နွေဦးထီ ဒုတိယမြောက်နေ့အတွက် ထီစောင်ရေ ငါးသောင်းကို ဒီနေ့ညနေ ၄ နာရီမှာ စတင်ရောင်းချမယ်လို့ ‘အောင်လံလွှင့်ချီ နွေဦးထီ’ က ထုတ်ပြန်အသိပေးပါတယ်။
ထီထိုးတဲ့ နွေဦးတော်လှန်ရေး သူရဲကောင်းများအတွက် ပိုမိုစိတ်ချရစေဖို့ နည်းပညာလုံခြုံရေးကွန်ယက်ကို မွမ်းမံပြင်ဆင်နေရတာကြောင့် ပုံမှန်သတ်မှတ်ချိန် နံနက် ၁၀ နာရီမှာ စတင်ရောင်းချခြင်း မပြုနိုင်တာကို အနူးအညွှတ် တောင်းပန်ထားပါတယ်။
“ အထူးမှာကြား တိုက်တွန်းလိုသည်မှာ နွေဦးထီကို အသံတိတ်ပါဝင် ဆင်နွှဲပေးကြပါရန်နှင့် မိမိတို့၏ ငွေပေးချေမှုစနစ်အား အကြမ်းဖက်စစ်ကောင်စီ ခြေရာခံ ရန် မလွယ်အပ်သည့် နည်းလမ်းများဖြင့် စိတ်ရှည်စွာ စီစဉ်ဆောင် ရွက်ပေးကြပါ” လို့ ထုတ်ပြန်ပါတယ်။
ဒါ့အပြင် ထီထိုးမယ့်သူတွေအနေနဲ့ ထီဝယ်ယူခြင်းလုပ်ငန်းစဉ် မြန်ဆန်ချောမွေ့စေဖို့ မိမိတို့အမှန်တကယ်အသုံးပြုလိုတဲ့ Signal သို့မဟုတ် Telegram ဖုံးနံပါတ် တစ်ခုကို ကြိုတင်ဖန်တီးထားကြဖို့လည်း မေတ္တာရပ်ခံတိုက်တွန်းထားပါတယ်။
Public Service Announcement
တော်လှန်ရေးအသိ၊ တော်လှန်ရေးသတိဖြင့် နွေဦးထီကို အောင်လံလွှင့်ချီကြပါစို့လို့ နှိုးဆော်ထားပါတယ်။
တော်လှန်ရေးထီဖြစ်တဲ့ ‘အောင်လံလွှင့်ချီနွေဦးထီ’ကို အမျိုးသားညီညွတ်ရေးအစိုးရ(NUG)က မနေ့က စတင်ရောင်းချခဲ့ပြီး နာရီပိုင်းအတွင်းမှာပဲ သတ်မှတ်စောင်ရေရောင်းကုန်သွားပါတယ်။
