အာဏာသိမ်းစစ်ကောင်စီကို ပြည်သူများ၏ ခုခံတော်လှန်စစ် ယနေ့စတင်ပြီဟု အမျိုးသားညီညွတ်ရေးအစိုးရ (NUG) ယာယီသမ္မတဒူဝါလရှီးလ က ကြေညာပြီးနောက် ယနေ့ ညနေ ၄ နာရီ အချိန် အထိ ရရှိသောသတင်းများအရ ကချင်၊ကရင် ၊ရှမ်း နှင့် ကယားပြည်နယ်တို့တွင် တိုက်ပွဲများဖြစ်ပွားနေသည်။ ထိုအပြင် နိုင်ငံတစ်ဝန်းတွင် စစ်ကောင်စီတပ်များကို ပစ်မှတ်ထား၍ ဗုံးခွဲ တိုက်ခိုက်မှုများ များစွာလည်းဖြစ်ပေါ်နေသည်။
● ကချင်နှင့် စစ်ကိုင်းအစပ်တိုက်ပွဲ
ကချင်ပြည်နယ်နှင့်စစ်ကိုင်းတိုင်းအစပ်ရှိ ဟုမ္မလင်းမြို့နယ်ရှိ နမ့်သာ ဒေသတွင် ယနေ့ နံနက် ၁၀နာရီမှစ၍ အကြမ်းဖက်စစ်ကောင်စီတပ်စခန်းကို ကချင်လက်နက်ကိုင်အဖွဲ့(KIA)က ယနေ့ မနက်တွင် ဝင်ရောက်တိုက်ခိုက်နေပြီး တိုက်ပွဲ ပြင်းထန်လျက်ရှိသည်။
● တနင်္သာရီတိုင်း ပုလောမြို့နယ်တိုက်ပွဲ
တနင်္သာရီတိုင်း ပုလောမြို့နယ်ရှိ KNU တပ်မဟာ ၄ နယ်မြေတွင် ယနေ့နံနက်က စစ်ကောင်စီတပ်များ အင်အားအလုံးအရင်းဖြင့် ဝင်ရောက်နေရာယူလာသဖြင့် နယ်မြေခံ ကရင်အမျိုးသားလွတ်မြောက်ရေးတပ်မတော် ( KNLA)တပ်မဟာ ၄၊ ကရင်အမျိုးသားကာကွယ်ရေးတပ်ဖွဲ့( KNDO) တပ်ရင်း ၇ တို့နှင့် တိုက်ပွဲပြင်းထန်စွာ ဖြစ်ပွားနေသည်။
ပုလောမြို့နှင့် ၆ မိုင်အကွာရှိ ပိန္နဲတောင်ရွာနှင့် ဒူးရင်းပင် ချောင်ရွာ အနီးတဝိုက်ကို စစ်ကောင်စီတပ်ဖွဲ့ဝင် အင်အား ၁၅၀ က စစ်ကြောင်း ၂ ကြောင်းခွဲကာ ချီတက်လာသဖြင့် KNU ၏ တပ်မဟာ ၄ နှင့် တိုက်ပွဲဖြစ်ပွားခြင်းဖြစ်သည်။ နံနက် ၇ နာရီကျော်တွင်ဖြစ်ပွားသော တိုက်ပွဲတွင် စစ်ကောင်စီတပ်မှ ပြန်ဆုတ်သွားပြီ ၈ နာရီခွဲတွင် တပ်ပြန်လည်းစုစည်းကာ တိုက်ပွဲထပ်ဖြစ်နေကြောင်းဒေသခံအချို့ကပြောသည်။
● ကယားပြည်နယ်မှတိုက်ပွဲ
ကယားပြည်နယ်
လွိုင်ကော်နှင့်ဒီမော့ဆိုမြို့နယ် အကြား ဒေါပိုးစီကျေးရွာ အနီး တွင်လာရောက်တပ်စွဲသော စစ်ကောင်စီတပ်များကို ယနေ့မွန်းလွဲ ၃ နာရီ၌ ကရင်နီအမျိုးသားကာကွယ်ရေးတပ်ဖွဲ့(KNDF) တပ်ရင်းများကတိုက်ခိုက် လျက်ရှိကြောင်း KNDFက သတင်းထုတ်ပြန်သည်။
● မုံးကိုးဒေသ တိုက်ပွဲ
ရှမ်းပြည်နယ်မြောက်ပိုင်း မုံကိုးမြို့နယ်နှင့် ရှစ်မိုင်ခန့်အကွာတွင် ယနေ့ နံနက် ၁၁ နာရီခွဲခန့်အချိန်ခန့်က စစ်ကောင်စီတပ်ဖွဲ့ဝင်များနှင့် ကိုးကန့် (MNDAA) တပ်တို့အကြားတိုက်ပွဲဖြစ်ပွားခဲ့သည်။ တိုက်ပွဲ ဖြစ်ပွားချိန် ၁၀ မိနစ်ဝန်းကျင် ကြာပြီး နှစ်ဖက် ကျဆုံး ဒဏ်ရာရရှိသူစာရင်းကို မူမသိ့ရှိရသေးပေ ။
အခြားဒေသများတွင်လည်း တိုက်ပွဲများဖြစ်ပွားနေနိုင်သော်လည်းအတည်၍ ရသမျှသာဖော်ပြထားခြင်းဖြစ်ပါသည်။အထက်ပါတိုက်ပွဲသတင်းများကို
ယနေ့ညနေ ၄ နာရီအထိ့ ဒေသခံများ၊ သက်ဆိုင်ရာအဖွဲ့အစည်းများနှင့် ဒေသတွင်းသတင်းဌာနများက အတည်ပြုထုတ်ပြန်ထားသော သတင်းကိုသာဖော်ပြထားခြင်းဖြစ်ပါသည်။ အလားတူ ရန်ကုန် ၊မန္တလေး ၊ကလေး စသော မြို့များအပါအဝင် နိုင်တစ်ဝန်းတွင် စစ်ကောင်စီတပ်များကို ပစ်မှတ်ထား ဗုံခွဲတိုက်ခိုက်မှုများ ၊ဒလန်များကို ရှင်းလင်းမှုများလည်း တော်လှန်ရေးတပ်ဖွဲ့များက ပြုလုပ်နေသည်။