ကချင်ပြည်နယ် မြစ်ကြီးနားမြို့အခြေစိုက် ခလရ (၃၇)နှင့် ၀ိုင်းမော်မြို့နယ်အခြေစိုက် ခလရ(၅၈) တပ်တို့မှ လက်နက်ကြီး လက်နက်ငယ်ပစ်ခတ်မှုများ ယနေ့ညပိုင်း၌ ပြုလုပ်လျက်ရှိကြောင်း ဒေသခံတစ်ဦးက ပြောကြားသည်။
“ ၅၈ တပ်ရော ဒီဘက် ခလရ ၃၇ရော။ ဖြစ်တာက ၈နာရီ ၄၀ ပတ်ဝန်းကျင်လောက်မှာ။ အခုထိ အသံတွေကြားနေရတယ်။ လက်နက်ကြီးရော လက်နက်ငယ်ရော သေနတ်သံတွေ တရစပ်ပဲ ဝါးမီးရှို့သလို ဖောင်းဖောင်းဖောင်းနဲ့ ဆက်တိုက်ပဲ” ဟု ဒေသခံက ပြောသည်။
ပစ်ခတ်မှုများသည် အပြန်အလှန် ပစ်ခတ်ခြင်း သို့မဟုတ် စစ်ကောင်စီတပ်က တစ်ဖက်သတ်ပစ်ခတ်ခြင်းဟုတ်မဟုတ်ကိုမူ မသိရသေးဟု ၎င်း ကဆိုသည်။
၀ိုင်းမော်မြို့နယ်ရှိ ခလရ(၅၈)ကို ကချင်လက်နက်ကိုင်အဖွဲ့(KIA)က ဇူလိုင် ၂၉ရက်တွင် လာရောက်တိုက်ခိုက်ခဲ့ပြီးနောက် ယင်း ခလရ(၅၈) တပ်ရင်းအနေဖြင့် နောက်နေ့များ၌ပင် ပစ်ခတ်မှုများ တစ်ဖက်သတ်ပြုလုပ်ခဲ့ကြောင်း KIAက ပြောသည်။
Public Service Announcement
စစ်ကောင်စီတပ်ရင်းအနေဖြင့် ၎င်းတပ်နှင့်အနီးတ၀ိုက်ရှိ ကျေးရွာများမှ ဒေသခံများကိုလည်း ရွှေ့ပြောင်းခိုင်းခဲ့ကြောင်း ဒေသခံက ပြောသည်။ စစ်ကောင်စီအနေဖြင့် KIAကို ထိုးစစ်ဆင်လို၍ တစ်ဖက်သတ်တိုက်ပွဲများ လုပ်ဆောင်နေသည်ဟု သုံးသပ်နိုင်ကြောင်း KIA သတင်းနှင့်ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောဆိုထားသည်။
