မန္တလေးမြို့ ပြည်ကြီးတံခွန်မြို့နယ်ရှိ လျှပ်စစ်မန်နေဂျာရုံး၌ ယနေ့နံနက် ၁၁ နာရီခန့်က ဗုံးပေါက်ကွဲမှုဖြစ်ရာအဆိုပါလျှပ်စစ်ရုံးမှအရာရှိတစ်ဦးနှင့် မီတာလာဆောင်သည့် ပြည်သူတစ်ဦးသေဆုံးပြီး ခုနစ်ဦးဒဏ်ရာရရှိခဲ့ကြောင်း ဒေသခံများကပြောသည်။
အဆိုပါလျှပ်စစ်ရုံးသို့ ဗုံးလာရောက်ပစ်သွားခြင်းဖြစ်ကြောင်း ဒေသခံတစ်ဦးက ပြောသည်။ လက်ရှိတွင် စစ်ကောင်စီတပ်ဖွဲ့ဝင်များရောက်လာပြီး လမ်းပိတ်ဆို့၍ စစ်ဆေးမှုများပြုလုပ်နေကြောင်း ဒေသခံတစ်ဦးက ဆိုသည်။
လက်ရှိတွင် ရန်ကုန်မြို့အပါအဝင် နေရာအနှံ့အပြားတွင် မြို့နယ်လျှပ်စစ်မန်နေဂျာရုံးများတွင် ဗုံးပေါက် ကွဲမှုများ ဆက်တိုက်ဖြစ်နေသည်။
ရန်ကုန်မြို့အတွင်းရှိ မင်္ဂလာဒုံမြို့နယ်၊ လမ်းမတော်မြို့နယ်နှင့် စမ်းချောင်းမြို့နယ်တို့ရှိ လျှပ်စစ်မန်နေဂျာရုံးများတွင် ဇူလိုင်၉ရက်နံနက်က ဗုံးပေါက်ကွဲမှုများဖြစ်ပွားခဲ့သည်။
ရန်ကုန်မြို့တွင် စစ်ကောင်စီအဖွဲ့က မီတာခများပေးဆောင်ရန်အတင်းအကျပ် ဖိအားပေးတောင်ခံလာပြီးနောက် မြို့နယ်အသီးသီးရှိ လျှပ်စစ်ရုံးများတွင် ဗုံးပေါက်ကွဲမှုများ ဆက်တိုက်ဖြစ်ပွားလာသည်။
Public Service Announcement
ပြီးခဲ့တဲ့ ဇူလိုင်၇ ရက်ကလည်း တာမွေ၊ သင်္ဃန်းကျွန်း၊ ကမာရွတ်၊ လှိုင်၊ မရမ်းကုန်းမြို့နယ်ရှိ မြို့နယ်လျှပ်စစ်ရုံးများ၌ ပေါက်ကွဲမှုဖြစ်ခဲ့သည်။
ပြည်သူများအပေါ် လျှပ်စစ်မီးမီတာခ ပေးဆောင်ရန် အတင်းအကြပ် ဖိအားပေး ကောက်ခံသူများကို စစ်ကောင်စီအဖွဲ့ဝင်ငွေရရှိအောင် ကြိုးပမ်းဆောင်ရွက်နေသူများအဖြစ် သတ်မှတ်ပြီး ထပ်မံဖိအားပေး ကောက်ခံနေပါက အသက်ကိုအာမ မခံနိုင်ကြောင်း မြို့ပြပြောက်ကျားတပ်ဦး (UGRF) ကဇူလိုင်၈ ရက်တွင် သတိပေးထုတ်ပြန်ထားသည်။
