ကမာရွတ်မြို့နယ်မှာ ယမန်နေ့(သြဂုတ် ၁)ရက်တည်း စစ်ကောင်စီအဖွဲ့ရဲ့ဖမ်းဆီးခြင်းခံရတဲ့ပြည်သူ ၁၅ ခန့်ရှိခဲ့ပါတယ်။
ဖမ်းဆီခံရသူတွေထဲမှာ ကမာရွတ်(၃)ရပ်ကွက် မြအုပ်စုက ငါးဦး၊ ဗဟိုလမ်း BRB ဆိုက္ကားဂိတ်က ရှစ်ဦးနဲ့ မြမာလာလမ်းနဲ့ ရတနာလမ်းတွေက တစ်ဦးစီအပါအဝင်အားလုံး ၁၅ ဦးလို့ ကမာရွတ်မြို့နယ်ရဲ့ KMY-INFO က ထုတ်ပြန်ထားပါတယ်။
“ ကျွန်တော်တို့အနားမှာတော့ ည ၁၂ နာရီလောက်မှာ လာဖမ်းတာ။ ဘယ်နှစ်ဦးအဖမ်းခံရတယ်ဆိုတာတော့ အတိအကျမသိရဘူး” လို့ ကမာရွတ် အမှတ် (၃)ရပ်ကွက်မှာ ရပ်ကျေးအာဏာပိုင်လုပ်ဖူးခဲ့သူတစ်ဦးက ပြောပါတယ်။
ဒါ့အပြင် ရပ်ကွက်ထဲက တခြားလမ်းတွေမှာလည်း အ ဖမ်းအဆီးတချို့ရှိတယ်လို့ ကြားသိရပြီး ယမန် နေ့(သြဂုတ် ၁)နေ့လယ်ပိုင်းကတည်းက စစ်ကောင်စီရဲ့လက် နက်ကိုင်တပ်တွေ ရပ်ကွက်ထဲခြေရှုပ်နေတာ သတိထားမိတယ်လို့ အဲဒီရပ်ကျေးအာဏာပိုင်ဟောင်းဖြစ်သူက ပြောပါတယ်။
ကမာရွတ်မြို့နယ်ရှိ လှည်းတန်းစင်တာရှေ့နှင့် အမှတ်(၃) ရပ်ကွက်ထဲမှာရှိတဲ့ ဗဟိုလမ်းပေါ်မှာ ဗုံးတွေ့တယ်ဆိုတဲ့ အကြောင်းပြချက်နဲ့ ရဲနဲ့စစ်သားတွေ ရပ်ကွက်ထဲဝင်ရောက်စီးနင်းတာတွရှိတဲ့အကြောင်း အခင်းဖြစ်ရပ်အနီးနေထိုင်တဲ့ ဒေသခံအမျိုးသားတစ်ဦးက ထပ်မံအတည်ပြုပါတယ်။
“ ဗဟိုလမ်းပေါ်မှာ အသံဗုံး နှစ်လုံးတွေ့တယ်ဆိုတာမျိုးကြားရတယ်။ ပြီးတော့ လက်နက်ကိုင်တွေရောက်လာပြီး ထန်းတပင်လမ်းထဲက အဆောင်တစ်ဆောင်ကို ဝင်စီးတယ်လို့လည်းကြားတယ်။ လူဘယ်နှစ်ယောက်အဖမ်းခံလိုက်ရတယ်ဆိုတာတော့ အတိအကျ မသိရဘူး” လို့ အဲဒီဒေသခံက ဆိုပါတယ်။
အဖမ်းခံရတဲ့သူတွေထဲမှာ ဗုံးလန့်တယ်ဆိုတဲ့အ ကြောင်းပြချက်နဲ့ ဆက်စပ်ပြီး အဖမ်းခံရတဲ့သူတွေရှိသလို ညမထွက်ရအမိန့်သတ်မှတ်ထားချိန်နောက်ပိုင်း အပြင်ထွက်သူတချို့လည်းပါတယ်လို့ ထင်ကြေးပေးတာတွေရှိပေမဲ့ People’s Spring အနေနဲ့ သီးခြားအတည်ပြုချက် မရသေးပါဘူး။
