ကိုဗစ်-၁၉ ဆိုးရွားစွာခံစားနေရတဲ့ မြန်မာနိုင်ငံကို အရေးပေါ်တုန့်ပြန်ဆောင်ရွက်ဖို့နဲ့ ဒီမိုကရေစီအရေးလှုပ်ရှားတဲ့ကွန်ယက်တွေကတဆင့် နိုင်ငံအတွင်း အသက်ကယ်ဆယ်ရေးအကူအညီပေးဖို့ နိုင်ငံတကာအသိုင်းအဝန်းကို မြန်မာနိုင်ငံဆိုင်ရာ အထူးအကြံပေးကောင်စီက မနေ့က တိုက်တွန်းထုတ်ပြန်ပါတယ်။
ပြည်တွင်းတုန့်ပြန်ဆောင်ရွက်သူတွေ၊ တိုင်းရင်းသားအရေးလုပ်ဆောင်သူတွေ၊ အရပ်ဖက်အဖွဲ့အစည်းတွေ၊ လူသားချင်းစာနာမှုအဖွဲ့တွေနဲ့ အမျိုးသားညီညွတ်ရေးအစိုးရ၊ နိုင်ငံတဝန်းရှိ အကြမ်းမဖက်အာဏာဖီဆန်ရေးလှုပ်ရှားမှုတွေဟာ အရေးတကြီးဝန်ဆောင်မှုတွေပေးဖို့ နဲ့ ကြီးမားတဲ့ ကိုဗစ်တတိယလှိုင်းရဲ့ရိုက်ခတ်မှုကြောင့် သန်းနှင့်ချီတဲ့ ပြည်သူတွေကို အသက်ကယ်ဆယ်ရေး လူသားချင်းစာနာမှုအကူအညီပေးဖို့ တိုက်ပွဲဝင်နေကြပါတယ်လို့ အကြံပေးကောင်စီရဲ့ ထုတ်ပြန်ချက်မှာ ဖော်ပြပါတယ်။
“သူတို့(မြန်မာပြည်သူတွေ)ဟာ အရေးပေါ် အကူအညီလိုအပ်နေပါတယ်”လို့ ဆိုပါတယ်။
ဆက်လက်ပြီး “စစ်တပ်ဟာ ကိုဗစ်ပိုးကို လွတ်လွတ်လပ်လပ်ပြန့်နှံ့ဖို့ ခွင့်ပြုထားပါတယ်။ ဖေဖော်ဝါရီ အာဏာသိမ်းမှုကလည်း ကျရှုံးနေပါပြီ။ စစ်တပ်ဟာ ပုံမှန်အစိုးရတစ်ရပ်ကို မတည်ဆောက်နိုင်သေးဘဲ အဲဒီလို လုပ်နိုင်စွမ်းလည်း မရှိပါဘူး။ မြန်မာနိုင်ငံမှာ ကိုဗစ်အကျပ်အတည်းကို ဖြေရှင်းနိုင်ဖို့ တစ်ခုတည်းသော နည်းလမ်းက ဒီမိုကရေစီလှုပ်ရှားမှုပါပဲ”လို့ အကြံပေးကောင်စီမှ Chris Sidoti က ပြောပါတယ်။
Public Service Announcement
အခုအချိန်မှာ မြေအောက်ဆေးခန်းတွေဖွင့် လည်ပတ်နေရတဲ့ ဆေးဘက်ဆိုင်ရာ ကျွမ်းကျင်သူတွေ အပါအဝင် သိန်းနှင့်ချီတဲ့ မြန်မာပြည်သူတွေဟာ စစ်တပ်ရဲ့ ပြင်းထန်တဲ့အကြမ်းဖက်မှုတွေ၊ လူမဆန်မှုတွေကြောင့် တောထဲ ဒါမှမဟုတ် နယ်စပ်ပြည်နယ်တွေဆီ ထွက်ပြေးတိမ်း ရှောင်နေရတယ်လို့ ကောင်စီရဲ့ ထုတ်ပြန်ချက်မှာ ဖော်ပြပါတယ်။
ကချင်၊ ကယား၊ ကရင်၊ ချင်း စတဲ့ နယ်စပ်ပြည်နယ်တွေကနေ အရေးပေါ်ကူညီရေးလမ်းကြောင်းတွေ ဖွင့်လှစ်ဖို့ ကောင်စီက တောင်းဆိုပါတယ်။ မြန်မာပြည်မှာ အသက်ပေါင်းများစွာ ဆုံးရှုံးနေရချိန်မှာ စစ်တပ်ပျော်ရွှင်မှုကိုသာ လုပ်ဆောင်နေတဲ့ အာဆီယံကို လက်ခံနိုင်ဖွယ်မရှိဘူးလို့ အကြံပေးကောင်စီက ဝေဖန်ပါတယ်။
အာဆီယံ၊ ကုလအေဂျင်စီတွေ ဒါမှမဟုတ် ဘယ်နိုင်ငံမဆို ကြန့်ကြာဖို့ အကြောင်းမရှိဘဲ မြန်မာပြည်သူတွေဆီ လက်ငင်းတိုက်ရိုက် အကူအညီတွေပေးဖို့ အကြံပေးကောင်စီက တိုက်တွန်းပါတယ်။
စစ်တပ်ဟာ နိုင်ငံရေးအကျိုးအမြတ်အတွက် ဒီမိုကရေစီလှုပ်ရှားမှုကို အသက်ရှုကြပ်စေအောင် ကိုဗစ်ကို လက်နက်သဖွယ်အသုံးပြုနေပြီး တရားဝင်မှုရဖို့၊ တိုင်းပြည်ကို ထိန်းချုပ်နိုင်ဖို့လည်း လုပ်ဆောင်နေတယ်လို့ ကောင်စီမှ Yanghee Lee က ပြောပါတယ်။
“စစ်ဗိုလ်ချုပ်တွေဟာ အကူအညီဖြန့်ဝေဖို့ မိတ်ဖက်တွေမဟုတ်ပါဘူး။ သူတို့ဟာ သူတို့ကျူးလွန်ထားတဲ့ ရာဇဝတ်မှုတွေအတွက် တာဝန်ခံရမယ့် လူသတ်သမားတွေပဲဖြစ်ပါတယ်”လို့ Yanghee Lee က ဆက်ပြောပါတယ်။
