အကြမ်းဖက်စစ်တပ်က အာဏာသိမ်းပြီးနောက်ခြောက်လအကြာတွင် မြန်မာနိုင်ငံဟာ အလုပ်သမားတွေအတွက် ကမ္ဘာ့အဆိုးရွားဆုံးနိုင်ငံ ၁၀ နိုင်ငံထဲမှာ ပါဝင်လာခဲ့ပါတယ်။
အပြည်ပြည်ဆိုင်ရာအလုပ်သမားသမဂ္ဂအဖွဲ့ချုပ် (ITUC) ရဲ့ ၂၀၂၁ ခုနှစ် ကမ္ဘာလုံးဆိုင်ရာ အခွင့်အရေးညွှန်းကိန်းအရ မြန်မာနိုင်ငံဟာ ပထမဆုံးအကြိမ်အနေနဲ့ ကမ္ဘာ့အဆိုးရွားဆုံးနိုင်ငံ ၁၀ နိုင်ငံထဲမှာပါဝင်လာတာဖြစ်ပါတယ်။
“ဖေဖော်ဝါရီ ၁ ရက်မှာ အာဏာသိမ်းထားတဲ့စစ်အာဏာရှင်ဟာ ဒီမိုကရေစီပြန်လည်ရရှိရေးတောင်းဆိုကြတဲ့ ဆန္ဒပြသူလူထုတွေအပေါ် အကြင်နာတရားကင်းမဲ့စွာ နှိပ်ကွပ်ဖြိုခွဲမှုတွေကြောင့် မြန်မာနိုင်ငံဟာ ၂၀၂၁ ခုနှစ်အတွင်းမှာ အလုပ်သမားတွေအပေါ် နေရာအနှံအပြားနှိပ်ကွပ်ပြီး ပြည်သူလူထုအပေါ်ဖိနှိပ်မှုပြုလုပ်တဲ့ နိုင်ငံအဖြစ် သက်ဆင်းကျရောက်ခဲ့တာပါ” လို့ အမေရိကန် သံရုံးက ဒီနေ့ထုတ်ပြန်ပါတယ်။
ဆက်လက်ပြီး “နေ့စဉ်ဆန္ဒပြမှုတွေဟာ ပိုမိုတိုးမြှင့်လာတဲ့ရက်စက်မှုတွေနဲ့ကြုံတွေ့ခဲ့ရပါတယ်။ ပြည်သူအနည်း ဆုံး ၅၅၀ သေဆုံးခဲ့ရပြီး ရာပေါင်းများစွာထိခိုက်ဒဏ်ရာရှိခဲ့ကြသလို လူပေါင်း ၂၇၀၀ ကျော်အဖမ်းခံခဲ့ရ၊ တရားစွဲခံရ ဒါမှမဟုတ် ပြစ်ဒဏ်ချမှတ်ခံခဲ့ရပြီးဖြစ်ပါတယ်” လို့ သံရုံးက ဖော်ပြပါတယ်။
ဒါ့အပြင် မြန်မာစစ်တပ်ဟာ လွတ်လပ်စွာပြောဆိုမှုကိုထိန်းချုပ် ဖိနှိပ်ဖို့အတွက် ဆိုင်ဘာဥပဒေတစ်ခုကိုပြဋ္ဌာန်းဖို့စီစဉ်ခဲ့ပြီး သူရဲ့ ဖိနှိပ်ဖြိုခွင်းမှုကို လုံးဝအလျှော့မပေးဘဲဆက်လက်လုပ်ဆောင် နေတာလို့ အမေရိကန်သံရုံးက ထုတ်ပြန်ပါတယ်။
Public Service Announcement
