အကြမ်းဖက်စစ်ကောင်စီ ယန္တရားများ လည်ပတ်နိုင်စေသော ဌာနများတွင် ပါဝင်ပတ်သက်နေသော ဝန်ထမ်းများ လူပုဂ္ဂိုလ်များကို အာဏာဖီဆန်ရေးလှုပ်ရှားမှု CDM ပြုလုပ်ကြရန် အထူးသတိပေးကြောင်း ကရင်နီအမျိုးသားကာကွယ်ရေးတပ်ဖွဲ့(KNDF)က ယနေ့သတင်းထုတ်ပြန်သည်။
KNDF အနေဖြင့် စစ်ကောင်စီယန္တရားများ လည်ပတ်နိုင်ရေးအတွက် ထောက်တိုင်သဖွယ် ဆောင်ရွက်လျက်ရှိသောဌာနများကို ဆက်လက်တိုက်ခိုက်သွားမည်ဟု KNDFက အသိပေးသည်။
ကရင်နီ(ကယား)ပြည်နယ်အတွင်း၌ အကြမ်းဖက်စစ်ကောင်စီ နှင့် ၎င်းတို့၏ လက်ပါးစေများသည် CDM လုပ်ဆောင်ခဲ့သော ဝန်ထမ်းများကို ဖိအားပေးခြင်း၊ ဝန်ထမ်းအဖြစ်မှ ထုတ်ပယ်ခြင်း၊ ဝန်ထမ်းအိမ်ယာများမှ နှင်ချခြင်းများ ပြုလုပ်လျက်ရှိကြောင်း၊ အကြမ်းဖက်စစ်ကောင်စီသည် စစ်အာဏာရှင်စနစ် တည်မြဲရေးနှင့် စစ်ဗျူရိုကရက်ယန္တရားများ ဆက်လက်လည်ပတ်နိုင်ရေးအတွက် မူလအစိုးရ ဌာနများကို အသုံးပြုကာ ပြည်သူ လူထုများကို ဖိနှိပ်လျက်ရှိကြောင်း KNDFက ထုတ်ပြန်သည်။
အကြမ်းဖက်စစ်ကောင်စီ၏ ထောက်တိုင်များဖြစ်သော ဌာနများလည်ပတ်နေသေးသရွေ့ စစ်အာဏာရှင်စနစ် တည်မြဲနေမည်ဖြစ်ကြောင်း ထို့ကြောင့် KNDF အနေဖြင့် အကြမ်းဖက်စစ်ကောင်စီတပ်များနှင့် ၎င်းတို့၏ လက်ပါး စေများ၊ စစ်ကောင်စီနှင့် ပူးပေါင်းဆောင်ရွက်နေသော လူပုဂ္ဂိုလ်များ၊ အဖွဲ့အစည်းများကိုလည်း ရန်သူအဖြစ် သတ်မှတ်ပြီး အမြစ်ပြတ်ချေမှုန်းသွားမည်ဖြစ်သည်ဟု ကြေညာချက်၌ ဖော်ပြထားသည်။
Public Service Announcement
