မကွေးတိုင်း ပခုက္ကူခရိုင်ရေစကြိုမြို့နယ်ရှိ စစ်ကောင်စီသတင်းပေး အမျိုးသားတစ်ဦးအား ရေစကြို PDF နှင့် MG6 ပြောက်ကျားတပ်တို့ပူးပေါင်းကာ သုတ်သင်ခဲ့ကြောင်း အဆိုပါအဖွဲ့က သတင်းထုတ်ပြန်သည်။
ဇီးတောစံပြကျေးရွာမှ ဦးသန်းဌေးသည် ယနေ့(သြဂုတ် ၂၇ ရက်)နံနက်ပိုင်းက သေနတ်ဖြင့်ပစ်သတ်ခံခဲ့ရခြင်းဖြစ်ကြောင်းနယ်ခံများက ပြောသည်။
ဦးသန်းဌေးသည် စစ်ကောင်စီသတင်းပေး ဒလန်တစ်ဦးဖြစ်ပြီး ၎င်း၏ တူဖြစ်သူ ဇီးတောရွာအုပ်ချုပ်ရေးမှုးနှင့်အတူ စစ်ကောင်စီတပ်များနှင့်ပူးပေါင်းကာ ရေစကြို PDF စခန်းအား သတင်းပေး ပါဝင်ခဲ့သူတစ်ဦးဖြစ်ကြောင်း၊ ထို့ကြောင့် ရေစကြိုPDF နှင့် မြင်းခြံမြို့နယ်က MG6 ပြောက်ကျားတပ်တို့ပူးပေါင်းကာ သုတ်သင်ခဲ့ကြောင်း အဆိုပါအဖွဲ့ကယနေ့ သတင်းထုတ်ပြန်ခဲ့သည်။
ယနေ့နံနက်ပိုင်းကလည်း ရေစကြိုမြို့တွင် စစ်ကောင်စီတပ်သားများစောင့်ဆိုင်းနေသည့် စစ်ဆေးရေးဂိတ်အား သေနတ်သမားများမှ ပစ်ခတ်မှုဖြစ်ပွားရာ စစ်သား နှစ်ဦးဒဏ်ရာရရှိသွားကြောင်း ဒေသခံများက ပြောသည်။
Public Service Announcement
ရေစကြို-ချောင်းဦးလမ်းပေါ် ဖူလုံရွာအနီးတွင် ရှိသော ၂၅၆ ၊ ၂၅၇ တပ်ရှေ့ရှိ စစ်ဆေးရေးဂိတ်အား အမည်မသိသေနတ်သမားများမှ ကားပေါ်မှပစ်ခတ်သွားရာ စစ်သားနှစ်ယောက် ဒဏ်ရာရပြီး တစ်ဦးမှာ ပြင်းထန်ကြောင်း ဒေသခံများက ပြောသည်။
ထိုအပြင် စစ်ကောင်စီတပ်များသည် ရေစကြိုမြို့နယ်အတွင်း လှည့်လည်စစ်ဆေးမှုများ ပြုလုပ်လျက်ရှိရာ ယနေ့မွန်းလွဲပိုင်းက ပညင်းရွာထိပ် ရွာဇရပ်အနီးရှိ ကွမ်းယာဆိုင်နှင့် လက်တောက်ခုံဝိုင်းသို့ ရောက်ရှိလာကာ သေနတ် အချက်၂၀ ဝန်းကျင်ပစ်ဖောက်ခဲ့ကြောင်း၊ လက်တောက်ခုံဝိုင်းရှိ ရွာသား ၁၀ ယောက်ထက်မနည်း ရိုက်နှက် ဖမ်းဆီးခေါ်ဆောင်သွားပြီး ဆိုင်ကယ် ၁၅စီးခန့်ကိုလည်း သိမ်းဆည်းသွားကြောင်း ဒေသခံများက ပြောသည်။
