တရုတ်ဟာ မြန်မာနိုင်ငံမှာ ဖွံ့ဖြိုးရေးစီမံကိန်း ၂၁ ခုအတွက် ရန်ပုံငွေ အမေရိကန်ဒေါ်လာ ၆ သန်းကျော် အကြမ်းဖက်စစ်ကောင်စီကို လွှဲပြောင်းပေးအပ်မယ်လို့ စစ်ကောင်စီရဲ့ နိုင်ငံခြားရေးဝန်ကြီး ဌာနက ထုတ်ပြန်ပါတယ်။
၂၀၂၁ လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေ မြန်မာနိုင်ငံစီမံကိန်းများ လက်မှတ်ရေးထိုးပွဲအခမ်းအနားကို သြဂုတ်လ ၁၀ ရက်မှာ Video Conference စနစ်ဖြင့် ကျင်းပခဲ့ပြီး တရုတ်သံအမတ်ကြီး Mr. Chen Hai နဲ့ စစ်ကောင်စီဝန်ကြီး ဝဏ္ဏမောင်လွင်တို့ တက်ရောက် တာဖြစ်ပါတယ်။
အနောက်အင်အားကြီးနိုင်ငံများနဲ့ ကမ္ဘာ့နိုင်ငံအများစုက အာဏာသိမ်းအကြမ်းဖက်စစ်တပ်ကို အသိအမှတ်ပြုခြင်းမရှိဘဲ ပူးပေါင်းဆောင်ရွက်ခြင်းတွေကိုလည်း ရပ်ဆိုင်းထားပါတယ်။ ဒါပေမဲ့ တရုတ်နိုင်ငံကတော့ အကြမ်းဖက်စစ်ကောင်စီကို ၎င်းတို့အကျိုးစီးပွားအတွက် ဆက်လက်ပူး ပေါင်းဆောင်ရွက်နေပါတယ်။
အကြမ်းဖက်စစ်ကောင်စီဝန်ကြီးဝဏ္ဏမောင်လွင်က တရုတ်နိုင်ငံက မြန်မာအပေါ် ထောက်ခံအားပေးမှုကို ကျေးဇူးတင်ချီးကျူးကြောင်း အထက်ပါလက်မှတ်ရေးထိုးပွဲအခမ်းအနားမှာ ပြောကြားခဲ့ပါတယ်။
Public Service Announcement
ကုလသမဂ္ဂအထွေထွေအတွင်းရေးမှူးချုပ်ရဲ့ အထူးကိုယ်စားလှယ် Christine Shraner Burgener ကတော့ အကြမ်းဖက်စစ်တပ်ရဲ့ အာဏာသိမ်းမှုဟာ လက်ရှိအချိန်အထိ အောင်မြင်မှု မရှိသေးဘဲ ဥပဒေမဲ့ အာဏာသိမ်းမှုဖြစ်ပြီး နိုင်ငံရေးမတည်မငြိမ်မှုတွေ ဆက်လက်ဖြစ်ပွားနေ တယ်လို့ သုံးသပ်ထားပါတယ်။
ကိုးကား – Reuters
