အရှေ့တောင်အရှမှာ မြန်မာနိုင်ငံက ကိုဗစ်ရောဂါနဲ့သေဆုံးမှုနှုန်း အမြင့်ဆုံးနိုင်ငံအဖြစ်ရပ်တည်နေပါတယ်။
စစ်ကောင်စီကျန်းမာရေးဝန်ကြီးဌာနကထုတ်ပြန်ချက်အတိုင်းဆိုရင် သေဆုံးနှုန်းက ၃.၆၇ ရာခိုင်နှုန်းအထိရှိနေတာဖြစ်ပါတယ်။ ရောဂါကူးစက်မှုရော သေဆုံးမှုမှာ အရေအတွက်များတဲ့ အင်ဒိုနီးရှားနဲ့ ဖီလစ်ပိုင်နိုင်ငံတွေထက်ကို သေဆုံးမှုနှုန်းမြင့်တက်နေတာဖြစ်ပါတယ်။
အရှေ့တောင်အရှ ၁၁ နိုင်ငံမှာ ကူစက်မှုရော သေဆုံးမှုပါအမြင့်ဆုံးဖြစ်တဲ့ အင်ဒိုနီးရှားနိုင်ငံမှာ ဒီကနေ့အထိ ရောဂါကူးစက်ခံရသူ ၃ သန်းကျော်နဲ့ သေဆုံးသူကတော့ တစ်သိန်းစွန်းစွန်းရှိပြီး သေဆုံးမှုနှုန်းက ၃.၀၁ ရာခိုင်နှုန်းပဲရှိပါတယ်။ ဖိလစ်ပိုင်နိုင်ငံမှာတော့ ၁.၇ သန်းကျာ်ကူးစက်ခံထားရပြီး ၂၉၀၀၀ ကျော်သေဆုံးခဲ့တာကြောင့် သေဆုံးနှုန်းက ၁.၇၄ ရာခိုင်နှုန်းရှိပါတယ်။
မြန်မာနိုင်ငံမှာတော့ ကူးစက်ခံရသူ ၃ သိန်း ၄ သောင်းကျော်မှာ သေဆုံးသူ ၁၂၀၀၀ ကျော်ရှိလို့ သေဆုံးနှုန်းက ၃.၆၇ ရာခိုင်နှုန်းထိရှိပါတယ်။
ဒါကလည်း စစ်ကောင်စီကျန်းမာရေးဝန်ကြီးဌာနက ထုတ်ပြန်တဲ့ ရောဂါကူးစက်သူအရေအတွက်နဲ့ သေဆုံးသူအရေအတွက်အပေါ်တွက်ချက်ထားတာဖြစ်ပြီး အပြင်မှာကူးစက်သေဆုံးနေတဲ့ တကယ့်ကိန်းဂဏန်းတွေမပါသေးပါဘူး။
ကိုဗစ်တတိယလှိုင်းစဖြစ်ချိန်မှာ အာဏာသိမ်းစစ်ကောင်စီက ကျန်းမာရေးဝန်ထမ်းတွေကို မတရားဖမ်းဆီးထောင်ချ၊ ဖမ်းဝရမ်းတွေထုတ်ထားတာကြောင့် ကျန်းမာရေးစောင့်ရှောက်မှုစနစ်တစ်ခုလုံးပြိုလဲနေချိန်ဖြစ်ပါတယ်။
ကိုဗစ်ပထမလှိုင်းနဲ့ ဒုတိယလှိုင်းတွေမှာ သေဆုံးနှုန်းက ၂ ရာခိုင်နှုန်းမှာပဲရှိခဲ့တာဖြစ်ပြီး တတိယလှိုင်းမှာတော့ အောက်စီဂျင်ပြတ်လတ်တာ၊ ဆေးဝါးပစ္စည်းတွေပြတ်လတ်တာ၊ အရေးပေါ်လူနာတွေအတွက် သွားစရာ ဆေးရုံနဲ့ ကုသရးစင်တာတွေမရှိတာကြောင့် နေအိမ်တွေမှာပဲ ကျန်းမာရေးစောင့်ရှောက်မှုမရဘဲ သေဆုံးရတဲ့အရေအတွက်ကလည်း စာရင်းပြုစုထားတာမရှိပေမယ့် သချိုင်းတွေမှာ အလောင်းတွေ စုပြုံတန်းစီကြရတဲ့အထိဖြစ်ပါတယ်။
လူဦးရေ ၃၂ သန်းကျော်ကူးစက်ခံခဲ့ရတဲ့ အိန္ဒိယနိုင်ငံမှာ သေဆုံးသူ ၄ သိန်း ၃ သောင်းကျော်ရှိခဲ့ပြီး သေဆုံးနှုန်း ၁. ၃၄ ရာခိုင်နှုန်းပဲရှိပါတယ်။
ကိုးကား- Worldometers.info
