ဘားအံက ရပ်ကွက်ရုံး​တွေမှာ လက်နက်ကိုင် ပြည်သူ့စစ်​တွေ ​နေရာချ​နေ

ဘားအံမြို့ပေါ်မှာရှိတဲ့ ရပ်ကွက်ရုံးတွေမှာ အကြမ်းဖက်စစ်ကောင်စီလက်အောက်ခံ ပြည်သူ့စစ်တပ်ဖွဲ့၀င်တွေကို လုံခြုံရေးအကြောင်းပြပြီး စစ်ကောင်စီက နေရာချထားလျက်ရှိတယ်လို့ ဘားအံမြို့ခံတွေထံကနေ ကြားသိရပါတယ် ။

စက်တင်ဘာ ၁၃ ရက်နေ့ ညနေကစပြီး ဘားအံမြို့က အမှတ် ၃ ၊ အမှတ် ၅၊ အမှတ် ၉၊ အမှတ် ၇ စတဲ့ရပ်ကွက်အုပ်ချုပ်ရေးမှူးရုံး၀င်းထဲမှာ စစ်အုပ်စုရဲ့ပြည်သူ့စစ်တပ်ဖွဲ့၀င်တွေကို အရပ်၀တ်ပုံစံ၊ လက်နက်အပြည့်အစုံနဲ့ တွေ့ခဲ့ရတယ်လို့ ရပ်ကွက်နေပြည်သူတစ်ဦးက ပြောပါတယ်။

“မနေ့ကစပြီး ရပ်ကွက်ရုံးထဲရောက်လာတာ။ အရပ်၀တ်နဲ့ပဲ။ အရင်က ရုံးမှာ စစ်သားတွေ ရဲတွေရှိတာလေ။ အခု စစ်သား ရဲတွေပြောင်းလိုက်တော့ ပြည်သူ့စစ်တွေက ရောက်လာကြတာ။ တိုင်းစစ်ဌာနချုပ်အမိန့်နဲ့ ရောက်လာတယ်လို့ ကြားရတယ်။ လုံခြုံရေးအတွက်ပေါ့” လို့ ရပ်ကွက်နေပြည်သူတစ်ဦးက ပြောပြပါတယ်။

အကြမ်းဖက်စစ်အုပ်စုဟာ အရှေ့တောင်တိုင်းစစ်ဌာနချုပ် ဒုတိယတိုင်းမှူးရဲ့ ကြီးကြပ်ကွပ်ကဲမှုနဲ့
ရပ်ကွက်ထဲမှာနေထိုင်တဲ့ စစ်မှုထမ်းဟောင်းတွေကို ပြန်ခေါ်ပြီး လက်နက်တပ်ဆင် ဖွဲ့စည်းလိုက်တာဖြစ်တယ်လို့ ဒေသအာဏာပိုင်တစ်ဦးရဲ့ ပြောကြားချက်အရ သိရပါတယ်။

Public Service Announcement

ဒါ့အပြင် အမည်မဖော်ပြလိုတဲ့ စစ်မှုထမ်းဟောင်းတစ်ဦးကတော့ ရပ်ရွာလုံခြုံရေးအတွက် လက်နက်ကိုင်ဆောင်ပြီး ပြည်သူ့စစ်တာ၀န်ထမ်းဆောင်ဖို့ အထက်တာ၀န်ရှိသူတွေက ပြန်လည်ခေါ်ဆိုနေတာတွေရှိတယ်လို့လည်း ပြောပြပါတယ်။

လတ်တလောမှာ ရပ်ကွက်နဲ့ ကျေးရွာတွေထဲကို အကြမ်းဖက်စစ်ကောင်စီတပ်က ကားနဲ့ လှည့်လည်သွားလာတာတွေ လုပ်ဆောင်နေတာကြောင့် ဒေသခံပြည်သူတွေအနေနဲ့ စိုးရိမ်ကြောက်ရွံ့ရတယ်လို့ ဒေသခံရွာသားတစ်ဦးရဲ့ ပြောကြားချက်အရ သိရပါတယ်။