပို့ဆောင်ကုသပေးနေတယ်လို့သိရပါတယ်။ဦးဉာဏ်ဝင်းကို ရန်ကုန်ဆေးရုံကြီး ၊ဒေါက်တာမော်မော်ဦးကို မြောက်ဥက္ကလာပ ဆေးရုံတွေမှာ ကုသပေးနေတာပါ။

Public Service Announcement