ငြိမ်းချမ်းရေး၊ တရားမျှတမှုနဲ့ ဒီမိုကရေစီအရေးမှာ မြန်မာပြည်သူတွေနဲ့အတူ ဆက်လက်ရှိနေမယ်လို့ အမေရိကန်ပြော

ငြိမ်းချမ်းရေး၊ တရားမျှတမှုနဲ့ ဒီမိုကရေစီအရေးတို့အတွက် မြန်မာပြည်သူတွေနဲ့အတူ ဆက်လက်ရှိနေမယ် လို့ အမေရိကန်နိုင်ငံခြားရေးဝန်ကြီးဌာနက ဒီနေ့ထုတ်ပြန်ပါတယ်။

ရခိုင်ပြည်နယ်မှာ မျိုးနွယ်စုရှင်းလင်းခြင်း(Ethnic Cleansing) ၄ နှစ်မြောက်အထိမ်းအမှတ်အဖြစ် အမေရိကန် နိုင်ငံခြားရေးဝန်ကြီးဌာနက ထုတ်ပြန်ခဲ့ပြီး ငြိမ်းချမ်းရေးနဲ့ တရားမျှတမှု၊ အရေးပေါ်လူသားချင်းစာနာမှုအကူအညီ၊ ဒီမိုကရေစီလမ်းကြောင်းပေါ်ပြန်သွားရေး၊ လူ့အခွင့်အရေးနဲ့ အခြေခံလွတ်လပ်မှုတွေကို လေးစားရေး စတာတွေကို ကူညီထောက်ပံ့ပေးဖို့ မြန်မာပြည်သူတွေနဲ့အတူ ဆက်လက်ရှိနေမယ်လို့ ထည့်သွင်းဖော်ပြပါတယ်။

လွန်ခဲ့တဲ့လေးနှစ်က မြန်မာစစ်တပ်ဟာ ရခိုင်ပြည်နယ်မြောက်ပိုင်းက ရိုဟင်ဂျာတွေအပေါ် ကြောက်မက်ဖွယ်မျိုး နွယ်စုရှင်းလင်းမှုကို ကျူးလွန်ခဲ့ပြီး အဲဒီနေ့က လူမဆန်တဲ့စစ်တပ်ရဲ့ရက်စက်ယုတ်မာမှုဟာ နိုင်ငံတကာအသိုင်း အဝိုင်းကို ထိတ်လန့်စေခဲ့တယ်လို့ အမေရိကန်နိုင်ငံခြားရေးဝန်ကြီးဌာနပြောရေးဆိုခွင့်ရှိသူ Ned Price ရဲ့ ထုတ် ပြန်ချက်မှာဖော်ပြပါတယ်။

ဒါပေမဲ့ အမေရိကန်ဟာ ရိုဟင်ဂျာတွေအနေနဲ့ ဆယ်စုနှစ်ပေါင်းများစွာ ကြီးမားတဲ့လူ့အခွင့်အရေးနှိပ်စက်ကျိုးလွန် မှုတွေကို ခံစားခဲ့ရပြီး ဒီနေ့ထက်ထိလည်း အဲဒီကျူးလွန်မှုအများအပြား ဆက်လက်ရှိနေတယ်လို့ အမေရိကန်က ပြောပါတယ်။

Public Service Announcement

ကျူးလွန်ခံရသူတွေကို အမေရိကန်က အမှတ်ရနေပြီး သူတို့အတွက် တရားမျှတမှုရှာဖွေရေး၊ ရက်စက်ယုတ်မာမှု တွေနဲ့ အခြားသောလူ့အခွင့်အရေးချိုးဖောက်မှုတွေအတွက် တာဝန်ရှိသူတွေကို တာဝန်ခံနိုင်ရေး ထပ် လောင်း ကတိပြုတယ်လို့ဆိုပါတယ်။

ဒါ့အပြင် ဖေဖော်ဝါရီ ၁ ရက်မှာ အာဏာသိမ်းခဲ့တဲ့ စစ်တပ်ခေါင်းဆောင်တွေဟာ ဒီနေ့အထိ ဒီမိုကရေစီလိုလားတဲ့ တက်ကြွလှုပ်ရှားသူတွေ၊ မျိုးနွယ်စုအဖွဲ့ဝင်တွေနဲ့ နိုင်ငံတစ်ဝန်းရှိ ဘာသာရေးအသိုင်းအဝိုင်းတွေအပေါ် ချိုးဖောက် ကျူးလွန်မှုတွေ ဆက်လက်လုပ်ဆောင်နေပါတယ်။

၂၀၁၇ က ရိုဟင်ဂျာအသိုင်းအ၀ိုင်းအပေါ် အကြမ်းဖက်ခဲ့တဲ့ ခြေလျင်တပ်ရင်းတွေကို အာဏာသိမ်းချိန်ကစလို့ ဒီမိုကရေစီလိုလားသူ ဆန္ဒပြသူတွေအပေါ် သွေးထွက်သံယိုအကြမ်းဖက်ကျူးလွန်စေခဲ့တာကို အမေရိကန်က မြင်တွေ့ခဲ့တယ်လို့ ဆိုပါတယ်။

အာဏာသိမ်းမှုနဲ့ စစ်တပ်ရဲ့နောက်ဆက်တွဲ လူမဆန်တဲ့ဖြိုခွင်းမှုတွေဟာ ရိုဟင်ဂျာတွေအပါအဝင် နိုင်ငံတစ်ဝန်းရှိ ထိခိုက်လွယ်ပြည်သူတွေအပေါ် ပိုမိုဆိုးရွားစေခဲ့ပြီး အကူအညီလိုအပ်နေတဲ့ မြန်မာပြည်သူအားလုံးဆီ လူသားချင်း စာနာမှုအကူအညီ ရောက်ရှိဖို့ ဆက်လက်အလေးထားဆောင်ရွက်မယ်လို့ အမေရိကန်က ထုတ်ပြန်ပါတယ်။