စစ်ကောင်စီတပ်များနှင့်၎င်းတို့၏လက်ပါးစေ PNOတပ်များကို အဆုံးတိုင်တိုက်ခိုက်သွားမည်ဟု KNDFသတိပေး
ရှမ်းပြည်နယ်တောင်ပိုင်း ပင်လောင်းမြို့နယ်တွင်ဖြစ်ပွားသည့်တိုက်ပွဲတွင် စစ်ကောင်စီဘက်မှ ငါးဦးနှင့် ပအိုဝ်းပြည်သူ့စစ် PNO ဘက်မှ ခြောက်ဦးထက်မနည်းသေဆုံးခဲ့ကြောင်း KNDFက ထုတ်ပြန်သည်။
သြဂုတ်၁၄ရက်က ပင်လောင်းမြို့နယ် ပင်ပုံနှင့် လယ်ဟွဲကျေးရွာ အနီးတွင် ဖြစ်ပွားခဲ့သော တိုက်ပွဲအတွင်း အကြမ်းဖက် စစ်ကောင်စီတပ်မှငါးဉီးကျဆုံးခဲ့ပြီး၊ PNO ဘက်မှခြောက်ဉီး ထက်မနည်း ကျဆုံးမှုများရှိခဲ့သည်ဟု ထုတ်ပြန်သည်။ ထိုကြောင့် အကြမ်းဖက်စစ်ကောင်စီတပ်များသည် လွိုင်ကော်မြို့မှ ဖယ်ခုံမြို့နယ်သို့ စစ်ကား ၃၅ စီးဖြင့် အင်အားဖြည့်တင်းလျက်ရှိသည်ဟု ထုတ်ပြန်ချက်တွင် ပါရှိသည်။
အကြမ်းဖက်စစ်ကောင်စီတပ်များနှင့် PNO တပ်များသည် သြဂုတ်၁၄ရက်တွင် တိုက်ပွဲဖြစ်ပွားခဲ့သည့် ပင်ပုံကျေးရွာရှိ ဘုန်းကြီးကျောင်းတွင် တပ်စွဲလျက်ရှိပြီး ယနေ့နံနက်ပိုင်းနှင့် ညနေပိုင်းများတွင် လက်နက်ကြီးများဖြင့် အဆက်မပြတ် ရမ်းသမ်းပစ်ခတ်လျက်ရှိသည်ဟု ဆိုသည်။
အကြမ်းဖက်စစ်ကောင်စီတပ်များသည် ဒီးမော့ဆိုမြို့နယ် အရှ့ဘက်ခြမ်းတွင်ရှိသော ကျေးရွာများသို့ စစ်ကြောင်းထိုးလျက်ရှိရာ သြဂုတ်၁၃ ရက်တွင် ကရင်နီတပ်မတော် (KA) နှင့် KNDF တပ်တို့နှင့် တိုက်ပွဲငယ်များဖြစ်ပွားခဲ့ပြီး လက်ရှိအချိန်အထိစစ်ရေးတင်းမာလျက်ရှိသည်ဟုဆိုသည်။
Public Service Announcement
ထို့အပြင် အကြမ်းဖက်စစ်ကောင်စီတပ်များသည် ကျေးရွာနေပြည်သူအချို့ကို ဖမ်းစီးနှိပ်စက်ခြင်း၊ လမ်းပြအဖြစ် အတင်းအဓမ္မစေခိုင်းခြင်းများပြုလုပ်လျက်ရှိသည်ဟု ဖော်ပြထားသည်။
KNDF အနေဖြင့် တိုင်းရင်းသားလက်နက်ကိုင်အဖွဲ့အစည်းများ၊ နယ်မြေခံ ပြည်သူ့ကာကွယ်ရေးတပ်များနှင့် ပူးပေါင်း၍ ပြည်သူများကို အကြမ်းဖက်နှိပ်စက်နေသော စစ်ကောင်စီတပ်များနှင့် ၎င်းတို့၏လက်ပါးစေ PNO တပ်များကို အဆုံးတိုင်တိုက်ခိုက်သွားမည်ဟု KNDF သတင်းနှင့်ပြန်ကြားရေးအဖွဲ့က သတိပေးထားသည်။
