တိုက်ပွဲဆက်ဖြစ်နေ၍ စစ်ကောင်စီတပ်သားအလောင်း ၂၀ကျော် မြေမမြှုပ်နိုင်သေး

-ဒရုန်းများဖြင့် ထောက်လှမ်းနေသောကြောင့် တိုက်ပွဲများပိုမိုအရှိန်မြင့်တက်လာနိုင်ဟု MNDAA​ပြော

ရှမ်းပြည်နယ်မြောက်ပိုင်း မူဆယ်မြို့နယ် မုံးကိုးဒေသ၌ တိုက်ပွဲများ ဆက်ဖြစ်နေ၍ သေဆုံးနေသည့် စစ်ကောင်စီတပ်ဖွဲ့ဝင် ရုပ်အလောင်းများကို မြေမြှုပ်နိုင်ခြင်းမရှိသေးကြောင်း ကိုးကန့်လက်နက်ကိုင်အဖွဲ့(MNDAA)က ယ​နေ့ ထုတ်ပြန်သည်။

ဩဂုတ် နှောင်းပိုင်းနှင့် စက်တင်ဘာ အစောပိုင်း၌ စစ်ကောင်စီတပ်၏ ထိုးစစ်များကို MNDAAက ခုခံကာကွယ်နိုင်ခဲ့ရာ လမ်းဘေးတွင် ဖရိုဖရဲဖြင့် ကျဆုံးသွားသော စစ်ကောင်စီတပ်၏ စစ်သည်အလောင်း အချို့အား MNDAA တပ်ဖွဲ့ဝင်များမှ မြေမြှုပ်ပေးခဲ့ကြောင်း ဖော်ပြထားသည်။

တိုက်ပွဲဖြစ်ပွားရာဒေသများတွင် Covid-19 ရောဂါ ကူးစက်ပြန့်ပွားမှုမရှိစေရေးအတွက် အထူးဒေသ(၁) မုံးကိုးခရိုင်အုပ်ချုပ်ရေးအဖွဲ့နှင့် ကိုးကန့် (MNDAA) တပ်ဖွဲ့တို့သည် ဒေသခံစေတနာ့ဝန်ထမ်းအဖွဲ့များနှင့် ညှိနှိုင်းပြီး စစ်ကောင်စီတပ်၏အလောင်းများကို တိုက်ပွဲများငြိမ်သက်ချိန်၌ မြှုပ်နှံရန်ပြောဆိုထားကြောင်း၊ ယင်း လုပ်ငန်းများကို Covid-19 စည်းကမ်းချက်များနှင့်အညီ လုပ်ဆောင်ရမည်ဖြစ်ပြီး တိုက်ပွဲများကြောင့် နယ်မြေရှင်းလင်းရေးမလုပ်နိုင်သေးသော နယ်မြေများတွင် စစ်ကောင်စီတပ်၏ အလောင်း ၂၀ ကျော် ကျန်ရှိနေသေးကြောင်း ထုတ်ပြန်သည်။

Public Service Announcement

ထိုအလောင်းများကို စစ်ကောင်စီတပ်၏ ပစ်ခတ်တိုက် ခိုက်မှု ရပ်ဆိုင်းမှသာ မြေမြှုပ်နိုင်မည်ဟု MNDAAက ဆိုသည်။

လက်ရှိတွင် စစ်ကောင်စီတပ်က MNDAA တပ်စခန်းများရှိရာဘက်သို့ လက်နက်ကြီးများဖြင့် အဆတ်မပြတ် ပစ်ခတ်နေကြောင်း၊ ထို့အပြင် ဒရုန်းများဖြင့် ထောက် လှမ်းနေသောကြောင့် တိုက်ပွဲများလည်း ပိုမိုအရှိန်မြင့်တက်လာနိုင်ကြောင်း MNDAAက ဆိုသည်။

စစ်ကောင်စီတပ်က ဒရုန်းကိုအသုံးပြုပြီး ထောက်လှမ်းမှုမှ တိုက်ပွဲစခဲသည့် ဇူလိုင်လနောက်ပိုင်း ပထမဆုံးအကြိမ်ဖြစ်ကြောင်း၊ စစ်ကောင်စီတပ်၏ လုပ်ရပ်သည် စစ်ဆင်ရေ အကြီးစားများနှင့် လေကြောင်းမှ ဗုံးကြဲတိုက်ခိုက်ရန် ပြင်ဆင်နေခြင်းဖြစ်ကြောင်း မှန်းဆနိုင် သည်ဟု ထုတ်ပြန်သည်။