မြန်မာနိုင်ငံရဲ့ လက်နက်ကိုင်ပဋိပက္ခနဲ့ မလုံခြုံမှုတွေအပေါ် ဆက်လက်စိုးရိမ်နေတယ်လို့ ကုလပြော

မြန်မာနိုင်ငံရဲ့ နေရာအနှံ့အပြားမှာ ဖြစ်ပွားနေဆဲ လက်နက်ကိုင်ပဋိပက္ခနဲ့ မလုံခြုံမှုတွေရဲ့ လူသားချင်းစာနာမှု အကျိုးဆက်ကို ဆက်လက်စိုးရိမ်နေဆဲဖြစ်တယ်လို့ ကုလသမဂ္ဂက မနေ့ကထုတ်ဖော်ပြောဆိုပါတယ်။

ဖေဖော်ဝါရီ ၁ ရက်မှာ အကြမ်းဖက်စစ်တပ် အာဏာ သိမ်းချိန်ကစလို့ မြန်မာပြည်သူ နှစ်သိန်းခန့်ဟာ နေရပ်စွန့်ခွာ ထွက်ပြေးတိမ်းရှောင်နေခဲ့ရပြီး မုတ်သုံရာသီရေကြီးမှုရဲ့ အကျိုးဆက်ကြောင့် အခြေအနေဟာ ပိုမိုဆိုးရွားလာနေ တယ်လို့ ကုလသမဂ္ဂအထွေထွေ အတွင်းရေးမှူးချုပ်ရဲ့ တွဲဖက်ပြောရေးဆိုခွင့်ရှိသူ နီနိုမာတီနက်ဇ်က ပြောပါတယ်။

အထူးသဖြင့် နိုင်ငံရဲ့ အရှေ့တောင်ပိုင်း၊ အရှေ့ပိုင်းနဲ့ အနောက်ပိုင်းတွေမှာ ပြီးခဲ့တဲ့ ဇူလိုင်ကစလို့ လူပေါင်း ၁၂၅၀၀၀ ခန့်ဟာ ရေကြီးမှုဒဏ်ကိုခံစားခဲ့ရပြီး ကုလသမဂ္ဂနဲ့ မိတ်ဖက်တွေက လူပေါင်း ၃ သန်းခန့်ဆီကို ကပ်ရောဂါ တုံ့ပြန်ရေးအပါအဝင် လိုအပ်တဲ့ အရေးပေါ် အကူအညီနဲ့ ကာကွယ်ရေးဝန်ဆောင်မှုတွေ ရောက်ရှိ ဖို့ လုပ်ဆောင်ခဲ့တယ်လို့ ဆိုပါတယ်။

အခြားသောကဏ္ဍတွေရဲ့ ကူညီထောက်ပံ့မှုတွေဟာလည်း နိုင်ငံရဲ့ နေရာအများအပြားမှာ ဆက်လက်ရှိနေမှာ ဖြစ်ပြီး ကုလသမဂ္ဂရဲ့လုပ်ဖော်ကိုင်ဖက်တွေဟာ အစောပိုင်းကတည်းက သူတို့တောင်းဆိုခဲ့တဲ့ လိုအပ်နေသူတိုင်း ထံ အကူအညီရရှိဖို့နဲ့ လူသားချင်းစာနာမှုမိတ်ဖက်တွေကို အဆင်ပြေချောမွေ့စွာ လက်ခံဆောင်ရွက်နိုင်ဖို့ ထပ်မံ တောင်းဆိုခဲ့ပါတယ်။

Public Service Announcement

ဒါ့အပြင် ကုလသမဂ္ဂဟာ သူတို့ကတိကဝတ်အတိုင်း မြန်မာနိုင်ငံမှာ လူသားချင်းစာနာမှုအကူအညီတွေ၊ ကာကွယ်ရေးဝန်ဆောင်မှုတွေ၊ ကိုဗစ်-၁၉ နဲ့ဆက်နွယ်တဲ့အကူအညီတွေ ဆက်ပေးမယ်လို့ ထပ်လောင်း အတည်ပြုပါတယ်။