ဒီမိုကရေစီနည်းကျ ရွေးကောက်ခံ အမျိုးသားညီညွတ် ရေးအစိုးရ(NUG)ကို မကြာမီအုပ်ချုပ်မယ့်အစိုးရတစ်ရပ်အဖြစ် သဘောထားဖို့ ဗြိတိန်အစိုးရကို အောက်လွှတ်တော်က တောင်းဆိုလိုက်ပါတယ်။
ဗြိတိန်အောက်လွှတ်တော်ရဲ့ နိုင်ငံခြားရေးရာ ကော်မတီဟာ “မြန်မာ့အရေးအပေါ် ဗြိတိန်အစိုးရရဲ့ တုန့်ပြန်ချက်” လို့ အမည်ပေးထားတဲ့ အစီရင်ခံစာ တစ်စောင်ကို ဇူလိုင် ၁၆ မှာ ထုတ်ပြန်ခဲ့ပြီး အဲဒီအစီရင်ခံစာမှာ NUG ကို အသိအမှတ်ပြုရေးနဲ့ စစ်ကောင်စီကို အသိအမှတ် မပြုဖို့ ထည့်သွင်းတိုက်တွန်းခဲ့တာပါ။
တိုင်းရင်းသားမျိုးနွယ်စုတွေနဲ့ လူနည်းစုတွေရဲ့ အခွင့်အရေးတွေကို အာမခံထားတဲ့ NUG ရဲ့ ရှင်း လင်းပြီး ဆက်လက်လုပ်ဆောင်မယ့် ကတိကဝတ်တွေနဲ့ အတိတ်က ပြစ်မှုတွေအပေါ် တရားမျှတမှုဖော်ဆောင်ရေးအလား အလာတွေကြောင့် NUG ကို အစိုးရတစ်ရပ်အဖြစ် သဘောထားဖို့ ဗြိတိန်အောက်လွှတ်တော်က ထောက်ခံထားပါတယ်။
တစ်ချိန်တည်းမှာ ဗြိတိန်အစိုးရရဲ့ လုပ်ဆောင်မှုတွေဟာ မြန်မာစစ်တပ်အာဏာပိုင်တွေကို ဘယ်လိုနည်းနဲ့မျှ တရားဝင်မှုမပေးဖို့ အောက်လွှတ်တော်က တိုက်တွန်းပါတယ်။
အာဆီယံနဲ့အတူ အလုပ်လုပ်ပြီး နိုင်ငံရေးအကျဥ်းသားတွေ ပြန်လွှတ်ပေးရေးနဲ့ အကြမ်းဖက်မှုရပ်တန့်ရေး အပါအဝင် ကြားဝင်ဖျန်ဖြေရေးလုပ်ငန်းစဥ်အားလုံးကို အခြေခံအားဖြင့်ပါဝင်ဖို့လည်း ဗြိတိန်အစိုးရကို တိုက်တွန်းထားပါတယ်။
Public Service Announcement
ဒါ့အပြင် မြန်မာစစ်တပ်ကို လက်နက်ရောင်းချမှုပိတ်ပင်ရေးဆက်လက်လုပ်ဆောင်သင့်ပြီး စည်းနှောင်မှုရှိတဲ့ ကုလသမဂ္ဂလုံခြုံရေးကောင်စီကနေလည်း လက်နက်ရောင်းချမှုပိတ်ပင်ရေးကို ကြိုးစားဖို့အကြံပြုထားပါတယ်။
မြန်မာစစ်တပ်ခေါင်းဆောင်တွေ၊ စစ်တပ်နဲ့ ဆက်စပ်တဲ့စီးပွားရေးလုပ်ငန်းတွေကို အရေးယူဒဏ်ခတ်ဖို့၊ စစ်တပ်ဆီစီးဝင်နေတဲ့ အကျိုးအမြတ်တွေကို ပိတ်ဆို့တားမြစ်ဖို့ အချက်တွေကိုလည်း ကော်မတီရဲ့ အစီရင်ခံစာမှာ ဖော်ပြပါတယ်။
နောက်ပြီး စစ်တပ်ခေါင်းဆောင်တွေကို ပြစ်ဒဏ်ကင်းလွှတ်ခွင့်မပေးဖို့နဲ့ တရားမျှတမှုရင်ဆိုင်စေရေးရှိစေဖို့ ဗြိတိန်အစိုးရကို အောက်လွှတ်တော်က တိုက်တွန်းထားပါတယ်။
လန်ဒန်ရှိ မြန်မာသံရုံးကို စစ်တပ်က နေရာယူမှုကြောင့် ဗီဇာသက်တမ်းတိုးဖို့ ခက်ခဲနေတဲ့ ဗြိတိန်ရောက် မြန်မာနိုင်ငံသားတွေကို အကာအကွယ်ပေးဖို့လည်း အစီရင်ခံစာမှာ အကြံပြုထားပါတယ်။
